O desemprego que non conta: así 'desaparecen' persoas paradas do rexistro oficial

Dominio Público Praza Pública

O paro rexistrado subiu en Galicia en 4.604 persoas durante o pasado outubro con respecto ao mes anterior, segundo os datos feitos públicos este xoves polo Ministerio de Emprego. A fin definitiva dos efectos da época estival e de milleiros de contratos no sector servizos volve incrementar o desemprego cun aumento do 2,4%, máis de un punto superior á suba estatal.

A fin do efecto estival provoca a suba do paro rexistrado en 4.604 persoas en Galicia durante o mes de outubro

Así, a cifra de parados rexistrados en Galicia sitúase preto dos 200.000 (198.940), que son 23.152 menos que hai un ano. Mentres, o número de afiliados á Seguridade Social descende en 1.335 en outubro pero increméntase tamén con respecto a hai un ano en 20.346, situándose en pouco máis de 971.500 cotizantes. Esta diferenza duns tres milleiros entre a redución do paro e a alta de traballadores é debido a varias circunstancias, como a emigración e fuxida da poboación activa, o desánimo que leva a desapuntarse das listaxes de demandantes de emprego ou o paso á economía en b. Non todo o descenso do paro rexistrado equivale a novos postos de traballo. No entanto, no conxunto do Estado esta tendencia é á inversa, o que indica claramente a febleza do mercado laboral galego.

Porén, a conta oficial do paro rexistrado volve deixar fóra determinados colectivos, algo que sucede desde hai máis dunha década por un cambio na cuantificación, e que agocha un bo número de parados das estatísticas. De feito, os últimos datos da EPA -Enquisa de Poboación Activa, realizada con entrevistas en fogares e cuxas cifras son consideradas máis fiábeis a nivel autonómico e estatal en todos os ámbitos económicos- achéganse máis aos números reais. A do terceiro trimestre situaba o número de parados en Galicia en 206.700. O número total de demandantes de emprego non ocupados nas oficinas de emprego do país é de 213.708. De ter en conta, tamén, o total de inscritos sen excluír aqueles que solicitan determinadas condicións especiais para acceder ao emprego, a cifra total superaría os 230.000. 

O total de demandantes de emprego en Galicia supera os 230.000 de incluír todos os que buscan un traballo nas antigas oficinas do INEM

De onde sae esta importante diferenza? De reparar nas estatísticas oficiais do Ministerio, o número total de demandantes de emprego nas oficinas do Servizo Público de Emprego sitúase actualmente nos 257.420 persoas. Para limitalo ás desempregadas, habería que prescindir dos demandantes de emprego ocupados, uns 26.526 en Galicia, que teñen un traballo pero están buscando outro e inscritos nas antigas oficinas do INEM. 

Pero as estatísticas oficiais do paro rexistrado non só omiten -por razóns obvias- quen está xa a traballar, senón tamén outros colectivos. Para empezar, aqueles que se inclúen entre os de "dispoñibilidade limitada", desempregados que teñen intención de traballar pero que esixen unhas condicións determinadas en canto ao horario, xornada ou localización, como aqueles que solicitan un traballo de menos de tres meses ou de xornada reducida de menos de 20 horas semanais. Tal e como especifica o Ministerio, tamén se refire a aqueles "demandantes de emprego que indican na súa solicitude condicións especiais de traballo", como por exemplo "só a domicilio, teletraballo ou no estranxeiro". En Galicia, son 17.186 persoas as que se atopan nesta situación. 

As estatísticas oficiais exclúen dos parados rexistrados aqueles que piden un traballo conxuntural, de xornada reducida ou nun lugar específico

O resto de desempregados situaríanse na categoría de Demandantes de Emprego Non Ocupados (DENOS), na que se inclúen os considerados parados rexistrados a efectos das estatísticas oficiais difundidas logo polas Administracións, pero tamén outro grupo amplo de persoas sen traballo que non contan como desempregados oficialmente. En total, os DENOS en Galicia suman 213.708 persoas. 198.940 delas son as que este mesmo xoves se veñen de sinalar como o número total de parados rexistrados. O resto, 14.768 que se inclúen non grupo de non ocupados / Teass.

As cifras da Administración exclúen do dato do paro case 15.000 galegos que acoden a cursos de formación ou buscan emprego mentres estudan

Neste último colectivo inclúense desempregados que están facendo algún tipo de formación das oficinas de emprego, e que na maioría dos casos son obrigatorios para acceder a determinados tipos de axudas. Tampouco se contabilizarían entre os parados rexistrados os que buscan o seu primeiro emprego durante ou tras finalizar os estudos ou, no caso doutros territorios, traballadores beneficiarios do subsidio agrario. 

Alén disto, tampouco todos os parados están inscritos nunha oficina do Servizo Público de Emprego xa que esa obrigatoriedade só abrangue aqueles desempregados que teñen dereito a percibir algunha prestación por desemprego ou a beneficiarse de políticas activas. O desánimo e a busca de traballo por outras vías provoca que haxa moitos parados que non estean inscritos non antigo INEM pero logo si engorden as estatísticas da EPA. 

Despece

  • A afiliación á Seguridade Social acumula dous anos de medre e cinco por baixo do millón de empregos

    D.L.

    A mingua da poboación activa, isto é, das persoas que están a traballar ou en condicións de facelo, vén sendo un dos trazos máis preocupantes do mercado laboral galego nos últimos anos. Factores como as xubilacións sen remuda, a emigración ou a falta de oportunidades de inserción deron lugar a unha forte destrución de emprego que o crecemento interanual de afiliacións durante os últimos dous anos aínda non deu compensado.

    Se ben é certo que o número medio mensual de persoas afiliadas á Seguridade Social en Galicia crece a respecto do ano anterior dende mediados de 2014, ano no que o paro tocou teito dende o inicio da crise, non o é menos que o ritmo de crecemento aínda non acada o do período anterior ao inicio das dificultades económicas. Así, o dato deste mes de outubro, o mellor no que vai de ano (un 2,14% a respecto do mesmo mes de 2015), está aínda lonxe dos crecementos superiores ao 4% do ano 2007. Doutra banda, obviamente, os datos son mellores que no período de destrución de emprego 2008-2014.

    Os crecementos dos últimos meses non permiten tampouco, cando menos de momento, que a cifra media de afiliacións mensuais á Seguridade Social supere o millón de persoas. Este volume de ocupación foi a tónica dominante en Galicia entre 2005 e 2010, ano no que se iniciou unha caída ata chegar, a comezos de 2014, á contorna das 900.000 afiliacións. O dato máis recente, do pasado outubro, é de 971.552 afiliacións medias.

  • A temporalidade segue a aumentar mentres volve baixar a taxa de cobertura

    A cobertura da protección por desemprego volve caer en Galicia. Segundo os datos do Ministerio de Emprego, a taxa de cobertura (cociente entre o número de persoas beneficiarias de prestacións por desemprego e o número de persoas paradas rexistradas con experiencia laboral) en setembro de 2016 era do 51,1 % (case un punto e medio menos que hai un ano, cando chegaba ao 52,5 %). Ademais, o gasto en prestacións por desemprego baixou nun 10,5 %.

    A taxa de cobertura volve baixar e sitúase no 51,1% en Galicia

    Segundo se tira dos datos, en setembro as prestacións contributivas, as de máis calidade, só representaban o 40,3 % do total, mentres que nos subsidios por desemprego a porcentaxe sobe ata o 46,8 %. Así, en setembro de 2016 había 90.815 persoas a cobraren unha prestación por desemprego; son 12.633 menos ca un ano antes, e a repartición por modalidades era a seguinte: 42.501 percibían un subsidio por desemprego, 36.621 contributivas, 10.906 a renda activa de inserción e 787 correspondían ao programa de activación de emprego.

    O 92% dos contratos rexistrados no mes de outubro foron temporais

    Ademais, hai outra característica negativa que non cambia: a elevada temporalidade. O 92,3 % dos contratos rexistrados no mes de outubro foron eventuais. En cifras absolutas, rexistráronse 86.274 contratos e deses 79.636 foron temporais.

    En termos mensuais, baixou a contratación e, sobre todo, a temporal: 7.386 contratos temporais menos (-8,5 %) e 128 contratos indefinidos menos (-1,9 %). Na comparación anual, rexistráronse 8.283 contratos máis e a suba mais acusada dáse na contratación temporal: 7.862 contratos temporais máis (+10,95 %) e 421 indefinidos máis (+6,77 %).

  • Miguel Pardo

    Miguel Pardo

    Entre A Coruña e o Ortegal. Antes en La Opinión, Depor Sport, L-V ou Xornal de Galicia. Co-autor de La imagen del mundo árabe y musulmán en la prensa española (2010, Fundación Tres Culturas)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza