Os propietarios reclamaron en 2012 ao Goberno galego polo emprazamento no seu terreo anos antes dunha caseta e torre de telecomunicacións, pero a Xunta non o expropiou ata 2020 e agora terá que pagarlles o equivalente ao alugueiro acumulado
O Tribunal Superior de Xustiza de Galicia (TSXG) vén de condenar a Xunta a pagar aos propietarios dun terreo no monte Barbeito, en Arteixo, uns 60.000 euros, o equivalente ao alugueiro -máis a inflación- que deixaron de percibir durante os máis de oito anos que estivo "ocupado ilegalmente" por unha caseta e antena de telecomunicacións levantadas pola empresa pública Retegal.
No proceso xudicial o Goberno galego argumentou que era "dubidoso e meramente continxente" o suposto dano que reclamaban os propietarios, pero o tribunal ratificou que o terreo estivo "efectivamente ocupado" pola empresa da Xunta mentres outras empresas de telecomunicacións pagaban alugueiro por outras instalacións similares nas proximidades.
Segundo os feitos relatados na sentenza agora feita pública, do pasado 4 de maio, a Xunta ocupou en 1987 "en precario" 72 metros cadrados de monte propiedade dos demandantes coa construción dunha caseta e torre de telecomunicacións da empresa pública Retegal. En 2012 os propietarios reclamaron os seus dereitos cun burofax a Retegal e a Xunta decidiu expropiar o terreo, pero non culminou ese proceso e non pasou a ser a lexítima propietaria ata máis de oito anos despois. Nese momento os propietarios reclamaron ao Goberno galego
A Xunta argumentou que era "dubidoso" que a ocupación danase os propietarios, pero o TSXG di non entender esa postura xa que "o terreo estivo efectivamente ocupado ilegalmente" mentres na mesma zona outras empresas pagaban por instalacións similares
Durante o proceso xudicial a Xunta rexeitou que a súa ocupación supuxese danos indemnizables aos propietarios polo que deixaron de ingresar co argumento de que estes "non poden ser dubidosos e meramente continxentes". Pero o TSXG "non entende que os danos do caso sexan dubidosos" xa que "o terreo dos demandantes estivo efectivamente ocupado pola caseta e torre de telecomunicacións ilegalmente ata a súa expropiación, que se levou a cabo precisamente para a regularización" das instalacións.
O tribunal lembra, e a Xunta non discutiu, "que na mesma zona existen outras casetas e torres xestionadas por distintas empresas", polo que mira para elas á hora de establecer canto podían cobrar os propietarios pola parcela ocupada pola administración galega.
Así, un terreo de 140 metros cadrados fora alugado por mil euros ao mes, e outro de 25 metros por 450 euros ao mes. "A expectativa de percibir ganancias polo alugueiro do terreo dos demandantes é unha expectativa certa", conclúe o tribunal, polo que establece que para os 76 metros cadrados en litixio o alugueiro correspondente sería de 542 euros mensuais.
Fronte á demanda dos propietarios que remontaba o dano á primeira ocupación do terreo en 1987, polo que reclamaban 194.000 euros, o tribunal considera que o cómputo debe iniciarse en 2012, momento da súa primeira reclamación. Así que é desde ese momento desde o que a Xunta debe asumir o alugueiro, que debe ser tamén actualizado coa inflación rexistrada neses máis de oito anos, o que sitúa a indemnización total en arredor de 60.000 euros. O TSXG tamén condena a Xunta ao pagamento das costas xudiciais ata un máximo de 1.500 euros.
