Para case todos os condutores e condutoras os datos que dende hai anos se veñen publicando sobre o descenso no número de usuarios na AP9 non sorprenden en absoluto. Case todo o mundo, en maior ou menor medida, comezou a mudar algúns hábitos por mor da crise económica e do incremento continuado de prezos desta vía de peaxe. Usámola menos, cando menos cando non levamos présa, e optamos por vías alternativas sempre que podemos. A vella N-550, que da Coruña a Tui vai en paralelo pola AP9 é unha delas e sen dúbida a máis importante. Os datos oficiais de tráfico en estrada, publicados esta semana polo Ministerio de Fomento confirman o incremento no uso destas vías, en paralelo á diminución do número de vehículos na autoestrada de pago.
Se durante o ano 2013 a AP9 perdeu un 7% dos seus usuarios, acumulando un descenso do 25,4% dende 2007, a N-550 viu incrementado o seu tráfico até nun 8,5% nalgúns puntos, sobre todo na provincia de Pontevedra. E todo iso a pesar de que, en boa medida tamén por mor da crise económica, o volume total do tráfico por estrada leva anos reducíndose, por exemolo un 1% no ano 2013 e outro 4% ao longo de 2012.
O Ministerio de Fomento ten instalados medidores da intensidade do tráfico en distintos puntos da N-550, en concreto nos quilómetros 50 (Sigüeiro), 97 (Caldas de Reis), 100 (Caldas de Reis) e 130 (Vilaboa). Obsevando os datos de 2013 e poñéndoos en relación cos de 2012 e 2011, observamos que a maioría destas estacións rexistraron un incremento notable do número de vahículos que pasou por elas.
No quilómetro 130, o incremento foi dun 8,5%, acadando a cifra mensual de 13.341 coches ao mes. De igual xeito, as estacións dos quilómetros 97 e 100 amosan un aumento do 6,8% e do 3,9%, respectivamente, con 3.374 e 4.217 vehículos mensuais, cifras en ambos os dous casos un dez por cento superiores ás de 2011. A excepción atopámola no punto quilométrico 50, entre Sigüeiro e Compostela, onde o tráfico, moi denso (17.897 vehículos en decembro de 2013), descendeu un 3,3% con respecto ao ano anterior e ao redor dun 5% con respecto ao 2011, en consonancia co descenso xeral do tráfico experimentado no conxunto de estradas españolas.
Media mensual de vehículos en 2013 | % con respecto a 2012 | |
---|---|---|
Quilómetro 50. N-550 | 17.897 | -3,3% |
Quilómetro 97. N-550 | 3.374 | +6,8 |
Quilómetro 100. N-550 | 4.217 | +3,9 |
Quilómetro 130. N-550 | 13.341 | +8,5 |
Outras vías alternativas á AP9, coma a N-651 (entre Betanzos e Fene), a AC-523 (entre A Coruña e Mesón do Vento) ou a AG59 (entre Santiago e A Estrada) tamén están a experimentar incrementos importantes na densidade do seu tráfico. A crise apreta e os consumidores buscan aforrar onde poden. Se cadra isto é, tamén, o inicio dunha cultura distinta do uso coche e da xestión do noso tempo.