Na entrevista alternativa buscamos as fobias e filias (non só políticas) das e dos alcaldes galegos. Quince preguntas rápidas desvelarán as súas preferencias.
Martiño Noriega é o alcalde de Santiago por Compostela Aberta. Durante a campaña electoral lanzou mensaxes que levaban a contra ás enquisas. E non se trabucaba. Gañou e o equipo do lugar no que gobernara antes, Teo, mantivo tamén a alcaldía. Di que o que mellor fixo na vida foi á súa filla Mara. Saúda todos os días nas súas redes sociais cun #GoodMorningVietnam e algunha canción.
O mellor almorzo leva…
O pan fresco que deixaba a media mañá o camión de reparto da panadería na casa dos pais nos meses de verán.
Nunca saes da casa sen…
Sen teléfono móbil.
O primeiro que pensaches ao entrar no despacho logo da investidura foi…
Que á tradición sobráballe ornamento
Madrugador como o cuco ou ave nocturna como o moucho?
Madrugador por decreto e ave nocturna por vocación.
Cearías con Merkel ou con Christine Lagarde?
Investiría un xaxún.
Stalin ou Trotsky?
R.- Trotsky, por Frida Kahlo.
Que disco lle regalarías a Feijóo?
O “Érguete” de Xenreira (para ver se se lle pega algo)
E a Xulio Ferreiro?
O mano a mano de Aute e Silvio.
Prosa ou poesía?
Prosa poética.
A mellor canción para facer o amor é…
Facer o amor é a mellor banda sonora.
Ataque Escampe ou The Homens?
Ataque Escampe (con Emil Kostad)
Es un hipster?
Xa me gustaría, son un ninguén.
Cal é a túa escena favorita de Good morning, Vietnam?
Aquela na que Robin Williams baila na radio (nunca vin completa a película)
Gorra ou chapeo?
Iso e como ter que escoller entre o pai ou a nai.
Polbo ou churrasco?
Vale, escollo a miña nai.