Concellos galegos e portugueses impulsan unha fronte común para demandar novos fondos europeos

Carmela Silva e Abel Caballero, xunto con representantes da ANMP lusa © Deputación de Pontevedra

A presidenta da Deputación de Pontevedra, Carmela Silva, e Abel Caballero, alcalde de Vigo e presidente da FEMP, mantiveron este mércores unha xuntanza con representantes da Associação Nacional de Municípios Portugueses (ANMP). No encontro avanzouse na elaboración dunha proposta conxunta entre as entidades locais de ambos os dous países para o novo marco financeiro dos fondos europeos para o período 2021-2017.

Carmela Silva subliñou que os concellos “gobernamos moi próximos á cidadanía e debemos estar onde se toman as decisións sobre os fondos da Unión Europea que afectan aos territorios”. “Temos un coñecemento moi directo das demandas da cidadanía pola nosa proximidade polo que os municipios e cámaras portuguesas deben facer un traballo en común para trasladar esas demandas aos órganos de decisións do futuro dos fondos europeos”, engadiu. Para Silva, os concellos deben esixir “que se nos teñan en conta á hora de planificar as infraestruturas ou no futuro dos fondos Interreg de cooperación transfronteriza”. “Europa móvese en redes e en lobbys e os concellos debemos agruparnos para poder ter a forza necesaria para trasladar as nosas demandas e as da cidadanía á Europa”, concluíu.

“Europa móvese en redes e en lobbys e os concellos debemos agruparnos para poder ter a forza necesaria para trasladar as nosas demandas e as da cidadanía á Europa”, sinalou Carmela Silva

Sobre a mesa hai numerosos asuntos que son clave nunha e noutra beira do Miño, e que se tratarán en vindeiras xuntanzas, coma a perda de importancia dos fondos Interreg “que sufriron importantes recortes económicos”; as vías de transporte e as comunicacións “nas que temos que facer fincapé na necesidade dun tren de alta velocidade entre Vigo e Porto”, afirmou Carmela Silva; un maior equipamento social e urbano “que garanta tamén a igualdade entre as zonas costeiras máis poboadas e as interiores que sofren un maior abandono”; a protección civil, na que se inclúe a cooperación en materia de incendios forestais; e, por último, a colaboración en materia de turismo sostible, no que Carmela Silva manifestou o seu interese por unha maior cooperación “entre os municipios de ambos países”.

"Se vemos as propostas que se están a realizar para o próximo marco financeiro do 2021-2027, cada vez os fondos están moito máis centralizados. De forma conxunta teremos moita máis forza para trasladar as nosas demandas”, dixo António Almeida

O vicepresidente da ANMP lusa, António Almeida, concordou en que as cámaras e os concellos de ambos países teñen que estar nas decisións sobre o futuro dos fondos estruturais. "Se vemos as propostas que se están a realizar para o próximo marco financeiro do 2021-2027, cada vez os fondos están moito máis centralizados. De forma conxunta teremos moita máis forza para trasladar as nosas demandas”, dixo.

Ambas as dúas delegacións acordaron un próximo encontro para a primeira quincena do mes de xullo do grupo de traballo dos fondos estruturais para analizar as propostas dos técnicos e técnicas e elaborar unha proposta conxunta da FEMP e da ANMP. Ademais, aprobouse a elaboración dun calendario de xuntanzas conxuntas, ao
máximo nivel, entre ambas entidades para manter un contacto permanente e comezar a traballar en propostas sobre os aspectos que foron postos enriba da mesa nesta primeira xuntanza.

 

Mapa do Eixo Atlántico Dominio Público Praza Pública

Despece

  • O Eixo Atlántico reclama priorizar as conexións ferroviarias en Galicia e Norte de Portugal

    Este mércores a localidade lusa de Mirandela acolleu a reunión da Comisión Executiva do Eixo Atlántico. No encontro analizáronse dous informes sobre infraestruturas de transporte, tanto portuarias como de ferrocarril, da rexión transfronteiriza, elaborados por Fernando González Laxe e Miguel Rodríguez Bugarín a petición da entidade, e que servirán de base para a negociación cos gobernos de España e Portugal nesta materia. Ademais, estudouse un informe de Juan Picos sobre cooperación transfronteiriza na prevención e loita contra os incendios.

    Analizáronse dous informes sobre infraestruturas de transporte, tanto portuarias como de ferrocarril, da rexión transfronteiriza, elaborados por Fernando González Laxe e Miguel Rodríguez Bugarín

    Na xuntanza fíxose fincapé na necesidade de priorizar as conexións ferroviarias en Galicia e Norte de Portugal, reclamando que se incrementen os investimentos neste ámbito "para integrar esta área na rede europea”. En concreto, salientouse a necesidade de mellorar as conexións entre Lugo e A Coruña e entre Ferrol e A Coruña e, igualmente, construír o tren ata o Porto Exterior de Punta Langosteira, de xeito que esta infraestrutura quede conectada co Corredor Atlántico de mercadorías. Tamén se subliñou a importancia de crear unha liña de alta velocidade entre Oporto e Vigo.

    “É preciso que estas demandas sexan a base das reclamacións do ente no eido de comunicacións e infraestruturas, porque se están a negociar xa nos órganos da Unión Europea as liñas de financiamento nesta materia”, destacou Xulio Ferreiro, alcalde da Coruña. “Algunhas das reclamacións que mantemos están entre as que manexan os estados, pero hai moitas outras que nós identificamos como necesarias e que é preciso introducir na relación de actuacións a desenvolver nos próximos anos”, engadiu.

    Ademais, estudouse un informe de Juan Picos sobre cooperación transfronteiriza na prevención e loita contra os incendios

    No seu informe ferroviario, Miguel Rodríguez Bugarín resaltou que a rede de Galicia e Norte de Portugal é moi desigual, xa que existen trazados renovados neste século mentres que outros manteñen o orixinal, de finais do XIX, como a liña A Coruña-Betanzos-Ferrol, “o que condiciona a calidade do servizo e limita as posibilidades de mellora, como a introdución da alta velocidade”. Mentres, Fernando González Laxe destacou que en materia portuaria é fundamental a accesibilidade interior, “xa que os intercambios de mercancías so poden darse se hai corredores de comunicación”. “Os portos non son entidades illadas, polo que precisan planificación no sistema de transportes",  concluíu.

    Participantes na xuntanza do Eixo Atlántico, celebrada en Miradela (Portugal) © Concello da Coruña

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza