O voto por correo terá nestas eleccións un peso moi superior ao de anteriores comicios. Ata o xoves, sen contar as admitidas o último día, rexistráranse en Galicia 72.096 peticións, fronte a un total de 54.641 o pasado mes de decembro. O incremento é do 32%, unha suba que cos datos completos superará o terzo. No conxunto de España o crecemento é moi superior, ao redor do 85,5%, pasando de 783.000 a 1.309.879. Os datos do 20D xa significaran un crecemento do 14,4% con respecto aos de 2011
Por provincias, A Coruña pasa de 21.487 a 28.818 (+34,2%), Pontevedra de 16.907 a 23.542 (+39,2%), Ourense de 8.070 a 10.062 (+24,7%) e Lugo de 8.177 a 9.674 (+18,3%), sen contar coas solicitudes admitidas o último día, que incrementarán estes resultados.
Está por ver se este incremento responde unicamente á coincidencia das eleccións nun mes vacacional, nunha fin de semana que segue ao San Xoán e na que se prevé bo tempo. Ou se pode indicar unha maior mobilización do electorado. De momento, algunhas enquisas auguran un pequeno descenso da participación.
