Hai dúas semanas o Ministerio de Sanidade publicou o borrador dunha orde que lles esixirá aos produtos homeopáticos os mesmos requisitos de rexistro que aos medicamentos, abrindo un proceso polo que ao redor de 19 mil produtos poderían regular a súa situación legal, e reducindo notablemente as taxas que os seus fabricantes pagan. Na actualidade estes produtos están nun limbo legal: poden ser comercializados, pero non deben pasar por un rexistro nin son avaliados nin autorizados pola Axencia Española do Medicamento. Este limbo legal, en realidade, déixaos na ilegalidade, pois o proceso de regulación aberto en 1994 quedou paralizado, e este silencio administrativo levou a que calquera licencia ou situación provisional expirase hai xa tempo.
A propia directora da Axencia Española de Medicamentos e Produtos Sanitarios (AEMPS) afirmou publicamente que “non todos os medicamentos homeopáticos teñen que demostrar a súa eficacia”
Para ser legalizados, estes produtos non deberán probar a súa utilidade ou que cumpren a función e efectos que anuncian, senón simplemente deberán demostrar que son inocuos, que o seu consumo non é daniño. A propia directora da Axencia Española de Medicamentos e Produtos Sanitarios (AEMPS) afirmou publicamente que “non todos os medicamentos homeopáticos teñen que demostrar a súa eficacia” e que “a seguridade non se ten que demostrar con ensaios clínicos específicos”.
O proxecto do ministerio que dirixe Ana Mato espertou un rápido movemento de protesta entre profesionais e usuarios, e un manifesto, titulado Non sen evidencia, que circula polas redes sociais (coa etiqueta #nosinevidencia) e que está sendo apoiado por distintas páxinas especializadas. O texto parte da defensa de que "a evidencia científica é unha das pedras angulares nas que se asenta a medicina moderna" e demanda "que non se aprobe ningún tratamento que non demostrase, mediante ensaios clínicos reproducibles, unhas condicións de eficacia e seguridade polo menos superiores ao placebo".
O proxecto do ministerio que dirixe Ana Mato espertou un rápido movemento de protesta entre profesionais e usuarios, e un manifesto, titulado Non sen evidencia
Tamén pide que o Ministerio actúe contra "aquelas empresas que atribúen aos seus produtos calidades curativas ou beneficiosas para a saúde sen demostralo cientificamente". E que os colexios médicos "en cumprimento do artigo 26 do Código de Deontoloxía Médica", desaproben "os facultativos que prescriban tratamentos sen evidencia científica demostrada".
Outro dos puntos máis controvertidos do borrador está no pago das taxas. O último intento de regularizar estes produtos, en 2008, obrigaba a pagar unha taxa "para cada un dos medicamentos tendo en conta que cada dilución e cada forma farmacéutica representa un medicamento diferente”. Pagar unha taxa por cada un dos 19.000 produtos supoñía moitísimos cartos para a industria homeopática, até 350 millóns de euros. Porén, a orde do ministerio de Ana Mato prevé que “todas as dilucións dun medicamento homeopático formarán parte da mesma autorización de comercialización", polo que a industria homeopática aforrará unha gran cantidade de cartos neste proceso.
Dende Microsiervos engaden que "o verdadeiramente grave é cando se usa este tipo de produtos para tratar enfermidades e situacións graves, pois non é a primeira vez que isto desemboca nunha morte que en moitos casos se podería ter evitado, e, lamentablemente, seguro que non é a última". E reclaman que "non deberían poder venderse produtos homeopáticos nunha farmacia, porque velos ao lado de medicinas de verdade dálles un empaque que non teñen".
