0 Gardados para despois

Julia Otero defende "a educación e as mobilizacións" contra os ataques á liberdade de prensa

Redacción | @prazapublica

Ferrol volve acoller este xoves os actos de entrega do Premio José Couso de Liberdade de Prensa, organizado polo Colexio Profesional de Xornalistas de Galicia (CPXG) e o Club de Prensa de Ferrol, que chega á súa 14ª edición. A xornalista monfortina Julia Otero foi a escollida este ano, vendo recoñecida unha longa e sólida traxectoria na televisión e sobre todo na radio. 

Julia Otero avogou pola "educación, a formación, e as mobilizacións que fan que se removan as cousas" para combater o recorte de dereitos

Otero participou esta tarde nunha recepción institucional no Concello de Ferrol, antes de asistir á tradicional ofrenda floral na estatua Ás Ceibes, do escultor Manuel Patinha, onde a xornalista Marta Corral foi a encargada de ler un texto. A premiada destacou que o galardón ten "prestixio nacional e internacional" e que significa unha "responsabilidade, polo nome que ten e polo compromiso moral que leva consigo". Ademais, a xornalista declarou sentirse "emocionada", por unha mensaxe da irmá de José Couso que lle dicía que a súa nai estaba feliz por saber que o premio ía para ela.

A preguntas dos xornalistas, Otero recoñeceuse "moderadamente optimista" fronte á "cuarta vaga do feminismo" que estamos a vivir, e confiou en que sirva para ver máis mulleres en postos de responsabilidade nos medios. En canto á liberdade de prensa, mostrou menos confianza, ao afirmar que "non estamos nun bo momento, o mundo avanza nun sentido preocupante, vaise en contra das liberdades". Fronte a isto, avogou pola "educación, a formación, e as mobilizacións que fan que se removan as cousas" para combater o recorte de dereitos.

O manifesto do Colexio de Xornalistas, redactado por Xosé María Palmeiro, o seu primeiro decano, reivindica o oficio de "informar e servir á cidadanía"

A partir das sete da tarde, o Teatro Jofre acolle o acto de entrega do galardón, conducido pola xornalista Almudena Marcos. No acto vai darse lectura ao manifesto do Colexio Profesional de Xornalistas de Galicia con motivo do Día Internacional da Liberdade de Prensa, redactado polo primeiro decano do Colexio, Xosé María García Palmeiro, que reivindica o oficio de "informar e servir á cidadanía, titular e depositaria dos dereitos e das liberdades imprescindibles para o cabal funcionamento dunha sociedade libre e democrática" fronte ás incertezas dunha "profesión case sempre marcada pola urxencia e tamén, xaora, pola precariedade".

Día da Liberdade de Prensa 2018

Coa túa achega fas posible que sigamos publicando novas coma esta.

Lanzan manifesto de apoio ao Festigal tralos ataques recibidos por mor do convite a Valtonyc

"Reivindicamos e defendemos o Festigal como festa e exhibición da liberdade de expresión e da diversidade, e manifestamos o noso compromiso de parte da Democracia, da Liberdade, da Dignidade e da Galiza". Vén de lanzarse o Manifesto pola Liberdade Artística e de Expresión, impulsado pola comisión do Festigal -integrada por Galiza Nova e a Fundación Galiza Sempre- artistas e axentes do sector musical galego, en resposta aos ataques e críticas recibidas polo festival despois de anunciar unha actuación do rapeiro Valtonyc, condenado a 3 anos e medio de cárcere polas súas letras.

Despois de que o Festigal anunciase que autor catalán estaría en Compostela en xullo (en caso de que nese momento aínda non ingresara en prisión), o Sindicato Unificado de Policía (SUP) pediu a suspensión do concerto. A resposta do festival foi contundente: "Ao sindicato policial SUP, que saíu publicamente atacar o Festigal por este motivo, e á Subdelegación do Goberno español dicímoslles que o Festigal se vai celebrar, non nos van calar e vannos ter enfronte sempre na defensa da democracia, da liberdade, da dignidade e da Galiza".

"Ao sindicato policial SUP dicímoslles que o Festigal se vai celebrar, non nos van calar e vannos ter enfronte sempre na defensa da democracia"

Unha posición que reafirma o manifesto, asinado xa por unha trintena de artistas e profesionais: "Expresamos o noso rexeitamento á involución democrática no Estado español que tamén se materializa aquí, na Galiza, e á utilización política a xustiza para aplicar a censura a todo tipo de manifestacións, artísticas e políticas, que son incómodas para sistema".

Na rolda de prensa celebrada este xoves, Jasper (vocalista e guitarra de Nao) en representación das artistas afirmou amosar “a preocupación dos compañeiros do gremio pola falta de liberdade, polos ataques continuos que hai por parte do Goberno central á liberdade de expresión, á liberdade de creación con todos estes xuízos que non rematan de ser xuízos políticos e que abranguen desde secuestros a libros, feche de exposicións en que aparecen fotos de presos políticos cataláns, como censura de cancións como sinalar co dedo determinadas bandas e grupos como se facía na Alemaña nazi cos xudeus e como se fai neste caso en Compostela co Festigal, sinalado porque apoia o rapeiro Valtonyc e denuncia coa súa contratación esta falta de liberdade e estes encarcelamentos políticos que estamos a sufrir por parte do Estado".

Lucía López Sobrado: "Imos manter Valtonyc no cartaz do Festigal e, se está libre, actuará como está previsto o 24 de xullo no Festigal. Ao sindicato policial SUP que saíu publicamente atacar o Festigal por este motivo e á Subdelegación do Goberno español dicímoslles que o Festigal se vai celebrar, non nos van calar e vannos ter enfronte sempre na defensa da democracia, da liberdade, da dignidade e da Galiza".

Jasper (Somos Nao): "Quero mostrar a preocupación dos compañeiros do gremio pola falta de liberdade, polos ataques continuos que hai por parte do Goberno central á liberdade de expresión (...) como se fai neste caso en Compostela co Festigal, sinalando porque apoia o rapeiro Valtonyc e denuncia coa súa contratación esta falta de liberdade e estes encarcelamentos políticos que estamos a sufrir por parte do Estado".