BREOGAN, vangarda galega na investigación para acabar co cancro de mama

Pacientes reciben quimioterapia nun hospital galego © Sergas

Hai uns poucos días as prestixiosas revistas Nature e Nature Genetics daban conta dun relevante achado científico na investigación da loita contra o cancro en xeral e, en particular, nas pescudas para facer fronte aos tumores de mama. As variantes xenéticas que "contribúen ao risco de desenvolver cancro de mama"  pasan a ser practicamente o duplo das coñecidas ata o momento grazas á descuberta de 72 dúas novas: 65 que "predispoñen" a padecer un cancro e outras sete que, "especificamente", están ligadas ao cancro de mama. Neste relevante achado tivo un papel central o traballo da Breast Oncology Galician Network (BREOGAN), o consorcio científico galego que traballa na investigación do cancro de mama.

Este grupo de investigación, formado por profesionais dos complexos hospitalarios de Vigo e Santiago e da Fundación Pública Galega de Medicina Xenómica, foi unha das 300 institucións científicas de todo o mundo que traballaron neste estudo, para o que foron analizados os datos xenéticos de 275.000 mulleres, 146.000 delas diagnosticadas de cancro de mama. O equipo galego, liderado polos doutores Manuela Gago e Esteban Castelao, achegou ao traballo os perfís xenéticos de 3.000 pacientes galegas en cuxas familias se padece cancro de mama hereditario.

As variantes xenéticas que "contribúen ao risco de desenvolver cancro de mama"  pasan a ser practicamente o duplo das coñecidas

"A compoñente hereditaria do risco de cancro de mama débese a unha combinación de variantes raras" nalgúns xenes -os denominados BRCA1 e BRCA2, entre outros- que "confiren un alto risco da enfermidade" e doutras "máis comúns que comportan, cada unha, un pequeno risco", explican dende a Universidade de Santiago, institución académica a cuxo grupo de Medicina Xenómica pertence Manuela Gago e os investigadores Ana Vega e Ángel Carracedo, tamén coautores desta publicación científica a través do grupo BREOGAN. O novo achado permite identificar ata 180 variantes xenéticas "asociadas" á enfermidade, resumen.

No consorcio BREOGAN participan varias institucións públicas galegas © USC

Pero, para que serve este descubrimento? "Os resultados están axudando á comprensión dos procesos biolóxicos que interveñen" no cancro de mama "e poderían axudar tamén a desenvolver novas ferramentas terapéuticas e novas probas de predición de risco", reslta a doutora Gago. "O nivel de resolución acadado -agrega Ana Vega- permitiu a identificación de novos xenes implicados no desenvolvemento da enfermidade" e isto "mellora" a capacidade de diagnosticar e tratar o cancro.

O consorcio galego de cancro de mama participou con 3.000 pacientes nesta investigación internacional, que veñen de publicar as revistas 'Nature' e 'Nature genetics'. Este achado permitirá mellores diagnósticos e tratamentos da enfermidade

O doutor Ángel Carracedo pon tamén o acento na relevancia de que un equipo galego figure "na vangarda da identificación das variantes xenéticas asociadas co cancro de mama". "A descuberta -indican dende o equipo nun comunicado- aumenta significativamente a nosa comprensión da base herdada deste tipo de cancro, porque ademais de identificar novas variantes xenéticas, confirmamos moitas que sospeitabamos anteriormente". "Existen -detallan- algúns patróns claros nas variantes xenéticas que deberían axudarnos a entender por que algunhas mulleres están predispostas á enfermidade e que xenes e mecanismos están involucrados".

Co papel do estróxeno no desenvolvemento dos cancros de mama no centro da investigación, dende a USC sublíñase que "as variantes de risco identificadas" nestes estudos con participación galega "son comúns". "Mentres que algunhas están presentes nunha de cada cen mulleres, outras están en máis da metade de todas as mulleres". Así, aínda que "individualmente, os riscos por cada variantes son modestos, dado que as variantes son comúns e os efectos se multiplican xuntos, o efecto combinado é considerable. Deste xeito, segundo a investigación, xa é posible tirar conclusións como que o 1% das mulleres "teñen un risco de desenvolver cancro de mama tres veces maior que a poboación xeral".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.