A sueca Marta Dahlgren reivindica o galego ao recoller o XV Premio de Tradución Plácido Castro

Marta Dahlgren, no centro, cos membros do xurado este venres en Cambados Dominio Público Fundación Plácido Castro

A tradutora foi premiada pola adaptación ao galego de Kallocaína, de Karin Boye

A escritora sueca de orixe e galega de adopción Marta Dahlgren Thorsell recibiu este venres en Cambados o premio Plácido Castro de tradución de mans da alcaldesa, Fátima Alonso, e da presidenta da Fundación, Susi Castro. No acto participaron tamén os concelleiros de cultura de Vilagarcía e Cambados, Sonia Outón e Víctor Caamaño, Xavier Senín en nome do xurado desta XV edición e tamén da Asociación de Tradutores Galegos, Xaquín Chaves, autor da peza escultórica que simboliza o premio, Xulio Ríos, director do Instituto Galego de Análise e Documentación Internacional (Igadi), así como veciños da localidade, familiares e amigos.

Na súa intervención, Marta Dahlgren agradeceu o apoio que sempre atopou en Galicia para levar adiante o seu afán tradutor e reivindicou a importancia das linguas minoritarias para garantir a propia viabilidade das sociedades democráticas, segundo informa a fundación. Igualmente, a autora destacou o valor da obra premiada, Kallocaína, de Karin Boye que segundo dixo a impactou moito cando sendo moi nova a leu por primeira vez, e amosou a súa contrariedade polo mal momento que viven as humanidades.

O premio Plácido Castro de tradución, de periodicidade anual e que vén de ser convocado para a súa seguinte edición, quere reivindicar a dimensión tradutora de Plácido Castro, a transcendencia da tradución para o sistema literario e cultural e recoñecer o labor dos actuais tradutores e das súas obras.


Gañadores do Premio Plácido Castro de Tradución
2001 Lois Tobío e Valentín Arias
2002 Xesús Riveiro Costa
2003 Enma Lázare
2004 Xela Arias e Moisés Rodríguez Barcia
2005 Fernando Pérez-Barreiro Nolla, Iolanda Galanes e Marta Panero Louzán
2006 Xoán Montero e Ekaterina Guerbek
2007 Anxela Gracián
2008 María Reimóndez
2009 Emilio Valadé del Río e Natalia Cora, Rebeca Lemat e Susana Collazo
2010 Fernando Moreira Corral
2011 Camiño Noia, Elena Sherevera e Lourenzo Maroño
2012 Deserto
2013 Deserto
2014 Mona Imai e Alejandro Tobar
2015 Marta Dahlgren

 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.