0 Gardados para despois

Primeiros actos en apoio do referendo catalán en Galicia e primeiro veto

David ReineroDavid Reinero | @DReinero


Galiza Nova, a organización xuvenil do BNG, organizou este martes en Santiago, na Facultade de Filosofía, o que cualificou como primeiro acto en Galicia de aberto apoio á celebración do referendo catalán do 1 de outubro, no que mesmo se exhibiu un cartel da convocatoria como os que as forzas de seguridade están a requisar en diversos puntos de Catalunya. Porén, a mesma organización informou tamén este martes da “prohibición” por parte do Concello de Ribeira de celebrar nun local municipal “unha palestra sobre o dereito a decidir nas nacións sen Estado”. Ao tempo, na Coruña a Delegación do Goberno autorizou unha concentración xunto o Obelisco da cidade convocada “en defensa dos dereitos civís e o dereito a decidir, ante os ataques á democracia e a liberdade que o Estado está a cometer para reprimir o referendo en Cataluña”.

Galiza Nova organiza sen obstáculos un acto na Universidade de Santiago con membros de ERC no que se exhibiu un cartel da consulta

O acto de Santiago, celebrado na Facultade de Filosofía pero con acceso libre da cidadanía e ao que asistiu un cento de persoas, foi convocado baixo o título “A loita pola liberación dos pobos” e presentado previamente por Galiza Nova como "o primeiro de apoio ao referendo catalán” que se celebra en Galicia -o pasado venres a organización xuvenil Isca organizou outro nun local de Santiago-. Nel participou o portavoz das xuventudes e membro da executiva de Esquerra Republicana de Catalunya (ERC) Pau Morales; a responsable de internacional de Galiza Nova, Navia Rivas; e o coordinador de relacións internacionáis do BNG, Rubén Cela. Estaba prevista a participación tamén do responsábel de internacional de Sortu, Pernando Barrena, pero perdeu o voo que o levaba a Santiago. Ao comezo do acto, os participantes despregaron un cartel dos elaborados pola Generalitat para publicitar o referendo como os que as forzas de seguridade están a requisar en Catalunya. "Nunca un cartel institucional foi tan subversivo", salientou Cela, quen engadiu que "o español é hoxe un Estado antidemocrático".

Segundo a Delegación do Goberno en Galicia, esta non interveu en permitir ou denegar o acto de Santiago por celebrarse no que considera un recinto privado mentres que si considerou aceptable a convocatoria da Coruña

Segundo informou a preguntas deste diario a Delegación do Goberno en Galicia, esta non interveu en permitir ou denegar o acto por celebrarse no que considera un recinto privado, a Universidade de Santiago, que pola súa banda autorizou a celebración. A Delegación do Goberno tamén indicou que si autorizou por considerala aceptable unha concentración cidadá a última hora da tarde no Obelisco da Coruña “en defensa dos dereitos civís e o dereito a decidir, ante os ataques á democracia e a liberdade que o Estado está a cometer para reprimir o referendo en Cataluña”. Nesa concentración da Coruña, á que asistiron varios centos de persoas, o escritor Manuel Rivas leu un manifesto no que apelou a defender “o dereito dos cataláns a decidir libremente o seu futuro” e asegurou que “está en xogo a defensa dos dereitos da cidadanía”. O acto rematou ao son de L'estaca, de Lluís Llach.

Acto denegado en Ribeira

Por outra banda, este martes Galiza Nova tamén denunciou que o Concello de Ribeira, gobernado polo PP, denegoulle “o uso dun local municipal para a realización dunha palestra sobre o dereito a decidir das nacións sen Estado”. Segundo a organización xuvenil, o concello amparouse nas resolucións do Tribunal Constitucional indicando que “puidese interpretarse a cesión da sala por parte do Concello como favorecer un acto de apoio a un referéndum convocado por uha lei que foi suspendida”. O BNG e Galiza Nova critican a “prohibición” do Concello e do PP do “libre dereito de reunión e debate” e “un feito que non ten outra finalidade que impedir a liberdade de expresión tal cal se facía na época da represión franquista” .

Concentracion na Coruña en apoio ao dereito a decidir do pobo catalán

CC BY-SA Praza Pública

Coa túa achega fas posible que sigamos publicando novas coma esta.

A Garda Civil rexistra catro consellerias da Generalitat e detén trece persoas

A Garda Civil entrou este mércores en varios departamentos do Govern catalán. Está a realizar nove rexistros nas sedes de Economía e Facenda, Exteriores, Gobernación e Traballo e Asuntos Sociais na busca de documentación relacionada co referendo do 1-O, segundo informaron fontes do Govern.

Durante o operativo foi detido o secretario xeral de Vicepresidencia e de Economía e Facenda, Josep Maria Jové, que é a man dereita de Oriol Junqueras, xunto a Josep Maria Salvadó e Juan Manuel Gómez, todos eles altos cargos de Facenda. Así o confirmaron fontes da Garda Civil,  Pero hai moitos máis detidos, até un total de trece segundo a Cadena SER, cargos públicos e funcionarios. Todos eles están acusados de prevaricación. 

Na operación foi detido o secretario xeral de Vicepresidencia e de Economía e Facenda, Josep Maria Jové, man dereita de Junqueras

En declaracións a Catalunya Radio, o vicepresident e conseller de Economía, Oriol Junqueras, lamentou o rexistro policial na sede do seu departamento, actuación que cualificou de "demostración de estado policial". "Entran no Govern como en calquera empresa. Poden tentar intervilo todo, como os carteis", afirmou.

Logo dos rexistros, o president da Generalitat, Carles Puigdemont, convocou unha xuntanza extraordinaria do Govern para este mediodía. O portavoz do Govern, Jordi Turull, pediu calma a través do seu perfil de Twitter e reiterou o seu compromiso co procés. "Moita calma e serenidade ante este estado policial e de sitio. O noso compromiso segue intacto e con máis razóns cada hora que pasa", dixo. Do mesmo xeito, o presidente da Assemblea Nacional Catalá (ANC), Jordi Sanchez, fixo unha chamada á cidadanía para concentrarse fronte á sede da Conselleria de Economía.

Máis rexistros en organismos oficiais

A operación inclúe tamén a entrada en diversos organismos dependentes da Generalitat, así como en empresas tecnolóxicas, como Indra e T-Systems, no distrito 22 do Poblenou de Barcelona.

Entre os organismos da administración catalá nos que tamén apareceu a Garda Civil atópanse a Axencia Tributaria, o Consorcio da Administración Aberta e no Centre de Telecomunicacions i Tecnologia.

Ada Colau cualifica a operación de "escándalo democrático" e chama a "defender as institucións catalás"

As reaccións non se fixeron esperar. Convocados pola ANC, centos de persoas concentráronse ante a sede da Conselleria de Economia e está previsto que haxa outra concentración na plaza Sant Jaume ás 14 horas. A alcaldesa de Barcelona, Ada Colau, asegurou nas redes sociais que era "un escándalo democrático" que se "detivesen cargos públicos por motivos políticos" e animou a "defender as institucións catalás". 

No Congreso, o deputado de ERC Gabriel Rufián, esixiu a Rajoy que "saque as súas sucias mans das institucións catalás", mentres que o presidente do Goberno xustificou a actuación policial porque "o Estado de dereito funcionou". "Fixemos o que tiñamos que facer e era a nosa obriga", dixo. Logo diso, os deputados de Esquerra abandonaron o hemicilo. O PDeCat, pola súa banda, estuda a posibilidade de deixar a Cámara de xeito permanente, mentres que organizacións como CCOO tamén animaron a defender as institucións.