0 Gardados para despois

Unha nova morte producida pola caza reabre o debate sobre a participación de menores

Redacción | @prazapublica

A tempada de caza en Galicia vén acompañada case todos os anos de informacións sobre mortes dalgún cazador. A presente tempada comezará este domingo 16 de outubro e rematará o 6 de xaneiro, pero mesmo antes do seu inicio xa temos que lamentar un falecemento (en Melide, por un disparo no peito, durante unha batida de xabaríns), que se uniu ese mesmo sábado a un ferido en Silleda (cun disparo na perna, noutra batida de xabaríns). Esta morte, a 14ª relacionada coa caza na última década en Galicia, reabriu o debate sobre a perigosidade desta actividade e sobre a conveniencia de limitar por lei a participación de menores de idade.

Na actualidade, a Lei de Caza de Galicia, aprobada en 2013 fixa nos 16 anos a idade mínima. Durante o seu debate colectivos animalistas e forzas da oposición defenderon elevar este límite ata os 18.

Na actualidade, a Lei de Caza de Galicia, aprobada en 2013 fixa nos 16 anos a idade mínima (artigo 58). Durante o seu debate colectivos animalistas e forzas da oposición defenderon elevar este límite ata os 18 anos (unha proposta que nas últimas eleccións En Marea e BNG volvían levar nos seus programas). Pola contra, a Federación Galega de Caza buscou reducir este mínimo ata os 14 anos na fase de tramitación da lei.

Este domingo a asociación animalista Libera e a Fondation Franz Weber solicitaron formalmente a modificación neste punto da Lei de Caza, lembrando que as batidas son unha actividade de "gran risco". E anunciaron que nas vindeiras semanas se poñerán en contacto cos distintos grupos políticos con represetación no Parlamento galego para que apoien a proposta na cámara.

 

14 mortes en 10 anos

En 2007 (Vilalba), 2008 (Bóveda), 2009 (Lugo e Cabana de Bergantiños), 2010 (Muíños e Ordes), 2011 (Ortigueira e Cervantes). 2012 (Vila de Cruces e Vilalba), 2013 (Rubiá e Ribas de Miño), 2015 (Laza) e 2016 (Melide). A última década deixou 14 mortes relacionadas coa caza, a maior parte por disparos errados ou rebotados durante batidas no monte ou por accidentes durante a manipulación da armas. 

A última década deixou 14 mortes relacionadas coa caza: 2007 (Vilalba), 2008 (Bóveda), 2009 (Lugo e Cabana de Bergantiños), 2010 (Muíños e Ordes), 2011 (Ortigueira e Cervantes). 2012 (Vila de Cruces e Vilalba), 2013 (Rubiá e Ribas de Miño), 2015 (Laza) e 2016 (Melide)

O falecemento no outono de 2013 dun rapaz de 17 anos en Ribas de Miño puxo de manifesto a perigosidade desta actividade para os menores de idade. E, de igual xeito, a morte en 2010 en Ordes dun home de 84 anos que paseaba polo monte revelou o risco ao que están exposta calquera persoa que se atope próxima aos lugares nos que se practica a caza, mesmo sen ser cazador.

Nos últimos entidades coma a Sociedade Galega de Historia Natural teñen denunciado "malas prácticas" ou a ausencia de controis e de medidas de seguridade tanto para protexer os cazadores como a persoas alleas. Nesa denuncia, a SGHN destacaba que a caza provoca cada ano en Galicia máis mortos que os accidentes de tráfico, en termos relativos, tendo en conta que a tempada dura apenas tres mesas e que só uns poucos milleiros de persoas teñen permiso de armas. En Galicia hai un total de 19.961 persoas con licenza de caza, case todos homes (19.805).

 

Coa túa achega fas posible que sigamos publicando novas coma esta.