Ciudadanos recúa e evita que Baltar teña que deixar a Deputación

Albert Rivera e Mariano Rajoy © Goberno de España

“Separación inmediata de calquera cargo público que fose imputado formalmente por corrupción política ata a resolución completa do procedemento xudicial”. Iso é o que di a primeira das seis condicións aceptadas polo PP o pasado venres para que Ciudadanos apoie a investidura de Mariano Rajoy como presidente do Goberno. Tres días despois, a formación laranxa xa matiza e, malia que o texto asinado dicía que é de aplicación a “calquera cargo público”, agora di que só esixirá a dimisión dos cargos estatais, e non dos autonómicos, provinciais ou locais.

A formación de Rivera di agora que só esixirá a dimisión dos cargos estatais imputados por corrupción, e non dos autonómicos, provinciais ou locais, malia que o acordo di textualmente “calquera cargo público”

Se a esixencia de dimisión dos cargos imputados por corrupción imposta por Ciudadanos e aceptada polo PP se aplicase sen os matices agora desvelados, o presidente da Deputación de Ourense, José Manuel Baltar, tería que deixar o cargo: está imputado por tráfico de influencias e suborno por ofrecer presuntamente un emprego público a cambio de sexo a unha muller, tamén imputada na mesma causa.

Porén, segundo o voceiro de Ciudadanos no parlamento asturiano, Nicanor García, a medida non será aplicada por baixo do nivel estatal porque sería “unha pequena revolución”. Así o dixo ao ser preguntado pola imputación no caso Pokémon do ex-alcalde e actual voceiro do PP en Oviedo, Agustín Iglesias Caunedo. En Galicia, Ciudadanos evita pronunciarse sobre o caso de Baltar e remite para calquera explicación ao que decida a dirección estatal do partido.

Feijóo e Baltar, en Verín © PP Ourense

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.