O novo Goberno de Portugal anula as privatizacións dos transportes públicos do Porto e Lisboa. O gabinete de António Costa enmarca a decisión na aposta por reforzar as competencias dos concellos e a redución de emisións contaminantes á atmosfera.
Fálase
-
O PP de Santiago acusa o goberno local de "roubar o Nadal" e, de "roubarlles aos nenos a posibilidade de vivir un ambiente tradicional e de ilusión" na cabalgata de reis. O exalcalde Agustín Hernández critica decisións como a celebración dun mercado de Nadal na Praza de Abastos ou a instalación do Belén nunha Igrexa.
Xunta e reitores asinan os convenios que oficializan o novo plan de financiamento universitario. As institucións académicas lembran que o asinan malia veren aspectos mellorables no proxecto, que para Feijóo supón un "fito histórico".
O PP considera que será "unha fraude electoral" se non logra presidir o Congreso nin o Goberno de España. Afirmouno o seu voceiro parlamentario, Rafael Hernando, nunha entrevista na Cadena SER
Xunta e universidades asinan este xoves o novo plan de financiamento. Será o primeiro acto tras as vacacións de Nadal de Feijóo, sen axenda pública dende o pasado día 23 coa excepción da mensaxe de fin de ano.
Pedro Sánchez reúnese este xoves en Lisboa co primeiro ministro portugués, António Costa. Varios xornais de Portugal len o encontro como unha aposta do líder do PSOE por un pacto de esquerdas como o formado polo PS co Bloco de Esquerda e o PCP.
Nove dos trinta autores nominados ao Gran Premio do Festival de Cómic de Angoulême retíranse despois de ver que entre os finalistas non había ningunha muller. O colectivo de creadoras de cómic contra o sexismo lanzara previamente un chamamento a boicotear o premio. A ministra de Cultura de Francia criticou tamén o Festival.
EconomíaDigital analiza as numerosas vitorias xudiciais acumuladas por varias empresas -como Iberdrola, Norvento e EDP- ante a Xunta en relación co sector eólico. As compañías buscan tumbar o canon eólico e o imposto de transmisións patrimoniais que grava os parques.
LaMarea analiza as reaccións da prensa de dereitas ante a Cabalgata de Reis organizada polo Goberno municipal de Madrid, informacións e artigos que para o xornal revelan posicións machistas e racistas. A xornada no twitter estivo dominada polo hashtag #NoTeLoPerdonareJamasCarmena, dedicado a facer burla das críticas conservadoras ao desfile.
Os dous candidatos a presidir a Confederación de Empresarios de Galicia (CEG), José Manuel Pérez Canal e Antonio Dieter, acúsanse de incorrer en "conflito de intereses". Pérez Canal advirte de que o centro de ensino que dirixe Dieter imparte cursos de formación para diversas entidades empresariais. E Dieter alerta dos problemas que se poden derivar de que Pérez Canal dirixa ao mesmo tempo a CEG e a confederación de empresarios de Ourense.