A Xunta repartiu 4 millóns en axudas a concellos en só 12 minutos e a oposición sospeita que foron aos do PP

A conselleira de Medio Ambiente e Ordenación do Territorio, Beatriz Mato Dominio Público Xunta de Galicia

O pasado venres 4 de maio a Xunta anunciou no Diario Oficial de Galicia a convocatoria dunha liña de axudas de 4,3 millóns de euros para obras de mellora de infraestruturas e equipamentos municipais. O criterio de reparto era o de que as recibirían os primeiros que as solicitasen a partir do día seguinte. Uns días máis tarde o propio Goberno galego indicou que ás doce da noite e doce minutos, isto é, ás 0:12 horas do sábado 5 de maio, xa se esgotaran as axudas dispoñibles. En Marea e PSdeG sospeitan que a convocatoria foi preparada pola Xunta para que os cartos acabasen en concellos do PP.

O prazo de presentación de solicitudes abriuse na medianoite dun venres a un sábado e uns minutos despois xa se esgotaran os cartos dispoñibles

A convocatoria de axudas, realizada pola Consellería de Medio Ambiente e Ordenación do Territorio, e asinada pola propia conselleira, Beatriz Mato, no DOG do venres 4 de maio, establecía que “as solicitudes de subvención serán atendidas respectando a súa orde de entrada e sen comparación con outras solicitudes, ata o esgotamento do crédito dispoñible”. Alí tamén se indicaba que as solicitudes só podían presentarse a través da sede electrónica da Xunta cun prazo que comezaría a contar “a partir do día seguinte ao da publicación” desa mesma convocatoria, isto é, das cero horas do sábado día 5 de xullo.

O pasado venres día 13 de xullo o Goberno galego publicou no DOG unha resolución na que informaba de que daba por esgotada a contía total das axudas e indicaba que “a última solicitude que se puido conceder antes do esgotamento do crédito tivo entrada no Rexistro Electrónico da Xunta de Galicia na data do 5 de maio de 2018, ás 00.12.18 horas”. Isto é, 12 minutos e 18 segundos despois de abrirse o prazo de solicitude, na madrugada dun sábado e malia que a solicitude debía ir acompañada de diversos certificados e declaracións oficiais.

Diario Oficial de Galicia no que se indica que as axudas se esgotaron aos 12 minutos de abrirse a súa convocatoria un sábado CC-BY-SA Praza Pública

“É evidente que existiu unha comunicación previa aos concellos amigos"

Ante esta situación, o deputado de En Marea Antón Sánchez e a do PSdeG Patricia Vilán veñen de presentar diversas iniciativas no Parlamento de Galicia para coñecer que concellos foron os receptores desas axudas, coa sospeita de que a Xunta quixo beneficiar a municipios gobernados polo PP. “É evidente que existiu unha comunicación previa aos concellos amigos, pois resulta a todas luces imposible preparar a ampla documentación esixida en tan só doce minutos, máis aínda se temos en conta a hora á que se abriu a convocatoria”, salienta En Marea.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.