"O PP xa pacta un posible goberno con Democracia Ourensana"

Mitin do BNG en Ourense CC-BY-NC-SA BNG

O ruxerruxe levaba a circular varios días pola cidade e nas últimas horas foi expresado ante a prensa. "Jesús Vázquez e o Partido Popular xa pactan un posíbel goberno con Democracia Ourensana para despois do 24-M". Quen o afirma é Susana García, candidata do BNG á alcaldía de Ourense, que ademais advirte de que o xermolo dun eventual bipartito para elevar a Jesús Vázquez á alcaldía co apoio da formación local de Gonzalo Jácome responde a intereses espúreos e, nomeadamente a intereses urbanísticos.

"Todo o mundo sabe en Ourense que o PP quere chegar ao Goberno a toda costa para paralizar o PXOM" e, acto seguido, "volver á especulación e ao control de recursos públicos", asegura García. E para facelo, advirte, o ex conselleiro de Educación está disposto a recorrer a "pactos con formacións políticas con nula base democrática" como DO, cuxo candidato "se nomea a si mesmo, ignorando calquera proceso participativo, e di ter un programa oculto".

Dadas as circunstancias, sinala a nacionalista, "semella que ese programa oculto ao que se refire Democracia Ourensana é pór no goberno aos amigos dos construtores e aos que recortan servizos e secan as Burgas". Neste contexto, García mantén que a "única alternativa que pode frear un goberno do PP é o BNG", que xa "o fixo nestes dous últimos mandatos" e para o que reclama "máis forza e representación" como "garantía de que non volva gobernar o PP".

García: "Semella que o seu programa oculto é pór no goberno aos amigos dos construtores e aos que recortan servizos e secan as Burgas"

A acusación da candidata nacionalista foi negada por Vázquez nunha entrevista en Onda Cero e tamén por Jácome, que a cualifica de "calumnia" e "irresponsabilidade democrática". "Isto amosa unha cortedad de miras tremenda de alguén que se postula como alcaldesa", asegura o líder de DO, que nesta campaña pide o voto baixo o lema empregado polo PP nas autonómicas de 2009. Segundoo Jácome "votar BNG e PSOE é o mesmo, mentres que votar Democracia Ourensana é votar independencia" porque "pode pactar con calquera forza se esta respecta as liñas mestras do noso programa". "Gato branco, gato negro, o importante é que cace ratos", ilustra.

"PP e DO negan o pacto, logo conversan ata altas horas da madrugada sobre se vai facer sol ou chuvia?", preguntábase horas despois o BNG Ourensán. Os populares e a formación local, manteñen, protagonizaron "conversas prolongadas na noite ourensá". Ao seu xuízo isto acontece porque planean "regalarlle a cidade ás grandes construtoras e especuladores" se son quen de sumaren a maioría absoluta.

Vázquez, este mércores no mitin no que estivo apoiado por Feijóo CC-BY-SA PPdeG

Despece

  • O BNG apela á súa traxectoria "na defensa de Santiago" fronte a un Feijóo "delirante"

    O BNG tiña este mércores unha das citas máis relevantes da súa campaña urbana. O escenario era en pleno centro de Santiago, na Praza de Cervantes, e a meteoroloxía estivo a piques de obrigar a mudar de plans. Pero, apenas vinte minutos antes do inicio do acto, o que era un ceo gris e de chuvia ameazante tornou nun ceo despexado polo vento do norte que, en verbas dalgunhas das persoas asistentes, obrigaba a darlle ao acto un plus de "calor humana". Así, ao son dun grupo de gaitas, o Bloque reivindicou a súa bagaxe no Concello compostelán fronte a un Feijóo "delirante".

    O candidato da formación frontista á alcaldía, Rubén Cela, estivo apoiado polo portavoz nacional, Xavier Vence, que dirixiu as súas críticas cara a dúas frontes: a do PP e a das mareas. "Compostela ten a memoria fresca para ver o contraste entre unha acción de goberno como a do BNG e un PP que sumiu Santiago no desgoberno, na corrupción e, por que non dicilo, na vergoña colectiva", motivos dabondo ao seu xuízo para que, a partir do domingo, "a cidadanía poña ao PP onde lle corresponde, no faiado dos trastos vellos", para o que agarda contar co apoio mesmo de "votantes moderados do PP".

    Vence pide apoio para o Bloque fronte ao PP e tamén fronte aos "conglomerados conxunturais" que, ao seu xuízo, supoñen as mareas

    O propio Alberto Núñez Feijóo, asegura Vence, ve próximo o cambio de goberno na capital galega e por iso está "nervioso, clamando por maiorías e vociferando discursos delirantes contra o radicalismo". "Xa non sabe onde pisa, uns días arremete contra o Bloque e outros, contra Podemos". "En que país vive Feijóo, acaso viu algunha candidatura de Podemos no noso país?", pregúntase mentres, non obstante, envía dardos tamén contra os "conglomerados conxunturais" que, ao seu xuízo, supoñen candidaturas como a de Compostela Aberta. "A cabeza -ironiza- serve para algo máis que para termar do gorro".

    Tamén o candidato á alcaldía apela á experiencia do BNG, formación que "non é paracaidista na política municpal de Compostela", ata o punto de que "non poderíamso comprender algúns aspectos claves de Santiago sen o paso do BNG polo goberno municipal". "Non podemos entender Galiza sen a súa capital, pero tampouco Santiago sen Galiza" e por iso, advirte, cómpre "unha estratexia nacional". "Santiago -conclúe o candidato- non precisa dunha pseudo rexeneración democrática, precisa dunha auténtica revolución democrática".

    Mitin do BNG, este mércores en Santiago CC-BY-NC-SA BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza