0 Gardados para despois

A Coruña gastou 2,2 millóns de euros en subvencionar as touradas nos últimos 20 anos

Redacción | @prazapublica

O Concello da Coruña gastou 2,2 millóns de euros na subvención pública das touradas nos últimos vinte anos. O goberno local da cidade vén de facer públicos as cifras oficiais dos gastos que a feira taurina supuxo nas últimas dúas décadas e logo de que o IMCE (Instituto Municipal Coruña Espectáculos) decidise suspender o contrato "por razóns de interese público". 

O Concello gastou máis de 2,2 millóns en subvencionar as touradas entre 1995 e 2014, segundo os datos oficiais

Así, e segundo os datos do devandito IMCE, as touradas -que tiñan lugar no Coliseum, o que obrigaba tamén a que o recinto fose acondicionado especialmente para elas- xerou un gasto de 2.223.200,78 euros nos últimos vinte anos, tendo en conta os custos dos contratos de organización e outros gastos de tipo xurídico, como unha indemnización pola caída dun espectador ou pola adxudicación dun contrato en 2005.

Ademais, entre os gastos a maiores do contrato de organización da feira -que durante o mandato de Francisco Vázquez nunca baixou de 93.000 euros-, inclúense outros máis rechamantes como os máis de 12.000 euros para as conferencias taurinas co gallo do décimo aniversario dos festexos, os 600 euros de aloxamento e manutención a un pregoeiro, os máis de 400 pola redacción dun "pregón taurino" ou os 2.353 que supuxo a lectura doutro pregón en 2007.

Entre os gastos inclúense máis de 2.300 euros por un "pregón taurino" en 2007 ou máis de 400 pola redacción doutro

"O custo que supuña para un organismo público dependente do Concello esta actividade, así como a escasa afluencia de público en cada edición, foron dúas razóns de peso que impulsaron ao Goberno local a rescindir o contrato coa empresa promotora. Ademais, tamén existía a promesa política de non ceder espazos públicos nin financiar espectáculos nos que se maltraten animais", aclara o executivo local da Marea Atlántica, que lembra que este ano, de terse celebrado, a feira taurina traería aparellado un custo aproximado de 60.000 euros. Coa suspensión, e co pagamento duns 10.000 euros de indemnización aos organizadores, o Concello espera obter un aforro de 50.000 euros. 

A administración local aforra 50.000 euros coa retirada da subvención e a non celebración das touradas xa este ano

Nada máis chegar ao goberno, a Marea Atlántica iniciou o expediente de extinción anticipada do contrato e suspensión da feira taurina. O alcalde da Coruña, Xulio Ferreiro, indicara daquela que o Concello “non ten capacidade para prohibir unha actividade como esta, pero si que a ten para ceder ou non o Coliseum para este tipo de espectáculos”.

Tal e ocmo lembra o executivo local, ao longo dos últimos 20 anos, tan só en cinco ocasións os gastos que asumiu o IMCE con respecto á feira taurina baixaron dos 100.000 euros por edición. En concreto, a media anual de gasto en subvención ás touradas ascende a máis de 110.000 euros, aínda que os cartos foron moitos máis na época do goberno do PSOE de Francisco Vázquez, que chegou a gastar máis de 130.000 euros públicos nalgunha edición. Coa chegada de Carlos Negreira (PP) ao poder, a subvención seguiu, aínda que desta vez sufragando os gastos do acondicionamento do Coliseum, unha cantidade que foi desde os 32.000 até os 41.000 euros aproximadamente, dependendo do exercicio. 

Segundo datos de Galicia Mellor sen Touradas, e incluíndo tamén os gastos do Concello nas touradas entre 1991 e 1994, a subvención total municipal achegaríase aos 3 millóns de euros. 

A media anual de gasto público foi de 110.000 euros, aínda que as maiores cantidades corresponden ao goberno de Francisco Vázquez

 

"Nin un euro para o maltrato animal"

A Marea Atlántica sempre sostivo que a supresión das touradas na cidade era un punto "innegociable" do seu programa: "Nin un euro do concello, nin un metro cadrado de bens municipais para o maltrato animal. O goberno municipal non será cómplice de eventos como as touradas baseados no maltrato a un ser vivo. Rematou a vergoña de que un concello que representa ao xeral da cidadanía coruñesa preste apoio económico (ou facilite bens como o Coliseo) para o maltrato animal", dicíase no programa da formación.

A empresa difundira nos últimos días unha proposta de programación para a feira taurina, que tiña prevista a súa celebración o 1 e 2 de agosto no Coliseum. Porén, a feira finalmente non se celebrará. Era cuestión de tempo. Xa o pasado ano o concurso para a licitación deste espectáculo de tortura animal quedara deserto antes do verán, e na repetición da convocatoria, en setembro, o Concello só recibira a oferta de Tauro Siglo XXI. E iso, a pesar das facilidades outorgadas polo Goberno local e do mantemento das axudas indirectas.

Coa túa achega fas posible que sigamos publicando novas coma esta.

A pasada edición tan só vendeu un terzo das entradas e regalou igual número de convites

Precisamente, a plataforma política Animalistas ao Concello lembrou este domingo o "nulo interese da cidadanía coruñesa nas touradas", sinalando como o propio expediente municipal desta actividade evidencia a venda de tan só 5.665 entradas en 2014, un terzo do total que saíron á venda, o que tomando como referencia o censo local representaría únicamente o 2,3% das coruñesas e coruñeses.

De feito, a pasada edición da feira taurina agasallou 5.251 convites, isto é, persoas que puideron ou non entrar de balde a algún dos dous días que compoñen este festexo de maltrato animal, supoñendo case a mesma cantidade que entradas efectivamente postas a venda e retiradas polos afeccionados.

"O 'lobby' taurino é unha ultraminoría que dispuxo de ata 3 millóns de euros en subsidios desde 1991 por parte do Concello"

Dende a plataforma Animalistas ao Concello-confluencia animalista sinalan que "o lobby taurino representa a unha ultraminoría que non obstante ten dispostos ata 3 millóns de euros en subsidios dende 1991 por parte do Concello da Coruña e outros tantos milleiros de euros da Deputación provincial que serviron para financiar directamente a actividade dalgunha peña taurina".

Fronte ao subsidio descarado dun evento que rexeita a maioría social e onde o 78% da xociedade civil amosa a súa postura favorable á retirada do financiamento público, o entramado taurino trata de atacar a un goberno municipal que nesta decisión contaría co soporte dos concelleiros socialistas e do BNG, que tamén incluíran no seu programa electoral a fin dos subsidios ás touradas.

Nesta semana a campaña A Coruña Libre de Touradas iniciará novas accións informativas nas rúas do municipio, como a pegada de 500 carteis agradecendo á cidadanía a súa postura contraria a manter o evento da tortura e a crueldade cos animais cos impostos das arcas públicas. A iniciativa chámase #GrazasACoruña.