0 Gardados para despois

Dous incendios en Monterrei afectan a 228 hectáreas

Redacción | @prazapublica

A Xunta considera controlados os dous lumes, un dos cales ralentizou o tráfico na A-52 e aproximouse a vivendas

A Xunta deu por controlados ao longo da noite deste sábado os dous incendios iniciados na tarde deste venres en dous puntos distintos do municipio ourensán de Monterrei e que afectan a 228 hectáreas. O lume aproximouse ás vivendas do núcleo habitado de Guimarei e fixo máis lenta a circulación pola Autovía das Rías Baixas (A-52).

O primeiro dos incendios comezou este venres ás 17.30 horas na parroquia de Infesta, situada na marxe dereita da A-52. Segundo as estimacións da Xunta, a superficie afectada é de 56 hectáreas e no seu control traballaron 23 brigadas, 11 motobombas, 13 helicópteros e seis avións, un despregamento que evitou que o lume afectase o núcleo habitado de Guimarei, situado entre a autovía e a antiga estrada nacional.

O segundo dos incendios no mesmo municipio de Monterrei, o máis grande, que afecta a 172 hectáreas, iniciouse tamén o venres ás 19.23 horas na parroquia de Flariz, na marxe esquerda da A-52, e estendeuse á de Vilaza. Neste incendio traballan 17 brigadas, oito motobombas, catro helicópteros e dous avións.

Coa túa achega fas posible que sigamos publicando novas coma esta.