Rueda, vicepresidente dun Goberno de 'máis do mesmo'

Feijóo, con Rueda no Consello © Ana Varela

Dous movementos que, a efectos prácticos, son só un. Alberto Núñez Feijóo fixo pública no mediodía deste domingo a configuración do seu terceiro gabinete, un Goberno galego que ten de novo oito consellerías e no que Alfonso Rueda ascende nominalmente a un cargo que xa exercía de facto, a Vicepresidencia. Só hai unha remuda, a de Javier Guerra, ata agora titular dunha Consellería de Economía e Industria que será dirixida por Francisco Conde, ata agora un dos asesores máis próximos a Feijóo. 

Como nos actos da toma de posesión, o titular do Goberno galego optou por un acto de baixísimo perfil para dar a coñecer esta decisión de continuidade. Unha convocatoria no Pazo de Raxoi só para a prensa gráfica e un correo electrónico remitido aos medios de comunicación foron as únicas pezas para oficializar o leve movemento de pezas que lle permite a Rueda gozar das competencias de coordinación do Goberno e a Feijóo, prescindir no seu organigrama dun conselleiro que, sobre todo ao inicio da pasada lexislatura, amosou escasas mañas á hora de desenvolverse na area política galega.

Feijóo opta para Industria por un perfil máis discreto e académico que o de Guerra e, ademais, salda a débeda de ter un conselleiro de Lugo

Co cambio de Guerra por Conde o presidente sabe que, con toda probabilidade, non se volverán producir os duros enfrontamentos parlamentarios protagonizados polo seu titular de Economía e Industria, a quen a oposición lle reprochou en máis dunha ocasión a súa "chulería" e quen tampouco mantivo unha relación especialmente fluída cos medios de comunicación. No seu lugar chega un dos homes de confianza do líder popular. De perfil sensiblemente máis discreto que o do seu antecesor, Francisco Conde suporá unha achega académica -foi profesor da Universidad San Pablo CEU de Madrid- á primeira liña dun gabinete no que, por exemplo, xa tivo un papel relevante nos últimos anos en operacións como as negociacións con Pemex. Ademais, coa súa incorporación Feijóo salda unha débeda interna de partido: agora xa hai un conselleiro da provincia de Lugo -Conde é de Monforte-.

Agás estes dous cambios, a vida segue igual en San Caetano. Así, ademais de dirixir a Vicepresidencia Rueda continúa como titular de Presidencia, Administracións Públicas e Xustiza, Facenda seguirá baixo a responsabilidade de Elena Muñoz, Agustín Hernández volve encabezar Medio Ambiente, Territorio e Infraestruturas, Rocío Mosquera continúa en Sanidade e Beatriz Mato fai o propio en Traballo e Benestar. Do mesmo xeito, Feijóo tamén deixa intactas as fusións de consellerías decididas a finais de 2011, isto é, Medio Rural e Mar continúan unidas e con Rosa Quintana á fronte e Cultura segue sen departamento propio, xa que segue ligada a Educación con Jesús Vázquez como máximo responsable.

Feijóo, con Francisco Conde nunha imaxe de arquivo © Ana Varela

Despece

  • A liña sucesoria do 'conselleiro de todo'

    Se houbese que definir cun adxectivo o xeito de gobernar amosado por Feijóo no seu primeiro mandato a verba "presidencialista" podería ser unha delas. Durante máis de tres anos o presidente exerceu como unha caste de 'conselleiro de todo', a práctica totalidade das decisións relevantes pasaron directamente polas súas mans e a súa exposición mediática foi abondosísima. Con especial atención para as súas dúas 'fillas predilectas', Infraestruturas e Sanidade, o líder popular reducíu os seus conselleiros en máis dunha ocasión ao papel de secretarios xerais, con pouca proxección e menor peso político no seu gabinete.

    O único membro do Executivo que non responde a ese retrato robot é de Alfonso Rueda, secretario xeral do PPdeG, conselleiro da Presidencia e, dende este domingo, tamén vicepresidente da Xunta. Con este nomeamento Feijóo fai oficial o que veu sendo real estes anos e acrecenta, por enésima vez, o volume das voces que sitúan o seu futuro político alén do Padornelo. Nomeadamente, en Madrid. 

    Para saber se o titular do Goberno galego realiza esta designación para sentar as bases dunha eventual sucesión cómpre atender a un movemento que se producirá -ou non- nos vindeiros días. Se o presidente non obriga a Rueda, como fixo en 2009 con todos os conselleiros e conselleiras, a deixar a acta de deputado no Parlamento para dedicarse só a gobernar, a vía sucesoria estaría un chisco máis aberta. En caso de que Feijóo marchase, non habería problema legal ningún para que o vicepresidente tomase as rendas do país. Pero para que iso pase deben conxugarse multitude de factores no convulso ámbito político estatal, polo que só o tempo dirá se o anteriormente descrito fica ou non no ámbito da política ficción.

    Polo momento, neste mesmo domingo a Cadena SER revelaba, citando fontes do PP, que o futuro de Rueda será máis institucional e menos partidario, xa que Feijóo planea relevalo na secretaría xeral do partido no congreso de xaneiro, cónclave que serviría tamén de homenaxe ao seu número dous polo labor desenvolvido dende 2006, tanto na secretaría xeral como na dirección das campañas electorais. Mentres isto acontece, o xefe de filas dos conservadores mantén o seu gabinete intacto á excepción da sorpresiva marcha de Guerra e coa agardada reafirmación de Jesús Vázquez tras a sentenza do Tribunal Superior de Xustiza que declara "ilegal" parte do denominado decreto do plurilingüismo.

    Feijóo asina o decreto coa nova estrutura da Xunta © Xoán Crespo

  • A oposición ve "continuísmo ao servizo do PP" no terceiro gabinete de Feijóo

    "Continuísmo" foi a verba máis repetida nas primeiras reaccións chegadas dende a oposición parlamentaria tras o anuncio da configuración do terceiro gabinete gobernamental de Alberto Núñez Feijóo. Para o voceiro do PSdeG na Cámara, Abel Losada, o presidente está a poñer Galicia "ao servizo do PP", circunstancia que ve probada no "premio ao comisario político do PP de Galicia, Alfonso Rueda, cunha vicepresidencia".

    Á marxe do ascenso de Rueda e "coa excepción" da remuda de Javier Guerra por Francisco Conde, o voceiro dos socialistas coida que o líder popular optou por "perseverar no erro". Isto veo demostrado no feito de que recunquen os membros do goberno que "levou Galicia á peor situación económica, de xeito particular en materia de servizos públicos e políticas sociais".

    Pola banda do BNG o seu voceiro parlamentario, Francisco Jorquera, interpreta o "total e absoluto continuísmo" de Feijóo como unha "total falta de vontade de rectificación". O nacionalista ve un bo exemplo disto no feito de que Jesús Vázquez continúe na Consellería de Educación "malia á sentenza do TSXG", decisión da que cabe deducir que o xefe do Goberno "avala as políticas contra o galego".

    Do mesmo xeito, abonda, "fronte ao fracaso total e absoluto das políticas de xeración de emprego, segue avalando tamén á señora Beatriz Mato, e así até rematar un repaso polo resto de consellarías". "O señor Feijóo non ten un plan B -afirma Jorquera- só sabe facer recortes e seguirá apostando por estas políticas antisociais e que non serven para saír da crise e por un goberno que xa demostrou a súa perda de impulso político e incapacidade para facer fronte aos problemas e necesidades do noso país", conclúe.

    Tamén Alternativa Galega de Esquerda "lamentou a composición do goberno anunciada polo presidente", aínda que, din, "era o esperable despois do seu lamentable discurso de investidura". A vicevoceira de AGE na Cámara, Yolanda Díaz, amósase convencida de que "con este goberno de continuidade" se "seguirá atacando a sanidade, a educación pública, a cultura e a lingua de Galiza, como fixo o PP durante os últimos catro anos con políticas antisociais". "Os únicos aos que beneficia é aos de arriba, aos que atacan a cidadanía do común", conclúe.

    Losada, en rolda de prensa CC-BY-NC-SA PSdeG
    Francisco Jorquera CC-BY-NC-SA BNG
    Beiras e Yolanda Diaz Dominio Público AGE

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza