A dirección federal modifica as listas do PSdeG e inclúe a Vilán e Gonzalo Caballero

Leiceaga, Cancela, Vilán e outros membros do PSdeG, na presentación do candidato á Xunta CC-BY-NC-SA PSdeG

A dirección federal do PSOE vén de modificar as propostas de listas electorais para as autonómicas do 25 de setembro emitidas polos comités provinciais de Pontevedra e Ourense, das que quedaran fóra destacados apoios do candidato á presidencia da Xunta, Xoaquín Fernández Leiceaga.

Vilán figura agora no segundo posto por Pontevedra e Caballero no quinto

En Pontevedra, o vigués Abel Losada, actual deputado, segue encabezando a lista, que ten agora no segundo posto á actual portavoz no Parlamento de Galicia, Patricia Vilán, que non lograra ser incluída en ningún lugar da lista pola dirección provincial do partido malia ser a máis apoiada pola agrupación local da cidade de Pontevedra. Do mesmo xeito, a dirección federal introduciu no quinto posto por Pontevedra a Gonzalo Caballero, sobriño do alcalde Abel Caballero pero enfrontado con el e principal apoio de Leiceaga nas primarias que o fixeron candidato. 

En Ourense, Carmen Rodríguez Dacosta, responsable local do partido na cidade, ocupará o terceiro posto e despraza ao quinto á actual deputada e secretaria de Organización provincial María Quintas.

A decisión de Ferraz ameaza con provocar un novo enfrontamento interno no socialismo galego. O que si creou xa foi moita polémica na dirección estatal. O membro andaluz da Comisión Federal de Listas, Antonio Pradas, votou en contra da modificación, segundo explicaron a este diario fontes socialistas. 

Despece

  • Caballero: "Non vou tolerar que Leiceaga deixe Vigo nun lugar secundario nas listas"

    A modificación das listas do PSdeG ás autonómicas por parte de Ferraz e, sobre todo, a inclusión de Gonzalo Caballero como número 5 na lista socialista de Pontevedra vén de provocar un enorme enfado por parte do alcalde de Vigo, Abel Caballero.

    Así o manifestou este venres logo de asegurar que xa contactou con membros da dirección federal para trasladarlles a súa indignación. Foi máis aló e responsabilizou dos cambios a Fernández Leiceaga e vinculouno ao apoio que el lle deu a Méndez Romeu, que competira nas primarias socialistas co actual candidato. "Que quede claro que non vou tolerar co meu silencio que o meu partido antepoña Pontevedra á maior cidade de Galicia. Por esta causa enfronteime coa Xunta e agora tamén dentro do partido". "Leiceaga quere que Vigo acepte un lugar secundario", dixo. 

    "Que quede claro que non vou tolerar co meu silencio que o meu partido antepoña Pontevedra á maior cidade de Galicia", di Caballero

    Ademais, destacou de que, no caso de que o PSdeG obtivese catro deputados pola provincia, "dúas serían de Pontevedra, un de Vigo e outro de Arousa" o que, insiste, "nunca ocorrera". "Defenderei Vigo por riba do meu partido", engadiu, tras advertir de que a súa representación nas listas "non se corresponde nin co seu peso por poboación nin polo seu peso electoral". 

    Santos Héctor, secretario provincial, tamén acusou a Leiceaga de cambiar a dedo a lista elixida democraticamente e destaca que é a primeira vez que a comisión executivo modifica unha candidatura que tivo os votos maioritarios e apoiada polos alcaldes socialistas.

    Pola súa banda, a secretaria xeral dos socialistas en Ferrol, Beatriz Sestayo, lamentou a "pouca flexibilidade" da executiva provincial a diferenza doutras, para admitir cambios nas listas, como se produciron noutros lugares de común acordo, pero remarcando que Ferrol "fará campaña cos dous candidatos representantes da cidade que figuran nas listas e que estarán presentes no Comité electoral local".

    Leiceaga, por outra banda, defendeu as candidaturas que, segundo dixo, "non só son magníficas, senón que son unhas listas do conxunto do partido". "Fíxose como está previsto no regulamento", rematou. 

    Abel Caballero, en rolda de prensa © Concello de Vigo

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza