O PPdeG carga contra oposición por reprocharlle a corrupción: "Corrupto é todo o mundo"

O grupo do PP, durante unha intervención de Feijóo no pleno do Parlamento © Parlamento de Galicia

Os casos de presunta corrupción que sacoden nas últimas semanas o aparello do PP e as súas derivadas a respecto de inxerencias gobernamentais na Xustiza están a xerar toda unha vaga expansiva na política galega. Como noutras ocasións os populares galegos están a apostar neste caso por tender unha barreira política que os diferencie da dirección central do partido, desligar a súa xestión na Xunta de calquera sospeita e, ao tempo, estender a sombra da corrupción ao conxunto de forzas políticas. Un novo episodio desta estratexia vén de producirse na comisión parlamentaria para as relacións co Consello de Contas, o órgano fiscalizador das finanzas públicas. Alí os populares cargaron con dureza contra a oposición por reprocharlles as prácticas corruptas e, ao tempo, lanzaron unha sentenza: "Todo o mundo é corrupto".

Poucos días despois de que, tamén nun acto ligado ao Consello de Contas, Alberto Núñez Feijóo ligase a corrupción política co relato bíblico da "famosa mazá do pecado orixinal", unha "tentación" que "hoxe toma moitas formas" e na que ninguén está libre de "caer", a deputada popular ourensá Cristina Romero censurou que a oposición en xeral e En Marea en particular "pretendan dirixir" as "actuacións fiscalizadoras" de Contas cun "criterio político". "As fan dun xeito partidista de acordo co seu discurso, é lexítimo pero non é congruente", reprochou".

Cristina Romero (PP): "A corrupción afecta ás persoas, é transversal; todo o mundo é corrupto"

"Non lles vou dar leccións nin sequera aos das mareas, que unhas cantas necesitan", afirmou Romero ante as referencias da bancada esquerda aos casos que nestas semanas volven encher titulares a respecto da "corrupción, da que tamén nos avergoñamos nós". Así e todo, a parlamentaria chama a ter en conta que cun eventual goberno de En Marea "non nos enteraríamos" de casos coma estas "porque se cargarían" a "todos os que o sacasen fóra, tamén a todo o sistema xudicial". "Vostedes teñen corruptos", advertiu ao vicevoceiro da formación, Antón Sánchez: "Teñen o piso de Espinar, el fraude a la Seguridad Social de Echenique, Monedero que pagó en B... De que están a falar?", cuestionou.

Antón Sánchez (En Marea): "Que pasaría se fose En Marea quen tivese un contable como o señor Bárcenas?"

Neste contexto, a representante do PP insta o resto de grupos a asimilar que "a corrupción afecta ás persoas" e, polo tanto, "é transversal". "Todo o mundo é corrupto", proclama, e os membros de En Marea "non o son máis porque non teñen oportunidade de gobernar e oxalá non poidan gobernar nunca, señores da esquerda radical totalitaria". "Se en Francia están apoiando a Le Pen!", acrecentou ante os risos da oposición e, nomeadamente, do propio Sánchez.

"Quizais cando falan de totalitarismo esquecen que son vostees os que colocan fiscais anticorrupción para tapala", retrucou Sánchez ás verbas de Cristina Romero. Se cadra, di, o que cómpre preguntarse é "que pasaría" se fose En Marea quen "ameazase con pegar dous tiros a xuíces por facer o seu traballo" ou "quen está dando o espectáculo lamentable de corrupción e podremia que está dando o PP". "Que pasaría -agregou- se o señor Mariano Rajoy fose das mareas e tivese un contable como o señor Bárcenas, con millóns de euros en Suíza de empresas ás que despois lles adxudicaban contratos?", cuestiona.

Propostas e recomendacións

Os populares rexeitaron a proposta do PSdeG para "garantir a confidencialidade de calquera denunciante" de casos de corrupción

Foi neste contexto de tensión no que a comisión aprobou as recomendacións para o Consello de Contas, órgano que tamén ten asignadas facultades en materia de prevención da corrupción. Entre elas figura unha formulada polo PSdeG para a "posta en marcha das necesarias medidas de cooperación coa Fiscalía Superior de Galicia" para "unha persecución integral das prácticas corruptas no ámbito autonómico" e outra, tamén dos socialistas, que reclama un informe "sobre o control interno dos sistemas de prevención de corrupción nas entidades locais e demais institucións dependentes dela".

A que non saíu adiante foi a iniciativa do deputado do PSdeG Juan Díaz Villoslada para a creación dunha "oficina específica" que "garanta a confidencialidade de calquera denunciante" dun caso de corrupción. "O obxectivo -explica o parlamentario- é garantir que os responsables políticos, funcionarios, reponsables de empresas e asociacións" poidan "poñer en coñecemento calquera actuación que puidese implicar un posible caso de corrupción". Os conservadores votaron en contra porque, di Romero, o Consello de Contas "xa está obrigado a manter a confidencialidade".

Cristina Romero, deputada do PP Dominio Público Parlamento de Galicia
Antón Sánchez, vicevoceiro de En Marea © Parlamento de Galicia

Despece

  • O BNG formaliza a petición de investigar os contratos da Xunta coas empresas de Villar Mir

    Unha investigación para "fiscalizar todas as adxudicacións, contratos, autorizacións e concesións" e, "en xeral, todas as relacións do Grupo Villar Mir" coa Xunta e as entidades que dependen dela. É a petición que tentará sacar adiante o BNG no Parlamento despois de que o nome do empresario, ex-alto cargo do franquismo e antigo ministro de Adolfo Suárez figurase ligado á Operación Lezo de presunta corrupción no PP de Madrid, igual que xa antes aparecera no caso que investiga o suposto financiamento irregular da dirección estatal do partido conservador.

    Dado que o Bloque no conta con escanos dabondo para formular unha solicitude de comisión de investigación -cómpre un terzo dos membros do Parlamento- os nacionalistas empregan a vía da proposición non de lei para pedir unha investigación que, indica Ana Pontón, debe servir para aclarar se existiu algunha relación entre estes contratos e as presuntas tramas corruptas. "O BNG -din- confía no apoio dos outros grupos da Cámara, incluído o PP", xa que o propio presidente da Xunta "declarou que o seu partido non ten nada que ocultar en relación á imputación de Villar Mir".

    Entre os contratos que o Bloque pide revisar está a adxudicación a OHL do servizo de atención nos albergues do Xacobeo por 1,3 millóns de euros en 2016

    Entre as relacións contractuais que Pontón ve necesario examinar está a adxudicación, pola vía urxente do procedemento negociado sen publicidade, do servizo de atención, limpeza e cobramento dos albergues do Camiño de Santiago á empresa OHL, propiedade de Villar Mir. Esta adxudicación, de 1,3 millóns de euros, formalizouse en abril de 2016 -tal e como amosa o documento que acompaña estas liñas- para un período de seis meses. Transcorrido ese prazo o Xacobeo licitou un novo contrato por procedemento aberto ao que tamén concorreu OHL, se ben este concurso -para dous anos e dotado con algo máis de 4 millóns- gañouno a empresa Clece, do grupo ACS que preside Florentino Pérez.

    Contratos no porto vigués de Bouzas e en Punta Langosteira e o propio proceso aberto para a venda das centrais hidroeléctricas de Ferroglobe -antiga Ferroatlántica- son, di o BNG, mostras suficientes dos "numerosos intereses que ten en Galiza o conglomerado de empresas de Villar Mir", as cales están sometidas a "decisións adoptadas dende o ámbito público, directamente polo Goberno galego ou a través de órganos vinculados". Alberto Núñez Feijóo xa avanzou a súa oposición a esta investigación xa que, di, o volume de contratos adxudicados a Villar Mir é semellante "aos do bipartito" e, en ambos casos, por importes "razoables".

    O grupo do BNG, rexistrando a petición CC-BY-NC-SA BNG
    Adxudicación dos albergues do Xacobeo a OHL CC-BY-SA Praza Pública

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza