Despece

• Yolanda Díaz: "O TTIP sanciona a morte dos dereitos do pobo para proclamar unha longa vida aos beneficios empresariais"

  Por Ramón Varela

  A coordinadora xeral de EU en Galicia, Yolanda Díaz, é avogada e deputada autonómica do grupo de AGE. Dende a súa perspectiva, o TTIP beneficia a poucos e prexudica á gran maioría, pero fronte á presión dos grupos de poder para impoñelo aínda hai esperanza e dúas claves a nivel social: información e mobilización.

  Son o TTIP e outros tratados similares a última fronteira da globalización do capitalismo?

  Son a nova tentativa dun proxecto vello, que xa tentaron impor nos anos noventa, o chamado entón AMI (Acordo Multilateral de Investimentos), unha sorte de ditadura perpetua do capital sobre as persoas, os recursos e a democracia. Esa última fronteira da globalización capitalista resulta incompatible coa vida humana vivida en condicións de dignidade.

  Liberalización total a nivel económico e comercial é igual a mellora na calidade de vida como afirman os defensores do tratado?

  Esa liberalización, que non é outra cousa que unha regulamentación a prol do capital, constitúe a vía directa e rápida ao empobrecemento da cidadanía traballadora nos Estados europeos, en particular nos do Sur; vía directa e rápida para afianzar o secuestro da democracia, entendida como réximen social onde as persoas decidimos sobre o conxunto de aspectos fundamentais para nós, da economía á cultura. Sen capacidade para decidir sobre as condicións de traballo, os dereitos sociais, o modo de producir e de consumo, sen a posibilidade de desmercantilizar os aspectos clave da vida social, o que queda é o hipódromo na Bizancio da tardoantigüidade, a aposta desarticulada polos azuis ou polos verdes, pero a impotencia respecto das decisión do emperador.

  "Está en xogo a nosa vida e a democracia, o réxime social que permite vivir unha existencia autónoma, propia"

  Que está en xogo para a cidadanía europea coa aprobación de tratados de libre comercio como o TTIP?

  A nosa vida e a democracia, que é o réxime social que permite vivir unha existencia autónoma, propia. Razonar a negativa a ese complexo de tratados é soster a nosa dignidade como persoas que se negan a reducirse a mercadorías que se intercambian sen piedade nun mercado oligopólico.

  Que razóns concretas hai para opoñerse ao TTIP?

  Resúmocho nun decálogo as agresións que provoca o TTIP: destrúe a democracia e a soberanía estatal, entendidas como elementos de defensa da cidadanía respeito dos poderes antidemocráticos da internacional do capitalismo e o seu profeta, a troika; avoga pola privatización e erosión dos servizos públicos reducidos a meros negocios para as grandes empresas; causa inseguridade alimentaria ao eliminar o principio de precaución (caso dos transxénicos) para que as multinacionais fagan cartos usándonos de cobaias; socava aos xa febles dereitos laborais e sociais, ao limitar os dereitos de folga, sindicación e negociación colectiva, quérennos escravos!; pula pola mercantilización da sáude, poñendo trabas aos xenéricose facilitando os beneficios das multinacionais farmacéuticas; garante novas depredacións sobre o noso medio físico e sobre a agricultura tradicional e ecolóxica ao primar os beneficios económicos das grandes corporacións agroindustriais; ríndese as grandes petroleiras ao apostar polo consumo de enerxías contaminantes, autorizando tecnoloxías tan agresivas como o fracking; instaura un réxime financiero opaco e propio dos paraísos fiscais para os grandes capitais; desnuda os nosos datos persoais para que as corporacións empresariais saiban e poidan facer negocios sobre a nosa vida no entanto que se acorda este marco legal da tiranía do mercado sen transparencia e participación do soberano, do pobo.

  "O TTIP beneficia aos amos do mundo, aos xinetes da apocalipse capitalista"

  En definitiva, a quen beneficia o TTIP?

  Aos amos do mundo, aos que todos os anos se reúnen, blindados e ateigados de riquezas, para decretar austeridades e recortes para a maioría social: os de Mont Pelerin, Davos, Bildelberg, a Trilateral, … os xinetes da apocalipse capitalista. Beneficia a tan poucos pero agrede a tantísimos…

  Dende que punto de vista pode entenderse o secretismo, a opacidade e a ocultación informativa coa que se levaron as negociacións do TTIP dende os seus inicios? Cal é a razón de semellante falta de transparencia na esfera pública?

  A violencia material do tratado é de tamaña magnitude que precisa da ocultación para evitar unha resposta da xente do común como que a tumbou nos anos noventa o AMI. O escándalo é a obsecuencia coa que as elites políticas do bipartidismo (incluídas as expresións políticas das burguesías vasca e catalana) aceptan un tratado que clausura a vida democrática e os dereitos económicos, sociais e culturais da nosa cidadanía.

  Pode considerarse lexítimo un acordo internacional fraguado á marxe da cidadanía e que defende a creación de estruturas antidemocráticas como o mecanismo de arbitraxe de diferenzas investidor-estado (ISDS) ou o procedemento de converxencia regulamentaria?

  Claro que non, non é lexítimo ese despotismo do capital que impoñen as cláusulas do Tratado, pero é o corolario dunha UE e duns Estados europeos que abdicaron de defender a súa xente para contentar a un fato de cobizosos. Todo o proceso adoece de lexitimidade e apenas sostén unha casca legal antagónica ás necesidades reais da xente traballadora.

  O TTIP foi definido reiteradamente como "un perigo democrático, social e ecolóxico" e máis de dous millóns de europeos e europeas asinaron en contra da súa aprobación. Por qué o apoio obcecado de formacións políticas como PP, CIU, UPyD, Ciudadanos ou a postura ambivalente do PSOE neste sentido?

  Teríano que explicar pero a degradación deste réxime dá conta do alonxamento desas elites políticas respeito da cidadanía. O berro do 15 M: “non nos representan” alude precisamente a uns sedicentes representantes do pobo que serven ás grandes corporacións económicas capitalistas, que a súa vez os retribúen con espléndidos e inanes empregos nos consellos de administración ou directamente con achegas en B. Eu entendo que só a existencia dun circuito espurio entre grandes empresas e direccións dos partidos do réxime explican esa traición aos dereitos do pobo.

  "O Tratado sanciona a morte dos dereitos do pobo para proclamar unha longa vida aos beneficios empresariais"

  Nun acordo de libre comercio como o TTIP, que permite a toma de decisións á marxe dos parlamentos estatais, onde quedan os dereitos da cidadanía?

  O Tratado sanciona a morte dos dereitos do pobo para proclamar unha longa vida aos beneficios empresariais. Cómpre ser consciente do que está en xogo para dar unha resposta social, sindical e política á altura do envite. Razoa Boaventura de Sousa, na súa Décima carta ás esquerdas, o antagonismo central do noso tempo, a loita entre capitalismo e democracia, para sinalar que a profundización democrática pasa pola derrota das forzas partidarias do capitalismo e como debe prevalecer nese conflicto a democracia real sobre os beneficios das grandes corporacións capitalistas.

  Cales cres que son as claves para parar o TTIP?

  Información e mobilización. As redes sociais son decisivas para bloquear unha regresión de carácter civilizatorio. O Partido da Esquerda Europea traballa nesa tarefa. O capital acolle calquer euro, sexa do narcotráfico ou da trata e esclavitude sexual das mulleres e menores, pero non deixa pasar, afoga nos diversos Mediterráneos do mundo a milleiros de seres humanos. Non hai diñeiro ilegal, pero si converten en tal as persoas. Semellante iniquidade demanda de todas e todos nós un pequeno esforzo compartido para preservar a posibilidade dun mundo con xustiza social e Igualdade real.