0 Gardados para despois

O PP impide cobrar máis impostos á banca e ás rendas superiores a 100.000 euros

David LombaoDavid Lombao | @davidlombao


Non haberá máis impostos para a banca nin para as persoas residentes en Galicia que cobren máis de 100.000 euros ao ano. A maioría absoluta do PP impediu que o derradeiro debate de política xeral da lexislatura rematase coa aprobación dunha lei para "establecer unha imposición sobre os depósitos da banca", proposta polo PSdeG, e coa "elevación dos tipos no treito autonómico do IRPF para rendementos superiores aos 100.000", como reclamaba o BNG. Ben ao contrario, a aposta dos populares na parte máis concreta foi sacar adiante sen modificacións o anuncio realizado vinte e catro horas antes polo presidente da Xunta, instando o Goberno galego a iniciar a tramitación dunha Lei do Emprendedor na que se inclúan baixadas de impostos para, segundo o grupo que sustenta o Goberno, contribuír á "creación de emprego".

Concretamente, cando estea aprobada a nova lei deduciranse ata 600 euros no IRPF "ás persoas que causen alta por primeira vez no censo de emprendedores" e quen "invista en accións ou participacións sociais de novas entidades" poderá deducir ata 8.000 euros no imposto da renda. Ademais, o imposto de sucesións e doazóns desaparece nun 95% nas achegas de cartos de pais a fillos para crear "unha empresa ou un negocio" e o imposto de actos xurídicos elimínase "na transmisión de inmobles destinados a local comercial" e nos "préstamos para adquirilos". Estas iniciativas non contaron co apoio da oposición, xa que tanto socialistas como nacionalistas coidaron que, en plena crise, urxe "incrementar a recadación" da Xunta para así evitar novos recortes.

O Goberno galego reclamará ante o Banco de España que Novagalicia Banco devolva os cartos das preferentes

Fronte a este desacordo económico, os grupos acadaron a unanimidade nunha trintena de proposicións a comezar por un dos asuntos que máis presente estivo ao longo do pleno de política xeral: as participacións preferentes de Novagalicia Banco, emitidas polas antigas Caixa Galicia e Caixanova. Así, os tres grupos combinaron as súas tres iniciativas na materia para elaborar unha transacción na que se chama a Xunta a "promover solucións aos titulares das participacións preferentes" que mercaron estes produtos financeiros "sen información axeitada". Nomeadamente, o Goberno galego terá que reclamar ante o Banco de España e a Comisión Nacional do Mercado de Valores que "promova" ou "preste" as "autorizacións necesarias" a Novagalicia Banco "e ao resto de entidades financeiras" para que os investidores poidan recuperar os seus cartos. Asemade, o Instituto Galego de Consumo asesorará os afectados e remitirá semestralmente un "balance" ao Parlamento sobre o "número de afectados e de reclamacións presentadas".

Lei de Publicidade , Parador de Muxía e veto aos anuncios de prostitución

A unanimidade da Cámara avalou tamén que a Xunta inicie os trámites dunha lei que xa fora prometida polo actual Executivo e tamén polo bipartito, a de publicidade institucional, considerada "urxente" polo gabinete de Feijóo no inicio da lexislatura pero que aínda non comezou o seu percorrido parlamentario. Neste caso a instancias dunha proposta do PSdeG os populares comprométense a que "no actual período de sesións", isto é, antes de xullo, un texto legal "remate coas prácticas opacas e regule a relación dos medios de comunicación e o poder político". 

O PP comprométese a que a Xunta aprobe a Lei de Publicidade Institucional e reclame o Parador de Muxía

Co mesmo apoio dos tres grupos saíu adiante outra proposta socialista relacionada cos medios de comunicación, a relacionada a tentar rematar cos anuncios de prostitución. Aínda que sen demasiada concreción, o PP asume o compromiso de, dende a Xunta, "promover a eliminación" deste tipo de anuncios tanto "na Internet" como "nos medios de comunicación" con difusión en Galicia. Tamén en materia de igualdade houbo acordo de todo o arco parlamentario en torno a unha proposta do PSdeG que, atendendo aos plans do Goberno central, podería ter pouco percorrido, dado que se relaciona coa lei do aborto que o ministro Ruiz-Gallardón prevé refomrar. Con todo, do debate de política xeral sae o compromiso de que o Executivo de Feijóo elaborará e remitirá ao Parlamento "un informe" sobre a aplicación desta lei, detallando "como mínimo" as "medidas de educación afectivo-sexual" postas en marcha, o uso dos "métodos anticonceptivos" ordinarios e "de emerxencia" e "todo o relacionado cos embarazos non desexados e a interrupción voluntaria do embarazo".

Aínda que con algunha modificación tamén saíu adiante a proposta socialista para "instar á Xunta a esixir do Goberno de España a inmediata execución das obras do Parador de Turismo de Muxía", cuxa paralización anunciou este martes o ministro de Industria, José Manuel Soria. Fronte a estas e outras iniciativas do PSdeG apoiadas por todos os grupos o PP só permitiu que saíse adiante unha única das rexistradas polo BNG, segundo a cal o Goberno galego reclamará do Estado a transferencia das competencias en materia de formación profesional continua.

Coa túa achega fas posible que sigamos publicando novas coma esta.

Ana Luisa Bouza: "Galiza está na UCI e vostedes recéitanlle ibuprofeno"

As propostas de resolución dos grupos foron debatidas nunha sesión con dúas debutantes no debate de política xeral, a popular Marta Rodríguez Arias e a nacionalista Ana Luisa Bouza, que protagonizou unha enérxica intervención malia ao feito de ser o primeiro pleno de relevancia no que aborda asuntos alleos á área sanitaria. Nunha sesión na que o presidente da Xunta, Alberto Núñez Feijóo, se ausentou intermitentemente, Bouza, apoiou o seu discurso na premisa de que "Galiza está mal". O país "está na UCI", exemplifica a nacionalista, pero o Goberno só lle receita "paracetamol".

Deste gráfico xeito ilustra a parlamentaria un panorama no que Feijóo, di, debe ser "responsable de diagnosticar correctamente" os problemas de Galicia "e sobre todo de prescribir unha terapia útil para que Galiza recupere a saúde" tras chegar ao Goberno "montado no cabalo da crise". Neste escenario, Bouza recoñece nos populares a uns "mestres na construción do relato" por ter tentado capitalizar o debate co "anuncio da fusión de dous concellos", "digno de estudo na Facultade de Ciencias da Información". Tratábase, recoñece Bouza, dun "titular sen arestas, na liña da austeridade", con Galicia como "pioneira" e "exemplo" de España. Pero, a xulgar polo acontecido horas despois, di, non foi máis ca "unha manobra de distracción para taparlle as vergoñas", pero "o rei está espido diante da cidadanía".

Sobre estas liñas Ana Luisa Bouza defendeu as propostas de resolución do Bloque con escasa esperanza de que o PP as aprobase, porque "a súa acción de goberno non ten corazón, non pensa na xente, non se preocupa nin se ocupa dos problemas da xente" e ademais, "carece de ideas útiles".

A outra debutante no debate, Marta Rodríguez Arias, realizou un discurso atado á intervención de Feijóo con escasas mencións ás súas propostas de resolución e numerosas ao goberno bipartito da Xunta. Feijóo, di, "non veu mentir" ao Parlamento, senón que realizou un balance "obxectivo" do mandato mentres a oposición se "dedicou a asustar a cidadanía". Defendéndose das acusacións de privatización, unha "cantinela tan insolvente como cansina", Arias fixo notar o seu debut multiplicando case por dous o gasto da Xunta na Lei de Dependencia e acusando, ao mesmo tempo, ao bipartito de "ter sen atender a todos os dependentes".