Anticorrupción querélase contra cinco directivos de NCG e Mauro Varela dimite como presidente

Gayoso, Varela e Feijóo © Xunta

Novacaixagalicia en todas as portadas. Nun mesmo día, a Fiscalía Anticorrupción presenta unha querela contra catro ex directivos e Julio Fernández Gayoso, actual copresidente da entidade, mentres que o outro copresidente, Mauro Varela, presenta a súa dimisión "irrevocable" tras as súas desafortundadas palabras contra os afectados polas preferentes. Os dous foron os protagonistas simbólicos da famosa fusión das caixas galegas con aquela fotografía na que estreitaban a man xunto á do presidente da Xunta, Alberto Núñez Feijóo. Agora, un abandona e o outro afronta unha querela cuxo texto é especialmente duro coas súas decisións.

A primeira noticia chegou a última hora da mañá. A Fiscalía Anticorrupción viña de presentar ante o Xulgado Central de Instrución Número 2 da Audiencia Nacional a querela contra cinco exdirectivos de Novacaixagalicia polas cantidades adxudicadas en concepto de prexubilacións, "ocultando os importes tanto ao Consello de Administración como ao Banco de España".

Segundo recolle a querela, á que tiveron acceso varias axencias, a Fiscalía, tras practicar dilixencias de investigación nas últimas semanas, considera que os feitos poden ser constitutivos dun delito de administración desleal ou, de modo alternativo, dun delito de apropiación indebida.

A Fiscalía cre que os directivos puideron cometer delitos de administración desleal ou apropiación indebida

A querela foi formalizada contra Julio Fernández Gayoso, José Luis Pego Alonso, Gregorio Gorriarán Laza, Óscar Rodríguez Estrada e Francisco Javier García de Paredes Mouro.

"Os directivos actuaron con abuso das súas funcións para dispor fraudulentamente de bens da entidade crediticia"

Para Anticorrupción, todos estes directivos actuaron "con abuso das funcións do seu cargo e pleno coñecemento da dificilísima situación económica pola que atravesaba a entidade crediticia, a dispor fraudulentamente de bens da mesma, ocultando ao Consello de Administración e ao Banco de España o importe das súas prexubilacións".

Incluso a querela engade que os xestores das caixas galegas "non tiñan dereito" a cobrar estas prexubilacións, o que se fixo "en menoscabo da entidade crediticia que administraban e do Fondo de Reestruturación Ordenada Bancaria (FROB)". Por todo iso, pide tamén a devolución das cantidades. José Luis Pego deberá devolver 1,5 millóns de euros; Rodríguez Estrada, 260.000; Gorriarán Laza, case 1 millón; e García de Paredes, 5,27 millóns.

García de Paredes debe devolver a NCG máis de 5 millóns de euros

Novagalicia pagou preto de 30 millóns de euros brutos a catro directivos en indemnizacións, tal e como se comunicou á CNMV. Segundo os datos, tres deles recibiron máis de 13 millóns en concepto salarial e case 7 polos plans de pensións.

Dimisión de Mauro Varela

Ademais, e a primeira hora da tarde, coñecíase a dimisión de Mauro Varela, que vén de presentar a súa "dimisión irrevocable" como presidente de Novacaixagalicia logo das declaracións realizadas a pasada semana tras a asemblea xeral da entidade e na que aseguraba que a campaña das preferentes "fora perfectamente legal" e que a xente que as contratara fixérao "sabendo todo o que estaba tomando". Agora, o alto directivo de NCG lamenta que as súas verbas "puidesen ofender" a persoas afectadas.

    Varela comprende que as súas palabras ofendesen "a aqueles angustiados por un problema económico grave"

Nunha carta, Varela lamenta "profundamente" que as súas declaracións "tiveran ofendido a aquelas persoas que estean angustiadas por un problema económico grave". "Comprendo e son consciente que o que dixen doeu; non era esa a miña intención nin é a miña forma de comportarme e actuar", di na misiva, logo de desexar "que o problema teña unha solución satisfactoria".

O xa ex copresidente recoñece que "estes tres últimos anos foron convulsos para as caixas galegas, para a entidade resultante da mesma e, en definitiva, paraa sociedade galega". "Tamén o foron para min", aclara.  

Así, Mauro Varela anunciou su "dimisión irrevocable" como conselleiro xeral de Novacaixagalicia, o que implica a renuncia como membro do Consello de Administración e a presidencia deste.

 

Alberto Núñez Feijóo e Julio Fernández Gayoso © Xunta
Carta de dimisión de Mauro Varela Dominio Público Praza Pública

Despece

  • Jorquera lembra que foron PP e PSOE os que posibilitaron a permanencia dos altos cargos

    O candidato do BNG á presidencia da Xunta, Francisco Jorquera, recorda, tras coñecerse a querela presentada por Anticorrupción, que foi o PP quen reformou a Lei de Caixas, co apoio do PSOE, para así "garantir a continuidade dos máximos órganos de dirección no seu cargo", entre os que se inclúe, xa que logo, toda a asemblea xeral e todo o consello de administración das entidades.

    “O PP consentiu que os máximos directivos das caixas continuasen nos seus cargos despois da fusión, por un prazo de tres anos”, lembra Jorquera, que cre que esa fórmula legal supuxo "un aval" a persoas que, tal e como di o BNG, "agora sabemos, sempre de acordo coa Fiscalía, que supostamente cometeron actos fraudulentos e ilegais que afectaron o patrimonio das caixas”.

    "O importante é dirimir as responsabilidades políticas e constituír a comisión de investigación"

    Para o candidato do BNG, a querela da Fiscalía é positiva, pero recorda que o importante é que se “diriman tamén as responsabilidades políticas”. Nese sentido, aseverou que “é máis importante que nunca” que se constitúa a comisión de investigación no Parlamento galego e que Feijóo prometeu esta fin de semana.

    “Nela quen debe comparecer en primeiro lugar é o presidente da Xunta, Alberto Núñez Feijóo, pola súa obvia responsabilidade na non tutela das caixas de aforro, na súa bancarización e na permanencia de directivos nos seus cargos máis alá do que inicialmente estaba previsto na lexislación”, conclúe Jorquera, que tamén se referiu á dimisión de Mauro Varela, algo que considera "o mínimo" que podía facer tras "terlle faltado ao respecto aos afectados pola estafa das preferentes".

    Francisco Jorquera, candidato do BNG á Xunta CC-BY-NC-SA BNG

  • "Que Mauro Varela se desculpe agora non nos serve de nada"

    A dimsión de Mauro Varela chega tarde e é inútil, segundo varios afectados polas participacións preferentes. "Que se desculpe agora non me serve de nada; que o pensara antes de dicilo", asegura Cristina Fernández, voceira da Plataforma de Afectados polas Preferentes da Mariña. Aínda que poidan ver positiva a renuncia do xa ex presidente de Novacaixagalicia, os "estafados" aínda recordan o "desprezo" que sentiron ao escoitar as palabras nas que aseguraba que contrataran os produtos sabendo perfectamente o que facían.

    "Varela dixo o que pensaba de verdade, así que mellor que o meditase antes"

    "Díxoo de súpeto porque dixo o que pensaba de verdade, así que o mellor era que meditase o que dicía antes de soltalo", engade Cristina Fernández, que lembra que na Mariña, malia que hai ben pouco que os afectados se organizaron, xa contan con 200 persoas na plataforma. Ademais, e xa a título persoal, desconfía de que Mauro Varela aproveitase a polémica polas súas declaracións "para marchar e esquecerse de todo".

    Por outra banda, Antonio Rodríguez, voceiro da Plataforma de Afectados polas Preferentes do Morrazo, non esquece que Varela os chamou "mentireiros" e que "meteu ben a zoca". "Que falen ou se arrepintan agora dunhas declaracións non nos vale de nada; enganáronnos, fomos estafados e o único que nos piden é tempo", aclara o portavoz da agrupación, que reclama "unha solución xa".

    Concentración dos afectados polas preferentes na Coruña CC-BY-NC Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza