O TSXG vén de ditar unha sentenza que condena o SERGAS a indemnizar unha familia de Ourense con 400.000 euros por unha mala praxe na detección no feto dunha alteración cromosómica deleción (perda dun segmento cromosómico) 3p25. O erro na amniocentese privou os proxenitores da información sobre este grave problema, que provoca un atraso mental severo, impedíndolles decidir se querían interromper o embarazo. O proceso xudicial foi levado a cabo polos servizos xurídicos da asociación El Defensor del Paciente en Galicia.

O neno necesitará estar sometido de por vida a continuas terapias e tratamentos, precisando a axuda permanente de terceiras persoas, debido aos graves problemas de mobilidade que sofre

En consecuencia, o embarazo proseguiu, nacendo en 2007 no Hospital Universitario de Ourense un neno, ao que aos poucos meses, tras insistentes consultas realizadas pola súa familia, foille diagnosticado en Santiago de Compostela un atraso mental severo, que previamente fora negado no Hospital de Ourense, argumentando que o neno “evolucionaría” e que tiña que crecer. O neno necesitará estar sometido de por vida a continuas terapias e tratamentos, precisando a axuda permanente de terceiras persoas, debido aos graves problemas de mobilidade que sofre.

A sentenza é firme, salientando que nestes casos de mala praxe pola non detección de anomalías cromosómicas se procede a indemnizar o dano moral aos pais e ao neno pola alteración substancial da súa vida en todos os aspectos que xera nacer cun atraso mental severo. "É lóxico pensar que os gastos derivados da crianza dos fillos non constitúen un dano en circunstancias normais; pero estas non o son", sinala. Por iso a Sala tamén indemniza a lesión puramente económica, "xa que cando as circunstancias se separan do normal implicando unha carga económica moi superior á ordinaria, esta Sala entende que pode haber dano e proceder a indemnización". A indemnización non se basea "na reparación integral do dano, o que se daría noutros supostos" senón que aplica "a teoría da perda de oportunidade de poder interromper o embarazo conforme á lei" polo que a indemnización é inferior a outros supostos nos que a mala praxe provén do acto médico ou hospitalario.

O xuíz atendeu aos argumentos presentados polo avogado da asociación El Defensor del Paciente, entendendo que a enfermidade "non a crea o acto médico e a actuación dilixente do médico", quen non podería evitar a enfermidade, pois se trata dunha patoloxía que afecta o feto desde o momento mesmo da concepción, non tendo curación. O único que ten que facer a Administración sanitaria é detectala e informar os pais da devandita circunstancia. Neste caso practicóuselle unha amniocentese diagnóstica para saber o cariotipo fetal no segundo trimestre de xestación, ofrecendo o informe citoxenético, datado o 15 de novembro de 2006, e emitido por un laboratorio externo ao SERGAS, un cariotipo masculino normal fetal, excluíndo anomalías cromosómicas visibles.

A familia foi privada do dereito a poder elixir interromper o embarazo conforme á lei

En consecuencia, a familia foi privada do dereito a poder elixir, sinalando a sentenza que "esta perda da oportunidade de elixir non só se produce cando a proba destinada a detectar esta anomalía xenética non se realizou debendo facelo, senón tamén cando a pesar da súa práctica non se detectou a anomalía existente por unha mala praxe na proba de amniocentese, que é o que agora ocorreu".