0 Gardados para despois

Os medios en castelán reciben nove veces máis cartos da Xunta cós xornais en galego

Redacción | @prazapublica

Nove veces máis en axudas para os medios en castelán que para os que empregan o galego. A Xunta destinou 1.675.000 en 2014 para os xornais dos grandes grupos de comunicación, mentres que repartiu algo menos de 182.000 entre os xornais integramente en galego por utilizar esta lingua, tal e como denuncia nun comuniado a Asociación de Medios en Galego (Amega). "Unhas axudas en galego da que tamén se benefiaron os grandes grupos de comunicación con centos de miles de euros por utilizar, tan só, o 6% do galego en todo o medio", din. 

Tal e como lembran, PSdeG, AGE e BNG apoian unha proposta de Lei de Publicidade Institucional desta asociación para "prohibir os convenios pola súa evidente arbitrariedade e que se reserve unha parte do orzamento das campañas publicitarias para medios en galego".

A Xunta destina 1,67 millóns aos grandes xornais fronte aos menos de 182.000 aos diarios integramente en galego

Os medios membros da Amega denuncian "a desidia da Xunta para coa defensa do uso do galego no eido da comunicación ante a pasividade das administracións públicas". "Son varias as situacións nas que a entidade, que defende, ante todo, o uso do noso idioma nos medios de comunicación, viuse atacada polas decisións do Goberno galego", insiste, e acusa o Executivo de Núñez Feijóo de obviar o artigo 5 do Estatuto de Autonomía que recolle que “os poderes públicos de Galicia garantizarán o uso normal e oficial dos dous idiomas e potenciarán a utilización do galego en todos as ordes da vida pública, cultural e informativa, e disporán dos medios necesarios para facilitar o seu coñecemento”.

"Esta Xunta está máis interesada en favorecer os intereses dos grandes grupos mediáticos que de defender os medios en galego, a pesar de que os medios tradicionais están sufrindo unha grave crise con despidos masivos e unha gran perda de audiencia", engade, quen destaca que, precisamente, a finais do pasado mes de xaneiro, a Secretaría Xeral de Medios facía públicas unhas novas bases da convocatoria de axudas económicas dirixidas a empresas que realicen publicacións periódicas escritas integramente en galego das que "volven quedar exentos os diarios dixitais a pesar das boas palabras que tivo a titular dese departamento", Mar Sánchez Sierra, cos representantes da Amega.

"Esta Xunta está máis interesada en favorecer os intereses dos grandes grupos mediáticos que de defender os medios en galego"

"Esta convocatoria vén sufrindo recortes constantes nos últimos anos, con reducións da dotación orzamentaria sospeitosamente similares en contía ás axudas que percibían medios xa desaparecidos", di Amega, que denuncia que son unhas axudas das que, ademais," algunhas publicacións están excluídas por cuestións normativas", como é o caso do Novas da Galiza, que comunica en galego reintegracionista. É idea da Amega que "ningún medio de comunicación quede excluído a competir en axudas públicas pola normativa que decida utilizar".

"Facemos nosas as propias palabras do presidente da Xunta en varios actos institucionais e entrevistas nas que aseguraba que o galego nos permite comunicarnos con 250 millóns de persoas, facendo clara referencia á relación íntima da lusofonía e a lingua galega", recorrdan, tras advefir de que "os convenios para a promoción da lingua galega acaban recaendo sempre nas mesmas grandes editoriais, con certas dúbidas sobre a súa legalidade, pois algunhas das publicacións subvencionadas non cumpren os requisitos mínimos, tan ridículos como contar cun 6% da información en lingua galega".

O Executivo subvencion por usar o galego medios cun 6% da información nesa lingua

Tamén denuncia Amega a exclusión dos medios de comunicación en galego das constantes campañas publicitarias institucionais. "Campañas polas que a Xunta inxecta aos grandes grupos millonarias cantidades de diñeiro en conceptos variopintos de publicidade e propaganda". Foi por iso polo que Amega levou ao Parlamento Galego unha Proposición de Lei de Publicidade Institucional na que se recolle precisamente a prohibición dos convenios "pola súa evidente arbitrariedade e a reserva dunha parte do orzamento das campañas publicitarias para medios en galego".

"Exiximos a necesaria transparencia no reparto de axudas aos medios de comunicación, así como as campañas publicitarias institucionais. Tamén reclamamos que as axudas á promoción do galego recalen, na súa medida, nos medios que facemos do galego a nosa identidade", di Amega, que chega a uns 300.000 galegos a través de Praza Pública, A Nova Peneira, A Voz de Vilalba, Crónica 3, Galicia Confidencial, Novas da Galiza, Quepasanacosta.com, Radiofusión, Sermos Galiza, Tempos Novos, Terra Cha Xa e Valminor.info.

Coa túa achega fas posible que sigamos publicando novas coma esta.