0 Gardados para despois

Galícia de Bahia: o equipo dos galegos no Brasil cumpre 85 anos

Miguel PardoMiguel Pardo | @depunteirolo


No seu escudo loce a cruz de Santiago, como o Celta, o Compostela ou o Racing de Ferrol. Tamén a bandeira galega, como o Deportivo, co que chegou a compartir uniforme. Con diferentes versións ao longo da súa historia pero sempre coas cores azul e branca presentes, "em referência à bandeira da Galícia". É "o clube dos galegos no Brasil", un histórico equipo que celebra este ano o seu 85º aniversario loitando por recuperar glorias pasadas e por difundir a súa historia no país no que se inspira. 

O Galícia de Bahia celebra o seu 85º aniversario e busca recuperar glorias pasadas e difundir a súa historia no país que o inspira

"Todos os galegos e pessoas de origem galega da Bahia adoptam torcer pela equipa, ademais de muitos outros aficionados sem relação com Galiza", explica o seu presidente, de nome ben galego, Manolo Muíños. Os seus pais son orixinarios do concello da Lama. Foron parte dos máis de 15.000 emigrantes que chegaron a este Estado brasileiro entre finais do século XIX e a primeira metade do XX, a inmensa maioría procedentes deste e doutros catro municipios máis: Ponte Caldelas, Pontevedra, Fornelos de Montes e Pazos de Borbén. Un daqueles chegados ao Brasil, Eduardo Castro Iglesias, foi un dos impulsores e primeiro presidente da entidade. 

Diferentes uniformes do Galícia de Bahia ao longo da súa historia / © Galícia Esporte Clube

"O clube foi fundado por imigrantes galegos na procura de se inserir na comunidade baiana, foi ganhando adeptos e as famílias foram passando a sua paixão de pais a filhos, criando um afecto muito grande pela entidade em todo o Estado", explica Muíños, que aclara que o Galícia é tamén "a segunda equipa de muitos baianos que torcem pelos dois grandes da zona: o Vitória e o Bahia". 

O club foi fundado en 1933 por emigrantes galegos que impulsaron un forte asociacionismo cultural e deportivo en Salvador

O Galícia Esporte Clube foi fundado no primeiro de xaneiro de 1933 por galegos que desenvolveron unha importante actividade cultural e social en Salvador, capital do Estado, onde tamén crearon hospitais, institutos e diferentes sociedades. O seu primeiro uniforme, habitual tamén noutras décadas, era camisa branca e banda azul, a imitación da bandeira galega. Ou ao revés, coa franxa branca e o fondo azul. 

Nun país inmenso, onde ata os anos 60 non se instaurou unha competición nacional e onde ata hai pouco non se celebraba unha Liga brasileira como tal, o Galícia presume de ser o primeiro tricampeón estatal en Bahia. Gañou o título xa en 1937 e logo tres seguidos entre 1941 e 1943. Foi subcampión cinco veces entre mediados da década dos 30 e dos 40, a súa época dourada. Volveu levantar o título en 1968 e acabou segundo catro veces máis, a última hai 23 anos. Da súa canteira xurdiron futbolistas como Dante, ex-central do Bayern de Múnic e internacional co Brasil no último Mundial.

O Galícia foi o primeiro tricampeón bahiano, nos anos 40, e é un dos clubs históricos no Estado

Daqueles antigos triunfos xurdiu un dos seus alcumes, Demolidor de Campeões, --tamén lle chaman granadeiros ou azulinos-- e un prestixio que non se perdeu nunca, sobre todo entre a comunidade galega no Brasil. A súa vinculación co país é intensa. O estadio, no barrio de Brotas de Salvador, chámase Parque Santiago, e nas súas instalacións inclúese unha capela "para adorar ao apóstolo Santiago". "Case todos aqui na entidade somos galegos, temos a dupla nacionalidade e mantemos aprecio por Galiza; está no nosso sangue e vem de sempre", explica Muíños, que leva apenas catro meses no cargo. 

Parque Santiago, sede do Galícia, en Salvador de Bahia / © Galícia Esporte Clube

Entre os seus obxectivos, lograr o ascenso á primeira división bahiana, loitar polo título e volver xogar o campionato brasileiro nun futuro. "O sonho é ganhar o campeonato estadual de novo", di. Ademais, busca tamén difundir a historia e afección polo equipo entre os galegos de alén do Atlántico e procura apoios na terra de seus pais, que visitou hai pouco e na que se reuniu con directivos do Pontevedra, Celta ou Lugo, entre outros, ademais de con diferentes empresas, institucións ou co secretario xeral de Emigración, Antonio Rodríguez Miranda. Repetiu a viaxe que hai uns 25 anos fixo o propio club, cando xogou varios partidos amigables contra equipos galegos. "Foram muitos os contactos e agora aguardamos ver os frutos, eu são optimista", explica. 

O presidente da entidade viaxou a Galicia na busca de apoio institucional, empresarial e doutros clubs galegos

Entre o avanzado, as axudas que a Xunta concede a entidades que difunden a cultura galega no exterior, un proxecto para intercambiar xogadores co Pontevedra e conversas cunha marca deportiva.  Pero, sobre todo, a intención de Muíños de difundir e promover en Galicia a historia dun club histórico que leva o nome e a bandeira do país na terra onde o fútbol é máis que unha relixión. "Muitos galegos não sabem que aqui têm a sua equipa", explica, asumindo o descoñecemento que da entidade se ten a tantos quilómetros. 

"Muitos galegos não sabem que aqui têm a sua equipa", di Muíños

A segunda división do campeonato bahiano comezou neste mes de marzo con vitoria para o Galícia, que nas últimas xornadas sufriu varias derrotas. Sexa o que for, como cada fin de semana que hai partido, o himno da entidade galiciana volveu soar, cantando polo "Demolidor de Campeões, granadeiro da Cruz de Santiago, clube querido com muitas tradições": "O Galícia tem nome na história, no futebol tem títulos de glória. Salve, salve, pendão galiciano, alegria do futebol baiano". 

'Torcedores' do Galícia de Bahia

Dante, internacional brasileiro, ex-xogador do Galícia

O presidente do Galícia reuniuse coa directiva do Pontevedra CF

Manolo Muíños, presidente do Galícia, co secretario xeral de Emigración, Rodríguez Miranda

'Torcedor' do Galícia

Equipo feminino de rugby do Galícia

Equipo feminino do Galícia de Bahia

Parque Santiago, estadio do Galícia de Bahia

Canteiráns do Galícia de Bahia

Diferentes uniformes do Galícia nos últimos anos

Formación antiga do Galícia

O Galícia cumpre 85 anos neste 2018

O Galícia celebrando o ascenso á Primeira División de Bahia en 2013

Formación do Galícia en 1942

Unha formación do Galícia nos anos 30, ao pouco da súa fundación

Capela de Santiago, nas instalacións do Galícia

Celebración de seareiros do Galícia

O Galícia de Bahia celebra o seu 85º aniversario

Coa túa achega fas posible que sigamos publicando novas coma esta.