O paro rexistrado baixa en agosto en Galicia, que consolida o emprego temporal e precario

CC-BY-SA Praza Pública

O paro rexistrado descendeu en agosto en Galicia, a comunidade autónoma na que máis baixou o número de desempregados apuntados ás oficinas de emprego, fronte ao aumento de 21.670 no conxunto do Estado. No país, rexistráronse 2.639 parados menos que no mes anterior, un descenso do 1,2% que foi de 23.207 persoas e un 9,7% con respecto ao agosto do pasado ano. 

O paro rexistrado descendeu en Galicia en 2.639 persoas durante o mes de agosto

Galicia conta aínda con 213.732 parados rexistrados (sendo as mulleres maioría: 116.981 fronte a 96.751 homes) logo dun mes de agosto positivo no que os contratos temporais, precarios e fundamentalmente na hostelería pola temporada de verán permitiron o descenso do desemprego e un aumento de 5.317 afiliados á Seguridade Social, un 0,56% máis que o mes anterior e que sitúa o número medio de afiliacións en perto de un millón (963.196). No entanto, se a comparación se fai en termos anuais, o descenso do paro rexistrado non se traduce na súa totalidade en creación de emprego: os parados rexistrados diminúen en 23.207 nun ano pero a afiliación media só aumenta en 21.558 persoas.

A baixada no paro rexistrado mantén a tendencia dos últimos anos, cando en agosto se producía un descenso importante que era absorbido polo aumento continuado nos cinco meses seguintes. Así ocorreu en 2014, cunha baixada aínda maior (-3.340) e un aumento de máis de 1.000 parados en setembro e de case 6.000 en outubro, moi semellante ao ocorrido tamén en 2013. Un círculo que se pecha: medio ano con lixeiros descensos segundo se achega a Semana Santa e incrementos do paro no outono e no inverno. De feito, o descenso deste 2015 en agosto foi o menor dos tres últimos anos a pesar de que os datos de crecemento económico eran bastante peores. 

Ademais, tal e como advirte CCOO, parte deste descenso de agosto débese ao inicio dos cursos de formación para persoas desempregadas, que desta maneira non computan nas cifras do paro rexistrado, polo que o sindicato considera que "se está a desacelerar a recuperación do emprego no noso país".

O descenso do paro neste agosto é o menor dos tres últimos anos malia que os datos macroeconómicos eran peores daquela

Eses datos e os deste verán confirman a consolidación do cambio de modelo económico, con contratos escasos e por poucas horas ou meses, centrados en épocas de vacacións e no sector servizos. De feito, case o 57% dos parados que abandonaron as listas das oficinas de emprego fixérono neste sector servizos (1.498) fronte, por exemplo, aos 179 que deixaron as estatísticas desde o colectivo sen emprego anterior. Ademais, o desemprego descendeu en 504 persoas na construción, 324 na industria e 134 na agricultura. 

Case o 57% dos parados que abandonaron as listas de desempregados pertencen ao sector servizos; tan só o 5% dos contratos asinados foron indefinidos

A proba máis evidente do asentamento deste precario modelo tírase de novo da contratación. En Galicia asináronse en agosto 75.964 contratos, dos que tan só o 5,1% (3.882) foron indefinidos, fronte aos máis de 72.000 temporais. O outro gran problema atópase na protección dos parados. Dos máis de 213.000 desempregados rexistrados no país, tan só 108.239 son beneficiarios dunha prestación por desemprego, un 50,6%. Xa que logo, case a metade deles non reciben xa ningún tipo de prestación. 

Malia todo, o Goberno galego apurou para destacar os bos datos do final da tempada de vacacións nas redes sociais. 

 

A Xunta aproveitou os bos datos estatísticos para presumir do comportamento do emprego en Galicia. Así, xa nun chío en Twitter lembrou que "o paro baixa en Galicia no mes de agosto un 9,79%. É a maior baixada interanual absoluta de toda a serie histórica". É, curiosamente, o mesmo chío literal que dez minutos despois subiu o grupo parlamentario do PPdeG, incluíndo mesmo as mesmas etiquetas. 

Manifestación de parados do sector naval CC-BY-SA CIG

Despece

  • Os sindicatos frean a euforia da Xunta

    Os sindicatos frean a euforia da Xunta respecto dos datos do paro rexistrado en agosto ao lembrar a "precariedade" que se asenta nos contratos en Galicia ou que este último descenso é o peor dos últimos anos ao final da tempada turística, tradicionalmente positiva no país. 

    A CIG lembra que "medra a temporalidade e a precariedade" e que a redución do paro na industria e na construción é a peor dos últimos anos

    A CIG censura así "o optimismo do Goberno galego" ante unha situación na que "medra a temporalidade, e con ela a precariedade, e na que se segue a se manter en arredor do 50% o número de persoas desempregadas que non perciben ningún tipo de prestación". A central nacionalista destaca que "tanto na industria como na construción" a redución do desemprego" é inferior ao ano anterior e só en servizos ten unha evolución semellante”, tal e como destaca o secretario confederal de Emprego, Miguel Malvido.

    "O pouco emprego que se crea é precario”, insiste Malvido, que demostra que "aquilo que nos vendían de que a recuperación económica da que tanto falan -que a clase traballadora non percibe por ningún lado- ou o incremento do PIB provocarían un aumento do emprego, é falso”. "Para o que realmente serviu a crise foi para desregular as relacións laborais, reducir salarios, suprimir dereitos, facilitar ás empresas o despedimento daquelas traballadoras e traballadores con mellores condicións laborais, salariais e sociais e empeorar as condicións da contratación", rematou. 

    CCOO alerta de que "boa parte" do descenso do paro débese ao comezo dos cursos de formación para parados

    CCOO, pola súa banda, destaca tamén que o descenso do paro en agosto foi o pero dos últimos anos e advirte de que "boa parte dese descenso débese ao inicio dos cursos de formación para persoas desempregadas", que desta maneira non computan nas cifras do paro rexistrado.

    Por este motivo, Comisións considera que "se está a desacelerar a recuperación do emprego no noso país". A súa secretaria de Emprego, Maica Bouza, insta a Xunta a que "oriente os orzamentos do ano 2016 a atender as máis de 213.000 galegas e galegos desempregados e os 100.000 que, malia que traballaron, non teñen arestora ningún tipo de protección social".

    Bouza lembra que os "constantes recortes" do Executivo de Feijóo xa están a causar que "o crecemento da economía galega sexa inferior á media estatal, concretamente do 0,6 %, mentres que o conxunto do Estado medra un punto". A sindicalista pídelle á Xunta unha "aposta decidida" pola industria para que realmente se recuperen a economía e o emprego. Porén, coida que os últimos indicadores publicados demostran que a comunidade galega carece de política industrial e sen ela "é moi difícil albiscar a recuperación", lamenta.

    UGT-Galicia, pola súa banda, considera "positivo" o descenso do paro pero "alerta" do "preocupatne descenso que se producen no número de beneficiarios con prestación"

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza