0 Gardados para despois

O Supremo reafirma a desfeita que supuxo anular o concurso eólico do bipartito

Miguel PardoMiguel Pardo | @depunteirolo


O Tribunal Supremo volve confirmar a desfeita cometida pola Xunta de Feijóo coa anulación da repartición eólica do bipartito. O alto tribunal estatal vén de desestimar o recurso de casación que o Goberno galego impuxera contra a sentenza do Tribunal Superior de Xustiza de Galicia (TSXG) que xa declarara ilegal a suspensión do procedemento de autorización de parques eólicos. Xa que logo, a xustiza confirma o ditame do Superior galego e a anulación da decisión adoptada en agosto de 2009 polo daquela conselleiro de Industria, Javier Guerra, de paralizar o procedemento, unha actuación que definira como "ilegal". 

O Supremo desestima o recurso de casación que a Xunta impuxera contra a sentenza do TSXG que declarara ilegal a suspensión do concurso eólico

Aquela sentenza do 24 de xullo de 2012 do TSXG atendera o recurso contencioso-administrativo interposto pola empresa Aucosa Eólica -xurdida das conserveiras Alfageme, Thenaise Provote, Albo e Pita Hermanos- que, con 216 megavatios, fora a segunda maior adxudicataria na repartición levada a cabo polo goberno bipartito. A Xunta interpuxo recurso de casación contra aquel ditame que estimara en parte o recurso da compañía e que declarara a nulidade da suspensión daquelas concesións. Consideraba a Administración autonómica que a sentenza non foi daquela "suficientemente motivada" e que "non se razonara en absoluto por que se apreciara desviación de poder". 

O Supremo, non obstante, aclara que o ditame do TSXG inclúe xa "unha resposta motivada e non abitraria ou irrazoable", nega que se fixese unha "parca referencia", como dicía o Goberno, e insiste en que "abonda tal constatación para desestimar" ese motivo do recurso. Do mesmo xeito, inadmite tamén o outro argumento empregado pola Xunta e ditamina que non hai lugar ao recurso de casación, ademais de impoñer as costas á parte recorrente ata un máximo de 4.000 euros. Xa que logo, e segundo a sentenza á que tivo acceso Praza, o ditame do Superior galego era o axeitado e a ilegalidade daquela decisión da Administración quedaría reafirmada. 

A Xunta de Feijóo, que empregara o concurso eólico como arma electoral, suspendeuno sen anular o decreto que o sustentaba

Daquela, a Xunta de Feijóo, que acababa de chegar ao poder, suspendeu aquel concurso eólico sen anular o decreto que o sustentaba, argumentando o difícil encaixe queu tería un anteproxecto de lei que non entrara en vigor aínda. Fíxoo logo de vencer nunhas eleccións nas que aquel concurso eólico e o irreal "conflito lingüístico" foran as súas principais armas electorais. 

O TSXG consideraba que o Goberno galego incorrera en desviación de poder ao adoptar unha medida cautelar non para asegurar a eficacia dunha resolucion, "senón para un fin distinto". "Baixo a escusa de evitar a consolidación dunha suposta situaicón ilegal" que "non existe", dicía a sentenza, "pódese garantir, por razóns de oportundiade, a iniciativa lexislativa da Administración autonómica, sen ter que afrontar as consecuencias que se derivan da aplicación da normativa en vigor", di. En definitiva, a Xunta puido derrogar o decreto ou revisar a selección dos proxectos, pero optou por ir máis aló e suspender un concrso eólico que pode provocar o pagamento de indemnizacións. 

O TSXG xa declarara "ilegal" aquela suspensión e acusara a Xunta de "desviación de poder" e de provocar "inseguridade xurídica" no sector

Ao facelo así, a Xunta foi contra "o principio de seguridade xurídica" e contra a "confianza lexítima no actuar da Administración", ao optar por "solucións ideadas á marxe de reformas lexislativas aínda non operativas". Ademais, a sentenza do TSXG asegura tamén que nin os "indicios de ilegalidade" do decreto do bipartito nin a "incompatibilidade no novo modelo eólico" do concurso anulado, argumentos empregados polo Goberno de Feijóo, "xustifican a medida provisional adoptada". 

Agora, e máis aló da transcendencia que teñan ou non as peticións de indemnizacións, esta nova -e definitiva- chamada de atención á actuación da Xunta confirma o erro e a ilegalidade daquela decisión. As empresas tiñan dereito á resolución das solicitudes e ao outorgamento das autorizacións cando o proceso acabou por suspenderse. Logo, todo aquilo quedou en nada e o potencial eólico de Galicia, baixo mínimos e con apenas adxudicacións. BNG e AGE xa anunciaron que preguntarán a Feijóo sobre a devandita sentenza do Supremo na sesión de control da vindeira semana, polo que prevén rexistrar xa senllas preguntas orais urxentes para o próximo pleno. 

A sentenza definitiva do Supremo podería traer consecuencias económicas á Xunta; BNG e AGE xa anuncian preguntas a Feijóo na vindeira sesión de control

Non obstante, son varias as fontes coñecedoras do sector que aseguran que esta ratificación do Supremo terá consecuencias relevantes para a Xunta en forma de importantes responsabilidades patrimoniais e a esixencia de indemnizacións económicas, non só da empresa que gañou esta batalla xudicial contra a Xunta, senón de todas aquelas que, por diferentes motivos, non lograron que prosperase os seus recursos. 

Así, o grupo San José xa reclamou nos tribunais os megavatios obtidos no concurso do goberno bipartito e defende que "ten dereito a que os proxectos sexan tramitados e autorizados", polo que mantén varios recursos no TSXG. Enerxías Renovables de Galicia, a firma da construtora para aquel proceso, resultara adxudicataria de 142 megavatios. 

De feito, o propio auto do Supremo no que admitía a trámite o recurso de casación advertía que o obxecto do recurso era "de contía indeterminada, xa que o constitúe a suspensión do procedemento de outorgamento de autorizacións de instalacións de parques eólicos, de modo que a entidade do procedemento ao que se refire a actuación administrativa impuganda, o número de empresas afectadas e as idemnizacións ás que se daría lugar permite concluír que a contía do preito supera amplamente a establecida legalmente para deixar expedita a vía casasional". 

Coa túa achega fas posible que sigamos publicando novas coma esta.

Lapelas Versión despregada

AGE esíxelle a Feijóo responsabilidades políticas pola sentenza

O grupo parlamentario de AGE esixe a Núñez Feijoo que asuma responsabilidades políticas pola anulación do concurso eólico do bipartito, unha vez que se coñece a sentenza do Tribunal Supremo, adiantada por Praza, que desestima o recurso da Xunta e ratifica a sentenza do TSXG que consideraba ilegal a anulación por parte do goberno do PP.

"Non só demostra que o decreto eólico era legal, senón que a decisión de suspender o concurso foi ilegal", di AGE

"Non só significa que o decreto regulador do aproveitamento da enerxía eólica era axustado á legalidade, senón que a decisión do goberno do PP de suspender o concurso eólico foi ilegal, e iso con independencia das consideracións sobre o devandito concurso , en especial sobre a súa incidencia en espazos protexidos, que AGE non comparte", di. 

AGE lembra que na comparecencia de Francisco Conde no pleno do Parlamento de Galicia, xa advertira que esta sentenza "poderá ter importantes consecuencias económicas para a Xunta, xa que se abre a posibilidade de que todas as empresas participantes no concurso anulado presenten reclamacións esixindo cuantiosas responsabilidades patrimoniais e indemnizacións económicas". Aínda que o mesmo TSXG noutras sentenzas ten confirmado a decisión de suspensión do concurso eólico, o deputado Antón Sánchez avisa que “ao confirmar o Supremo a sentenza do TSXG, ratificando a anulación da suspensión do concurso eólico, todos os participantes do concurso eólico do bipartito poderán reclamar indemnizacións”.

Agora, "todos os participantes no concurso eólico poderán reclamar indemnizacións", lembra Antón Sánchez

Antón Sánchez lembra tamén que na sentenza do TSXG, anulatoria da decisión do concurso que suspendeu a Xunta, o tribunal entendeu que o goberno da Xunta tiña incorrido  en “desviación de poder” ao suspender ilegalmente  o concurso eólico.  "Esta decisión xudicial  confirma o ilegal e chapuceiro proceder do daquela conselleiro Javier Guerra e de Núñez Feijoo", polo que "deberá de levar aparellada a asunción de responsabilidades políticas por parte deste goberno que condenou, coas súas decisións,  ao sector das renovables á  parálise e á destrución de emprego".

Jorquera: "Confírmase outra das tres mentiras coas que Feijóo se empoleirou á Xunta"

O voceiro parlamentario do BNG, Francisco Jorrquera, cre que a sentenza do Supremo que ratifica a ilegalidade da suspensión do concurso eólico levada a cabo pola Xunta de Feijóo en 2009 "confirma outra das tres mentiras coas que o actual presidente se empoleirou ao Goberno"

"A foto dun barco, non a súa cun delincuente; a imposición do galego e a ilegalidade do concurso eólico foron as tres mentiras coas que Feijóo chegou ao poder"

"Unha foi a da foto dun barco moi anterior en tempo á data de publicación e que non era precisamente como as fotografías que el mesmo gardaba e nas que saía cun delincuente; a outra a da mentira da imposición do galego en Galiza; e a terceira a da ilegalidade do concurso eólico do bipartito, outra mentira ue agora a xustiza volve confirmar", asegura Jorquera en declaracións a Praza Pública, tras insistir tamén en que este ditame do Supremo volve poñer de manifesto a "irresponsabilidade" que o Gobenro galego amosou cara a un sector "cun enorme potencial económico e de emprego en Galicia" e que, "agora, coas decisións de Feijóo e as do Goberno de Rajoy avaladas pola Administración galega, quedou paralizado". 

"As decisións de Feijóo provocaron a parálise do sector eólico", lembra Jorquera

Ademais, o portavoz parlamentario do Bloque lembra que esta "irresponsabilidade nas decisións" por parte do Executivo de Feijóo podería provocar agora "posteriores consecuencias" en forma de importantes reclamacións económicas por parte das empresas adxudicatarias de megavatios e prexudicadas coa devandita decisión ilegal.