Fernández Díaz asegurou que Rajoy coñecía as súas manobras para incriminar políticos independentistas

Fernández Díaz e Rajoy, nun acto de campaña © PPC

O presidente do Goberno de España en funcións, Mariano Rajoy, coñecía as actuacións levadas a cabo polo seu ministro do Interior, Jorge Fernández Díaz, para incriminar políticos independentistas en falsos casos de corrupción, segundo transmitiu o mesmo Fernández Díaz ao director da Oficina Antifrau de Catalunya, Daniel de Alfonso. "O presidente do Goberno sábeo. Eu díxenllo a el, é un home discreto onde os haxa", explica o ministro nun momento da conversa.

Segundo as novas gravacións que publicou o diario Público este mércores, Fernández Díaz prometeu discreción total a De Alfonso, a quen lle di que "para non comprometerte a ti, isto queda entre ti e mais eu". O ministro describe ao director de Antifrau un círculo de confianza entre o inspector José Ángel Fuentes Gago, eles dúas e o presidente do Goberno, a quen describe como "a discreción personificada".

"Eu coñézoo moi ben, de moitos anos. Levo traballando e colaborando con el desde febreiro do 91 ininterrompidamente, na oposición, no goberno, na oposición", explícalle Fernández Díaz a De Alfonso sobre Mariano Rajoy, para explicarlle o grao de sintonía que hai entre ambos e o apoio do presidente á investigación extraxudicial contra independentistas que os dous homes están a desenvolver.

As gravacións reveladas por Público amosan a Fernández Díaz tentando fabricar escándalos contra partidos e cargos soberanistas cataláns

Tal e como saíu á luz este martes, o ministro do Interior, Jorge Fernández Díaz, tratou de fabricar escándalos contra partidos e cargos independentistas xunto ao director da Oficina Antifraude de Catalunya, Daniel de Alfonso, nas vésperas do proceso participativo do 9-N. Segundo unhas gravacións que foron agora publicadas, os dous homes maquinaron en busca de casos de corrupción, reais ou figurados, que puidesen involucrar a independentistas, como o pai e irmán do líder de ERC, Oriol Junqueras, ou os consellers de Convergència, Felip Puig e Francesc Homs.

Rajoy asegura que ata este martes descoñecía as conversas e a propia existencia da Oficina Antifraude

Rajoy, pola súa banda, asegurou este mércores en declaracións a Onda Cero que ata a publicación da exclusiva de Público non só descoñecía a operación, senón a propia existencia da Oficina Antifraude catalá. En calquera caso, o tamén candidato do PP ás eleccións deste domingo réstalle importancia á revelación, toda vez que as gravacións unicamente recollen, di, dúas persoas falando "de temas da súa competencia".

Esta información chega dous anos despois de que eldiario.es revelase a existencia dunha unidade segreda da Policía Nacional dedicada a procurar posible información comprometedora de políticos soberanistas cataláns. Segundo a información asinada polo xornalista Pedro Águeda, esta unidade existe dende 2012, xa con Fernández Díaz como ministro, e está integrada por membros de Asuntos Internos e doutro departamento policial. As súas pesquisas, indicaba a mesma información, viñan sendo filtradas a determinados medios en momentos clave do proceso soberanista de Catalunya.

Fernández Díaz, nun acto de campaña © PPC

Despece

  • O ministro preséntase como vítima: "Primeiro dispárase e despois, pregúntase"

    Marcos Pinheiro

    O ministro de Interior en funcións, Jorge Fernández Díaz, rexeitou este mércores que tentase fabricar escándalos contra partidos e cargos independentistas xunto ao director da Oficina Antifraude de Catalunya, Daniel de Alfonso. "É surrealista, agás que se entenda que investigar é ir contra o proceso independentista", defendeuse o ministro, cuxa dimisión pediu o resto de partidos.

    Nunha comparecencia ante os medios de comunicación o ministro do Interior en funcións e número un do PP por Barcelona, afirmou: "Unhas conversas de hai dous anos, que se graven, que saian editadas, fragmentadas e nesgadas antes das eleccións, e fálase de conspiración en lugar de pór o acento onde está a conspiración, que é en que se gravou e difundii esa gravación".

    "A conspiración está en que se gravou e difundiu esa gravación"

    Fernández Díaz tamén criticou que "sen excepción, desde Bildu, PSOE, Podemos, os independentistas e Albert Rivera, sen esperar a un eventual resultado da investigación de como se fixo a gravación e a difusión para facer dano, piden a dimisión e, algúns, a destitución do maxistrado".

    "É o mundo ao revés", laiouse, "cando hai unha ilegalidade en lugar de pedir investigación desa conduta repugnante, pídese o cesamento das vítimas desa conduta. Falar de conspiración para delinquir é unha inxuria e calumnia intolerable. Cando se filtra unha conversa dous anos despois e se fau de maneira nesgada ou dirixida, obviando que no seu contexto non ten o sentido que algúns queren dar, o que ocorre é que queren destruír un adversario como un servidor e tamén o director de Antifraude. Parece que todo vale. Polo amor de deus, aquí houbo unha utilización repugnante de mecanismos ilegais para facer dano a un adversario político, e se de paso levan ao director antifraude. Se cadra dous, polo prezo dun".

    "Polo amor de deus, aquí houbo unha utilización repugnante de mecanismos ilegais para facer dano a un adversario político"

    O candidato do PP por Barcelona insistiu en que "o presidente [Rajoy] non o sabía, comenteille onte ao oito da tarde. E expliqueille que é verdade que me reunín hai dous anos con este señor e que falamos de cuestións das nosas competencias. Para previr e investigar casos concretos que afecten condutas corruptas. Contribúe a elevar a democracia do noso país que se filtre iso? Non é condenable? En lugar diso, dan a razón a quen fixo esa repugnante actuación e dar crédito. A algúns moléstalles que haxa unha oficina que loite contra casos concretos que poidan afectar a cargos públicos contra a corrupción".

    A pesar de que o ministro defendeu "a normalidade" dunha conversa sobre "as súas competencias" de dúas institucións, recoñeceu que, desde aquel encontro, hai dous anos, non volveron reunirse: "Eu non volvín a falar con el desde entón".

    Fernández Díaz tamén respondeu ao president da Generalitat, Carles Puigdemont, que cualificou o ocorrido de "GAL  informativo". O ministro censurou que "o president non estea á altura do seu cargo. Esas declaracións descualifícanse por si mesmas. Estamos a confundir os termos. A única conspiración é a de quen gravou e a está filtrando por fascículos antes das eleccións. Primeiro dispárase e logo pregúntase. Cooperan cos que fixeron isto co fin de destruír un adversario político".

    Fernández Díaz, este martes © PPC

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza