0 Gardados para despois

O leite tamén sabe saír de festa

David ReineroDavid Reinero | @DReinero


Din os organizadores do Festival do Leite que en Galicia hai máis de 400 festas gastronómicas. Pode que sexan moitísimas máis, pero no que atinan é en que o leite non é o protagonista principal de ningunha delas. Así que decidiron acabar con esa aldraxe cara “o produto rei do agro galego”, como o denominan, e reinvidicalo con algo máis festivo que unha tractorada.

O Festival do Leite Galego será un evento musical que se celebrará o sábado 17 de setembro en Santiago e que, co patrocinio de Deleite, desenvolverase ao longo de todo o día no parque de Belvís. A súa sesión vermú correrá a cargo de Os da Ría e Tony Lomba, mentres que xa pola tarde será o momento de Novedades Carminha, Eladio y los Seres Queridos, Familia Caamagno, Ataque Escampe, Los Árboles, Los Chavales e Oh Ayatollah.

Malia os centos de festas gastronómicas de toda Galicia, aínda non existía ningunha co leite como principal protagonista

O festival foi presentado este xoves en Santiago pola xerente de Leite Noso, a sociedade galega propietaria de Deleite, Patricia Sánchez, polo actor Xosé Antonio Touriñán e polo responsable da empresa produtora do evento, Manuel Tarrío. Na súa intervención, Touriñán salientou o espírito familiar que terá o familiar e o seu interese por promover os grupos galegos do mesmo xeito que se impulsa o leito galego. O actor tamén desvelou que a intención dos organizadores é que o festival sexa itinerante e que o ano próximo se celebre en Lugo.

A entrada ao festival será de balde, pero os organizadores piden aos asistentes que leven comida e produtos de primeira necesidade que serán doados á Federación Galega de Bancos de Alimentos, coa que Deleite vén colaborando desde a súa saída ao mercado. Do mesmo xeito, os beneficios que se obteñan das barras e outros produtos que se vendan no festival irá destinado a ONGs que traballan con refuxiados.

O actor Xosé Antonio Touriñán insistiu na necesidade de que toda a sociedade apoie un sector estratéxico da economía galega

O festival, no que haberá un posto no que se poderá degustar leite, chega nun momento en que, logo das intensas mobilizacións dos gandeiros de hai un ano, o prezo que se lle paga aos produtores volveu baixar. Por iso Touriñán insistiu na necesidade de que toda a sociedade apoie un sector estratéxico da economía galega, na que “aínda hai máis de 9.000 explotacións con 360.000 cabezas de gando leiteiro” que producen o 40% do total do leite de toda España.

Deleite Galego, a marca que promove o festival, foi adquirida o pasado setembro no proceso de liquidación de Alimentos Lácteos, o fracasado proxecto impulsado polo PP, por Leite Noso, unha sociedade formada por unha trintena de gandeiros. Segundo eles mesmos salientan, “esta é a primeira vez en Galicia en que os gandeiros asumen de xeito directo o reto de comercializar o seu leite, sen intermediación dunha industria”. Fano desde hai tres meses coa marca Deleite a través de envases dun litro de leite enteiro, semidesnatado e desnatado nos establecementos de Vegalsa-Eroski, Carrefour, Alcampo, El Corte Inglés, Grupo Cuevas e Le Clerc.

Coa túa achega fas posible que sigamos publicando novas coma esta.