0 Gardados para despois

Máis de mil nenos e nenas de catro parroquias viguesas quedan sen pediatra

Redacción | @prazapublica

O pasado mes de maio o Centro de Saúde de Coruxo, en Vigo, quedou definitivamente sen pediatra. O centro dá servizo ás parroquias de Saiáns, Oia e Comesaña, ademais de Coruxo, que suman máis de 13 mil habitantes, e entre eles 1.050 nenos e nenas. En abril a pediatra do centro xubilouse, aínda que unha substituta ocupou o seu posto durante o o seu período vacacional, que remataba o 27 de maio. As protestas veciñais obrigaron o SERGAS a estender esta substitución uns días máis do previsto, e así vén facendo dende entón, renovando semana a semana este contrato. Porén, a falta de seguridade na continuidade da praza fai que moitos pais e nais usuarias do centro non poidan xa solicitar citas para os seus fillos e fillas para as vindeiras semanas.

"Defendemos a necesidade de contar co servizo de pediatría dentro do Centro de Saúde de Coruxo para dar resposta ás necesidades dunha das áreas máis anovadas en idade do Concello"

Este martes pola mañá a Asociación de Veciños de Coruxo levou a cabo unha concentración ante o Centro de Saúde apoiada polas Asociacións de Veciños de San Miguel de Oia e Saiáns. "Defendemos a necesidade de contar co servizo de pediatría dentro do Centro de Saúde de Coruxo para dar resposta ás necesidades dunha das áreas máis anovadas en idade do Concello e que cubre, xa de por si, unha zona grande abondo como para ter conta da súa importancia", salienta a entidade que xa na pasada semana remitiu un escrito á Valedora do Pobo.

Esta asociación solicitou unha reunión con responsables da Xerencia da Área Sanitaria de Vigo, que lle deu a entender "que o peche deste servizo era unha decisión firme e inminente". O SERGAS aínda non confirmou se o servizo de Pediatría desaparecerá deste centro para ser trasladado a Navia, onde xa traballan tres pediatras, co obxectivo de que esta centralización facilite as substitucións, vacacións e permisos entre estes e estas profesionais.

"A área sur de Vigo é unha zona de carácter periférico e semi-rural que conta con conexións de transporte público máis limitadas ca no centro da cidade. Por isto, o traslado do servizo ao Centro de Saúde de Navia implicaría grandes dificultades"

Os veciños e veciñas denuncian que "a área sur de Vigo é unha zona de carácter periférico e semi-rural que conta con conexións de transporte público máis limitadas ca no centro da cidade. Por isto, o traslado do servizo ao Centro de Saúde de Navia implicaría grandes dificultades para os residentes en Oia e Saiáns, que non terían un transporte urbano directo cando na actualidade poden chegar en menos de 10 minutos coa liña 11 de autobús". "Este problema é especialmente preocupante a nivel de conciliación familiar, posto que en moitos casos son as avoas e avós os encargados de levar ás rapazas e rapaces ao centro de saúde, non dispondo estes maioritariamente de transporte privado", engaden.

 

Coa túa achega fas posible que sigamos publicando novas coma esta.

Seis concentracións renovan este mércores a denuncia do "desmantelamento" da sanidade pública

O pasado 4 de febreiro unha masiva manifestación denunciou en Compostela o "desmantelamento" das áreas sanitarias, o "colapso" e a "privatización" no Sergas e o efecto dos "recortes" introducidos polo Goberno galego. A mobilización impulsada pola plataforma SOS Sanidade Pública, sindicatos, entidades sociais e de pacientes sanitarios mantense moi activa nos últimos meses, sobre todo nas áreas de Lemos, A Mariña e O Salnés, e tamén en cidades como Vigo. Este mércores seis novas concentracións volverán protestar "contra a privatización e desmantelamento da Sanidade Pública".

As convocatorias fan fincapé na "estratexia" do Goberno de Núñez Feijóo "que pasa por poñer a sanidade pública galega en mans de empresas privadas multinacionais". Manuel Martín, voceiro de SOS Sanidade Pública, denuncia que "xunto cos recortes emprendidos polo goberno de Feijóo" puxéronse en marcha "un conxunto de medidas destinadas a favorecer a multinacionais e persoas afíns". Medidas que "supuxeron a desviación de cartos públicos que debían ter sido destinados a financiar a sanidade pública e que provocaron un incremento da corrupción”.

Martín explica que que ata agora o papel dos centros privados "tiña un carácter complementario e subsidiario e que con eles se concertaban patoloxías menores como cataratas ou varices co obxectivo de alixeirar as listas de espera". Porén, denuncia que co novo modelo "pásase a concertar con empresas privadas, por un período de catro anos actividades de consulta, cirurxía, probas diagnósticas e terapéuticas e mesmo hemodiálise". Un transvase de actividade asistencia que ascende, no caso da Coruña, a un total de 97,5 millóns de euros, subliña, "co agravante de que o persoal facultativo público deberá ir a estes centros privados", engade. "Isto supón a privatización da bata branca, que Feijóo dixo que nunca faría”, conclúe, e "enormes beneficios" para o negocio de empresas sanitarias privadas como Quirón, HM Hospitais ou, no caso da Coruña, o Hospital San Rafael.

As seis concentracións terán lugar ás 20 horas baixo o lema "Acabemos coa corrupción sanitaria do PP".

  • A Mariña: diante do Hospital da Costa
  • A Coruña: no Obelisco
  • Santiago: Praza do Toural (20:30 horas)
  • Barbanza: Praza do Concello de Ribeira
  • Pontevedra: na Peregrina
  • Vigo: Fronte ao Marco (Rúa Príncipe)