0 Gardados para despois

Feijóo reduce o caso Gürtel a que Bárcenas “non foi un tesoureiro moi exemplar e iso puido contaminar o PP"

David ReineroDavid Reinero | @DReinero


Malia que a Audiencia Nacional vén de condenar o propio Partido Popular como beneficiado da trama de corrupción Gürtel e foron cargos populares boa parte dos 29 condenados, entre eles quen foi secretario de Organización do PP galego, Pablo Crespo, Alberto Núñez Feijóo limitou este xoves o caso a que Luis Bárcenas “non foi un tesoureiro moi exemplar e iso puido contaminar o PP”.

O presidente evita responder se a sentenza debe implicar responsabilidades políticas e obvia a condena a 37 anos a quen foi secretario de Organización do PP galego e o propio Feijóo mantivo en Portos de Galicia

Nunha rolda de prensa posterior á reunión semanal do seu Goberno que estivo centrada na atención ás vítimas que deixou a explosión da pirotecnia de Tui, cuestión que Feijóo considerou máis importante, o presidente foi preguntado polas condenas do caso Gürtel e se considera que deben implicar responsabilidades políticas no seu partido máis alá das penais. O presidente dixo non coñecer a “agardada” sentenza “dez anos despois” máis que por informacións xornalísticas e centrou a súa valoración na figura de Luis Bárcenas, do que dixo que “se o tesoureiro acaba de ser condenado” é que “non foi un tesoureiro moi exemplar e iso puido contaminar o PP”. Canto ao partido, dixo que debe “acatar, cumprir e garantir que isto non volva suceder”.

Feijóo di que o PP debe “mandar unha mensaxe de seguridade de que as cousas que se fixeron mal nin se fagan actualmente nin se volvan repetir nunca máis”

Feijóo obviou a pregunta sobre as posibles responsabilidades políticas máis alá das penais dunha sentenza que condena a máis de 37 anos de cárcere a Pablo Crespo, que foi secretario de Organización do PP galego antes de que Feijóo comezase a presidir a formación pero a quen el mesmo, cando era conselleiro de Política Territorial, mantivo como vocal de Portos de Galicia desde 2003 ata que os dous foron relevados polo bipartito en 2005.

O presidente da Xunta e do PP galego limitouse a “mandar unha mensaxe de seguridade de que as cousas que se fixeron mal nin se fagan actualmente nin se volvan repetir nunca máis”.

Coa túa achega fas posible que sigamos publicando novas coma esta.