Feijóo anuncia a dous días da campaña que Navantia fará un barco en setembro

Concello de Ferrol, Xunta e SEPI, reunidos en Santiago © Xunta

O "buque gris" da Armada que Feijóo prometeu para Navantia hai tan só unhas semanas e que o ministro de Facenda, Cristóbal Montoro, comprometera hai xa meses chega agora aos estaleiros ferroláns, en plena precampaña electoral e a tan só días de que arranque oficialmente a campaña para as eleccións europeas do vindeiro 25 de maio.

O buque xerará 500 empregos durante 30 meses e 1,1 millóns de horas de traballo nos estaleiros ferroláns

O presidente da SEPI, Ramón Aguirre, foi quen anunciou este mércores en Compostela que os estaleiros de Navantia en Ferrol e os de Puerto Real-San Fernando serán os encargados de construír dous novos buques de acción marítima (BAM), semellantes aos que emprega a Mariña para protexer os mariñeiros dos piratas nas costas africanas. Un deles construirase na ría galega e ambos achegarán ás empresas públicas 2,2 millóns de horas de carga de traballo (1,1 en cada centro), cun orzamento de 400 millóns de euros (200 para cada un) e nun prazo de execución de 30 meses na comarca. Serán 500 os traballadores que se encargarán dun proxecto que recupera a contratación aos estaleiros de Ferrolterra por parte de Defensa e que comezaría a construírse presumiblemente "despois do verán".

"O importante é que Defensa volve encargar barcos a Navantia; desde 2006, a Armada estivera imposibilitada polos programas orzamentarios", asegurou Aguirre tras a xuntanza que mantivo con Núñez Feijóo e co alcalde de Ferrol, José Manuel Rey Varela, en Compostela. O presidente da Xunta xa anunciara na sesión de control do Parlamento de minutos antes a noticia, igual que fixera nas últimas semanas, cando nun prazo de quince días prometera a construción deste barco militar dúas veces.

O anuncio para o naval ferrolán, como o encargo de Pemex que se atrasou ano e medio, chega poucos días antes dunhas eleccións

E agora, a noticia parece confirmarse. E chega menos de vinte días antes das eleccións europeas. Un anuncio en plena precampaña, como o que fixera un mes antes das eleccións autonómicas de 2012, cando Feijóo borderara a lei electoral para solemnizar os encargos de Pemex, aqueles que a petroleira estatal mexicana adxudicara ano e medio despois da promesa da Xunta, tras múltiples polémicas e incumprimentos e logo de cinco atrasos e once meses despois da data de inicio de corte de chapa que anunciara o xefe do Executivo galego.

Feijóo, tras a xuntanza co presidente da SEPI, destacou o feito de que a comarca de Ferrol teña carga de traballo para os vindeiros 30 meses cun investimento, entre este BAM e outros buques, duns 400 millóns, o que debuxa "un horizonte despexado" para o naval da localidade. O anuncio chega a un sector que nos dous últimos anos perdeu uns 2.500 empregos en Ferrolterra e a unha zona onde na súa principal cidade tan só traballan tres de cada dez persoas.

Xa nun comunicado, Navantia asegura que a industria auxiliar tamén se verá beneficiada polo contrato da Armada. "O impacto deste pedido estenderase á industria auxiliar", di a empresa estatal, que prevé "un efecto directo sobre o emprego das distintas comunidades afectadas".

Ademais, EU de Ferrol considera "ruín e deplorable" o feito de que o PP xogue "co desemprego". A formación considera "electoralista" o anuncio da construción do buque da Armada "ás portas dunha campaña electoral, ao igual que aconteceu co flotel". Segundo Esquerda Undia, os populares pretenden así "neutralizar a indignación popular contra o austericidio de Feijóo".

Protesta do naval en Ferrol CC-BY-NC-SA Susete
Concello de Ferrol, Xunta e SEPI, reunidos en Santiago © Xunta

Despece

  • O comité reduce a 260 os empregos e ve "electoralismo" nunha "boa noticia"

    O comité de empresa de Navantia Ferrol non dubidou en cualificar de "boa noticia" o anuncio da construción dun buque para a Armada nos estaleiros, pero lembrou tamén que, na súa opinión, séguese "na estética", xa que a promesa do flotel tamén saíu á luz case dous anos antes de que Pemez adxudicase finalmente o barco á compañía.

    Ao comité non lle saen "as contas" e asegura que serán 260 os operarios que traballarán neste buque

    O presidente do comité, Ignacio Naveiras, censurou tamén que aínda non exista "unha data concreta de inicio" para a construción do Buque de Acción Marítima (BAM) -a SEPI fala de que se inciarán os traballos presumiblemente "despois do verán"- e asegurou tamén que non lle saen "as contas". Segundo aclara, serán tan só uns 260 traballadores os que traballarán neste proxecto nos estaleiros e non os 500 dos que fala a Xunta e a sociedade estatal.

    Na mesma liña, Naveiras criticou o carácter "electoralista" que viu na xuntanza e comparecencia do presidente da SEPI, Ramón Aguirre, e máis de Núñez Feijóo a tan só dous días de que comece a campaña das eleccóns europeas e censurou que non se puxesen claramente ao carón de "milleiros de compañeiros" que viven "un drama" no sector. Porque aínda que os sindicatos crean positivo o anuncio, cren tamén que o buque é "un produto artificial" e que o Goberno, lonxe de dar solucións, ofrece "unha solución parcial no momento electoral máis apropiado para o partido que goberna". "A memoria é curta pero non podemos caer nesas trampas", dixo o representante dos traballadores.

    "O Goberno ofrece unha solución parcial no momento electoral máis apropiado para o partido que goberna"

    Para o comité de empresa, a construción deste buque aínda é "insuficiente" ante a penosa situación do naval e atribuíu a súa chegada á "pelexa da cidadanía". Por iso, reclamou de novo o dique flotante, a supresión do veto á construción civil ou aquela sexta fragata, tamén para a Armada, que está comprometida desde hai nove anos.

    "Feijóo non vén a Ferrol antes de ter unha mensaxe de calma porque non é ben recibido", engadiu Naveiras, que lembrou que a carga de traballo deste buque da Armada é case igual que a dun flotel pero moi inferior á dunha fragata. Ademais, o voceiro do comité advertiu que se mantén a manifestación convocada para este xoves a partir das 10.30 horas no estaleiro de Esteiro, agás que Navantia acceda a unha "xuntanza urxente" sobre o novo contrato. 

    Mobilización dos traballadores do sector naval CC-BY-SA COO Galicia

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza