Alumnos e alumnas de centros de ensino de Salvaterrra do Miño e Monçao realizarán este luns 13 de abril unha cadea humana sobre a ponte que une as dúas localidades, nunha acción organizada por Ponte... nas ondas! en conmemoración, precisamente dos 20 anos da inauguración da ponte internacional João Verde-Amador Saavedra.

A xornada comezará ás 10.30 horas co inicio da cadea humana. Ao son da canción Máis perto (composta por Uxía e Segundo Grandío para Meniños Cantores) os mozos e mozas das dúas beiras uniranse e soltarán globos coa lema “Un Patrimonio para o futuro", no que lembrarán a iniciativa das escolas de Galicia e do Norte de Portugal para a inscrición do patrimonio inmaterial galego-portugués na Lista Representativa da UNESCO. Haberá tamén xogos infantís e un concerto a cargo de Magín Blanco. En 2007 a Asociación Ponte... Nas Ondas! realizara un vídeo, no que 2.000 mozos e mozas pedían sobre as pontes do Miño unha nova oportunidade para a Candidatura de Patrimonio Inmaterial Galego-Portugués.

Hai uns meses a Asociación embarcouse nun novo intento para que o patrimonio inmaterial galego-portugués sexa recoñecido pola Unesco, despois de que hai dez anos a proposta non fose aceptada, en parte polo limitado apoio do Goberno portugués á proposta. Santiago Veloso, responsable da iniciativa, expresou a súa confianza en que desta volta a cultura galego-portuguesa si acade esta distinción.

O pasado 28 de marzo Salvaterra do Miño e Monção celebraron oficialmente o vinte aniversario da inauguración da ponte internacional entre as dúas vilas. Tamén Ponte…nas Ondas! celebrou nesas datas os seus vinte anos cunha emisión radiofónica especial.