O primeiro gran incendio do verán arrasa máis de 1.400 hectáreas en Verín

Vista do incendio, nunha imaxe tomada por bombeiros forestais Dominio Público Brif Laza

Outra volta, Ourense. A provincia máis atinxida polo lume practicamente cada verán volve estar no centro da loita contra as lapas. O incendio que, declarado este xoves, comezou cunha superficie estimada "dunhas 20 hectáreas" na parroquia verinesa de Vilamaior, segundo datos da Consellería de Medio Rural, disparouse en poucas horas. A media tarde foi decretada na zona a situación 2, que implica risco para vivendas, pola proximidade do incendio ao núcleo de Queirugás. Ás 8 da tarde a estimación oficial da superficie afectada estaba por riba das 40 hectáreas e contra as 10 da noite disparárase alén das 500. Neste venres as cifras oficiais indicaron que arderan case 1.400 hectáreas nun incendio afectou os concellos de Verín e Vilardevós e que a Xunta dá por feito que foi intencionado. Xa ao mediodía, desde a Administración galega dábase por estabilizado aínda que non controlado aínda, desactivándose xa a situación 2 de emerxencia. 

Inicio do incendio / Brif Laza

Como adoito, a dimensión pública do incendio transcendeu as localidades máis afectadas cando as lapas chegaron a grandes vías de comunicación. Non en van, o forte vento fíxoas avanzar moi rápido ata a obrigar ao corte da autovía das Rías Baixas (A-52) na contorna de Queirugás e tamén a estrada convencional N-525. Un vídeo gravado dende o seu vehículo polos membros do grupo musical Amparanoia, que viaxaba cara ao festival Sonrías Baixas de Bueu, amosa a virulencia do incendio.

As lapas na A-52, no vídeo gravado polo grupo Amparanoia

Segundo a información difundida por Medio Rural na tarde do xoves no momento de declarar a situación 2 estaban a traballar na extinción do incendio de verín 22 brigadas, 10 motobombas, 12 helicópteros e catro avións. Ademais dos medios da Xunta incorporáronse ao combate do incendio membros da Brif de Laza, pertencentes ao Ministerio de Medio Ambiente, e efectivos da Unidade Militar de Emerxencia. 

A extinción do incendio de Verín continuou durante a noite pero sen medios aéreos, que como adoito tiveron que retirarse ao ficar sen luz solar. Estes efectivos contra incendios actúan dende o aire na zona dende pouco despois das oito e media da mañá deste venres. Esta é a situación que atoparon os membros da Brif de Laza ao chegaren á zona.

Estado do incendio este venres pola mañá

Desde a mañá deste venres, empezáronse a restablecer os servizos de luz e auga que quedaran suspendidos nas zonas afectadas por un incendio que comezou en Vilamaior de Val e se achegou a unha área cun medio cento de vivendas, aínda que nos casos máis graves acabou por alcanzar só o cerrume de dúas casas. O feito de que as lapas comezasen nun lugar onde hai unha semana se iniciara outro lume fortalece a hipótese de que fose intencionado. A conselleira Vázquez insistía na "intencionalidade" ao iniciarse o lume nunha zona "onde non era a primeira vez que había un foco". 

A titular de Medio Rural asegurou que o rápido movemento do vento e a "sequía extrema" foron factores claves na propagación do lume nunha zona que leva "moitos meses sen chuvia". En canto aos danos, Ángeles Vázquez lamentou a "gran riqueza forestal" queimada, ao afectar montes repoboados en 2005 e 2009 e moreas de piñeiros e castiñeiros calcinados. Ademais, arderon moitos pastos e colmeas, aínda que non houbo danos persoais e ningún veciño tivo que ser finalmente desaloxado da súa vivenda. 

O incendio arrasou áreas de "gran riqueza forestal", montes de piñeiros e castiñeiros repoboados en 2005 e 2009

Desde a comarca, o fastío é evidente entre a poboación. En Vilardevós, unha veciña que xa sufriu incendios na súa parroquia e agora ve desde a casa os das localidades veciñas, reflexiona: "É unha sangría todos os anos; levo xa moito tempo vendo isto, pero seguimos igual: gastan os cartos en apagar o lume pero aquí non hai prevención ningunha durante todo o ano". 

O alcalde de Verían quéixase da falta de medios de "intervención rápida" mentres a conselleira di que houbo unha "rápida resposta"

E unha vez máis, as visións son ben diferentes segundo a proximidade ao lume das administracións. O alcalde de Verín, Gerardo Seoane, queixouse da falta de medios de "intervención rápida" cos que, segundo el, podería terse "atallado" o incendio cando "era pequeno" e evitar así a súa propagación. "Está claro que a vixilancia non funciona. É conveniente pensar nalgún sistema de intervención inmediata para que o lume non se propague porque despois é incontrolable", dixo. 

Pola súa banda, a conselleira do Medio Rural, Ángeles Vázquez, asegurou que houbo unha "rápida resposta" e que o operativo foi despregado en só "oito minutos" tras o aviso de incendio.

 

Outras 300 hectáreas coñecidas en semanas previas

Como é habitual, a información a respecto do incendio de Verín comezou a fluír máis rapidamente a través das redes sociais da man de bombeiros e axentes forestais que actúan na zona que dende Medio Rural. Neste caso, así e todo, o Goberno galego si ofrece datos porque o incendio responde aos criterios que segundo a política vixente dende 2009 deben levar a informar a prensa e a poboación en xeral, isto é, máis de 20 hectáreas e ademais, risco para zonas habitadas. Está prevista, ademais, unha comparecencia ante a prensa en Santiago da conselleira Ángeles Vázquez para a mañá deste venres, na que informará do operativo tras visitar a zona afectada durante a noite.

Os escasos comunidados difundidos durante as últimas semanas por Medio Rural referíronse, case na súa totalidade, a outros incendios na provincia de Ourense. Así, dous que afectaron a Monterrei e outro en Vilamartín de Valdeorras sumaron dende finais de xullo unhas 300 hectáreas. Mentres, xa na provincia de Lugo, pero moi preto de Ourense, o Goberno comunicou nas últimas semanas un único incendio de 20,57 hectáreas en Pantón.

Precisamente, na tarde deste venres, declarouse outro incendio que afectou unhas 35 hectáreas e do que anunciou a Xunta. Iniciouse na parroquia de Araúxo, en Lobios, dentro da Serra do Xurés e moi preto da fronteira con Portugal. Os equipos de extinción desprazáronse ata a zona a primeiras horas da tarde, tal e como relata o BRIF de Laza neste vídeo. Quedou estabilizado a últimas horas da tarde. 

Incendio na parroquia de Araúxo, en Lobios (Ourense)

Ademais, outros dous incendios que superaron cadansúas 20 hectáreas queimadas declaráronse no concello lugués de Pantón e no de Xinzo, tamén durante a tarde deste venres. Foi, concretamente, na parroquia de Toldaos do muncipio lucense e na de Damil, no de Ourense.  

Despece

  • En Marea e BNG piden máis e mellores medios contra os incendios

    En Marea e BNG reaccionaron a outro novo grande incendio na provincia de Ourense esixindo explicacións á Xunta e reclamando máis medios e eficacia nos dispositivos de prevención e extinción.

    En Marea rexistrou varias preguntas no Parlamento sobre a escasa efectividade do dispositivo contraincendios

    Así, os deputados de En Marea Davide Rodríguez e Paula Quinteiro rexistraron este venres no Parlamento varias preguntas para ser respondidas en Comisión sobre os devanditos dispositivos. Lembran que a actividade incendiaria en Galiza é a máis alta de todo o Estado: "Ata o ano 2005 houbo arredor de 10.000 incendios, cunha superficie media afectada por incendio de 2,7 hectáreas, o que demostra a altísima eficiencia do dispositivo público. A partir dese ano, a actividade incendiaria redúcese, pero curiosamente aumenta a superficie queimada por lume". 

    Para En Marea, a atomización do dispositivo do Servizo de Prevención e Defensa contra Incendios Forestais (Spdifc) e a súa perda de efectivos en detrimento de firmas privadas "redunda nunha peor eficacia do mesmo". "Tamén inflúen a evolución climática, a diminución da capacidade de extinción dos medios aéreos ou a redución da capacidade de vixilancia ao pecharse máis do 50% dos puntos de vixilancia, deixando moitas veces que sexa o 085 o único elemento de información sobre lumes para o dispositivo", destacan, unha perda de efectividade contra o lume que cren "preocupante". 

    Ademais da petición de melloras en todos estes aspectos, os deputados reclaman tamén que se aumente a contratación dos traballadores que están empregados de 3 a 9 meses, "favorecendo un labor digno e apostando pola prevención máis que pola extinción de incendios".

    Pola súa banda, desde o BNG, a deputada Noa Presas solicita que a Xunta dispoña "de xeito inmediato de máis medios para loitar contra os incendios na provincia ourensá". A parlamentaria advirte contra un “agosto negro” en Ourense e lembra que o Bloque reclamou máis medios hai apenas uns días alertando do que podía pasar.

    O BNG pide "máis medios de inmediato" en Ourense e advirte dun "agosto negro"

    “Quero transmitir o apoio a todas as persoas afectadas polo lume nos concellos de Verín e de Vilardevós, e o noso agradecemento a todas as persoas que están participando nas brigadas de extinción do lume que están a facer un traballo ímprobo para acabar co incendio que é o que toca agora mesmo”, salientou Presas.

    Brigadistas de Medio Rural, coas súas fundas de traballo © Xunta

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza