Carlos Vázquez Padín, presidente nacional de Converxencia 21, formación que se define como liberal e que defende que “non pode haber ningún límite de decisión máis ca o que o pobo galego queira”, será o novo alcalde de Tui por decisión do PP malia que só conta con dous concelleiros. Os populares, con catro edís na Corporación máis fragmentada de Galicia, veñen de unirse a outras pequenas formacións locais de centro-dereita para asinar e rexistrar este luns unha moción de censura contra o goberno local encabezado ata o de agora polo PSdeG.
Os populares obvian as reiteradas apelacións de Feijóo a que goberne a lista máis votada e danlle a alcaldía a unha formación soberanista
As constantes apelacións do presidente Feijóo para que goberne en todos os niveis a lista máis votada vén de ser obviada novamente polo seu propio partido, disposto a facer alcalde a Vázquez Padín. Unha operación para a que este, por outra banda, puxo como condición que o resto de formacións se renovasen de xeito que non queda xa na Corporación local ningún dos edís que marcaron a conflitiva vida política local nas dúas últimas décadas.
Os sucesivos enfrontamentos desde 1998 entre os líderes locais do PP e os doutras formacións escindidas del desembocaron nas eleccións municipais de 2015 na composición da Corporación máis fragmentada de Galicia. O PP gañou os comicios con só 4 dos 17 concelleiros da Corporación, seguido do PSdeG (3 concelleiros), a Converxencia 21 de Vázquez Padín (2), BNG (2), Ciudadanos Tudenses (2), a formación do ex-alcalde do PP Miguel Ángel Capón Rey Alternativa Tudense (2), Son de Tui (1) e Alternativa Popular de Tui (1). Foi investido alcalde o socialista Enrique Cabaleiro, co apoio de seis dos oito partidos e 11 dos 17 concelleiros: PSdeG (3), Converxencia 21 (2), BNG (2), Capón Rey (2), Son de Tui (1) e AP de Tui (1). Porén, nin Converxencia 21 nin AP de Tui entraron a formar parte do goberno local.
Este luns, PP, Converxencia 21, Ciudadanos Tudenses e AP de Tui veñen de formalizar a moción de censura con Vázquez Padín como candidato á alcaldía. Previamente, os líderes e principais edís das outras formacións deixaron os seus postos como condición previa de Vázquez Padín para impulsar a operación.
A de Tui forma parte dunha estratexia global do PP de Pontevedra por reunificar o partido alí onde houbo escisións que contribuíron á súa vez á perda da Deputación
A moción de censura en Tui prodúcese coa dirección provincial do PP de Pontevedra, co vicepresidente da Xunta, Alfonso Rueda, á súa fronte, centrada no seu obxectivo de reunificar o centro-dereita nas vilas nas que diversas escisións provocaron en 2015 tanto a perda do goberno local como da Deputación de Pontevedra. Nesa estratexia, Tui preséntase como unha praza fundamental no seu partido xudicial. E nesa liña, o pasado 30 de maio Telmo Martín volvía á alcaldía de Sanxenxo tras entregarlla o anterior rexedor, Gonzalo Pita, escindido anteriormente do PP.
