0 Gardados para despois

O independentismo catalán torna a Diada nunha homenaxe aos líderes encarcerados

Neus TomàsNeus Tomàs


A deste martes será a sétima Diada masiva pola independencia desde que a manifestación do ano 2012 rebordase as previsións. Pero será, tamén, a primeira na que hai políticos no cárcere por actuacións vinculadas ao proceso secesionista. Esa circunstancia supuxo un cambio de ciclo e tornou os membros do anterior Govern, a presidenta do Parlament e os 'jordis' nos protagonistas dunha marcha que, segundo as previsións, volverá colapsar o centro de Barcelona. 460.000 persoas inscribíronse para participar na manifestación. A Diada de 2017 reuniu aproximadamente a medio millón de cataláns.

A pesar de que as entidades elixiron un lema, Fagamos a República catalá, cuxo  propósito é defender a aplicación do mandato do 1 de outubro, nas mensaxes que este luns trasladaron os principais líderes políticos as alusións aos presos e fuxidos foron constantes. O presidente da Generalitat, Quim Torra,  aproveitou a súa mensaxe institucional para denunciar que o que fractura a sociedade é "a falta de liberdade". O seu antecesor, Carles Puigdemont, tamén animou os seus nunha mensaxe gravada en vídeo. "Esta Diada non podemos fallar, polos presos e exiliados", reclamou Puigdemont. ERC, pola súa banda, evitou a referencia ás prisións, falando de "unha das Diadas máis excepcionais dos últimos anos pola represión".

No seo do Executivo de Torra existe un consenso para tratar de soster a protesta na rúa durante este outono, ata que se produza o xuízo aos presos e se diten as sentenzas

Unha Diada excepcional e cada vez menos institucional. Esta vez a alcaldesa de Barcelona, Ada Colau, non asistirá á manifestación e Ciudadanos e o PP, a diferenza do PSC, non participarán na tradicional ofrenda matinal ao monumento a Rafael Casanova. Este ano o partido de Rivera organiza o seu propio acto na Plaça del Rei mentres que os socialistas adiantaron que preguntarán no Parlament polo custo dos actos organizados pola Generalitat.

Cando se conmemora o primeiro ano desde os acontecementos de setembro e outubro pasado que levaron á declaración da independencia, a Diada deste martes marcará o punto de partida á  escalada da mobilización á que chama o president Quim Torra e o conxunto do Govern. No seo do Executivo independentista existe un consenso para tratar de soster a protesta na rúa durante este outono, ata que se produza o xuízo aos presos e se diten as sentenzas.

O interrogante

A partir dese punto, as sentenzas dos presos, as opinións sobre o camiño a seguir difiren en función dos partidos. Mentres  o propio Torra abandeira a idea de responder desde a Generalitat cun desacato dos ditames xudiciais se estes son condenatorios (aínda que non aclara como pensa facelo), outros como Oriol Junqueras lanzan claros xestos de rexeitamento a esta estratexia. Sen ir máis lonxe, na entrevista concedida polo líder de ERC este luns a TV3, rexeitou que a vía unilateral cara á independencia teña viabilidade.

O acto institucional da Generaralitat previo á Diada estivo marcado pola lembranza aos presos; Torra e Torrent visitan no inicio deste 11 de setembro a Carme Forcadell

Sexa cal for a postura que gañe, o certo é que toda a táctica do independentismo xira agora ao redor dos presos. E iso a pesar de que as entidades rexeitaron a consciencia enfocar a tradicional manifestación da Diada en reclamar a súa liberdade. "O 11 de setembro é o momento de dicir que o obxectivo que ten a represión política, que é que renuncies aos teus obxectivos, non se conseguiu", aseguraba a presidenta da ANC, Elisenda Paluzie, este domingo nunha entrevista con eldiario.es.

O que si tivo un claro cariz de recordo dos presos foi o acto oficial da véspera da Diada, organizado polo Govern, que este ano consistiu nunha  marcha desde o Parlament até o Palau da Generalitat encabezada por Torra, polo president do Parlament, Roger Torrent, e o resto do Govern. A marcha chegou até a praza Sant Jaume onde se celebrou o acto central. Un espectáculo de música e luces centrado en proxectar mensaxes elixidas e pronunciadas polos presos e os políticos que están en diferentes países europeos tras escapar da xustiza española. Torra e Torrent volverán este martes pola mañá a pór aos presos no centro, cando visiten a Carme Forcadell.

Coa túa achega fas posible que sigamos publicando novas coma esta.

O BNG participa na Diada e amosa o seu "total apoio ao dereito a decidir do pobo catalán"

Bieito Lobeira, Ana Miranda e Rubén Cela, na ofrenda floral ante o monumento de Rafael Casanova / © BNG

O BNG participou un ano máis na Diada cunha delegación integrada polo responsable de Organización, Bieito Lobeira, e polos cargos políticos responsables da coordinación da Área de Internacional, Ana Miranda e Rubén Cela. Xunto con militantes do Bloque na emigración, a formación amosou o seu "total apoio ao dereito do pobo catalán para decidir libremente e con todas as garantías a súa relación co Estado español, a través dun referendo de autodeterminación".

O Bloque amosou a súa "solidariedade cos presos e presas políticas na súa loita por acadar a república catalá independente"

Igualmente, con esta ampla representación, o BNG di que segue a "reforzar os lazos de unión co movemento soberanista en Catalunya" e traslada a súa "solidariedade cos presos e presas políticas na súa loita por acadar a república catalá independente, no exercicio do dereito de autodeterminación dos pobos". A delegación do Bloque depositou unha ofrenda floral diante do monumento a Rafael Casanova e reclamou unha "solución política que respecte a liberdade e a democracia".

Tamén Anova-Irmandade Nacionalista contou con representación nos actos da Diada, marcados pola defensa do dereito a decidir e a liberdade dos presos independentistas. Compromiso por Galicia (CxG), pola súa banda, tamén estivo presente en Barcelona cunha delegación encabezada polo seu secretario xeral, Piñeiro Docampo.  Xunto con PNV e PDeCat, a formación galeguista asegura que "un dos obxectivos" da participación na Diada é "artellar un traballo que leve a reedición de Galeusca". O líder do partido cre que "cómpre entender que o camiño catalán non é o galego". "Pero defendemos a democracia, por iso estamos aquí", rematou.