A derradeira leición do mestre comeza o seu traslado a Galicia. A icónica obra de Castelao foi este martes descolgada e embalada por técnicos especialistas no Centro Galicia de Bos Aires, desde onde viaxará a Galicia para ser exhibida por primeira vez no país. Será na Cidade da Cultura --do 5 de outubro de 2018 ao 3 de marzo de 2019-- no marco da exposición Castelao maxistral, que homenaxeará o papel na construción do ensino públicois dos mestres e mestras das tres primeiras décadas do século pasado (1900-1936).

'A derradeira leición do mestre' foi descolgada e embalada este martes en Bos Aires por técnicos especialistas do Centro Galicia

Así o anunciou a Xunta, que destacou que o proceso levouse a cabo "coas maiores condicións de seguridade e baixo os estándares profesionais máis elevados, tendo en conta que se trata dunha obra simbólica tanto na traxectoria artística de Castelao como para Galicia, a territorial e a da diáspora". Tal e como lembra o Goberno, o artista e político rianxeiro pintou a obra --considerada o Guernica galego-- na capital arxentina en 1945, baseándose na estampa número 6 do seu libro Galicia mártir e para render homenaxe ao seu amigo e intelectual Alexandre Bóveda, fusilado o 17 de agosto de 1936 polo fascismo. 

"O feito de contemplar o cadro xa é unha toma de conciencia sobre a achega da emigraicón e o exilio ao patrimonio cultural", di o presidente do centro onde está a obra

O óleo de máis de 2 metros de altura nunca saíra nunca antes do Centro Galicia de Bos Aires, polo que será a primeira vez que se poida contemplar en Galicia. En declaracións a Praza.gal cando transcenderon as conversas para a cesión temporal do cadro, o presidente do Centro Galicia aclarara que a institución que encabeza "é custodio" da obra, pero que esta "pertence a toda a emigración, a todos os galegos da Terra e do mundo". "É moi importante --resaltaba José María Vila Alén logo tras a sinatura do acordo coa Xunta-- que os galegos da Terra comprendan o que fixo e o que fai a emigración e que esa emigración forma parte da Galicia universal". Neste sentido, resaltou, "o feito de contemplar" o cadro no que Castelao retrata a represión franquista "xa é unha toma de conciencia", tamén sobre a achega da emigración e do exilio ao patrimonio cultural galego.

"A derradeira leición do mestre non é un cadro, é moito máis que iso, un símbolo, unha bandeira... Non ten prezo porque está fóra de calquera valor de mercado", dicía en Praza.gal Vila Alén. 

^{Traslado d'A derradeira leición do mestre' no Centro Galicia de Bos Aires / © Xunta}

A mostra Castelao maxistral procura, segundo a Xunta, ser un "recoñecemento ao labor da Galicia emigrante, na salvagarda do legado patrimonial galego, e deses galegos e galegas que continuaron a actividade cultural durante boa parte do século XX ata a actualidade".

A mostra onde se exporá a obra permitirá contemplar todos os debuxos que Castelao realizou sobre o ensino obrigatorio en Galicia

A derradeira leición do mestre forma parte dun relato expositivo no que se quere "contrapor a situación do ensino en Galicia de principios do século pasado --con precariedade de medios, antipedagóxica e exclusivamente en castelán-- coa reforma e modernización que iniciaron os mestres e mestras da República cara unha ensinanza universal e máis profesional --con novos materiais pedagóxicos, algúns deles en galego--, e que se viu truncada co estoupido da Guerra Civil".

A mostra, comisariada polo historiador galego e vicepresidente da Fundación Castelao, Miguel Anxo Seixas Seoane, contará con 92 pezas --cedidas por 32 institucións públicas e privadas-- reconstruirá unha escola da época e permitirá tamén poder contemplar reunidos por vez primeira nunha exposición todos os debuxos (40) que realizou o artista de Rianxo sobre o ensino obrigatorio en Galicia, que na época era ata os 9 anos.