0 Gardados para despois

A fin dos señores das caixas: entre o cárcere e a xubilación de luxo

Miguel PardoMiguel Pardo | @depunteirolo


Na súa declaración ante a Audiencia Nacional, Julio Fernández Gayoso defendía as indemnizacións millonarias aos directivos de Novacaixagalicia, entidade efémera resultado da fracasada fusión das caixas. Aqueles millóns eran merecidos por seren os seus receptores "culpables do éxito", segundo dixo ante o tribunal que o acabaría condenado a cadea. Con 86 anos cumpridos no mes pasado, pasou xa a primeira noite na prisión da Lama, unha imaxe entre reixas tan impensable como símbolo da fin dunha era e, posiblemente, do final dun xeito de facer. 

Méndez marchou a tempo, saíu indemne pero pactou antes unha indemnización de 18 millóns de euros

Ou non. Mentres el é detido en Vigo, no norte, a uns 160 quilómetros, o outro gran xerifalte das caixas galegas contempla a escena. José Luis Méndez liscou ao comprobar o Banco de España a lamentable situación na que se atopaba Caixa Galicia. Pero antes pactou a súa onerosa saída, cifrada en 18 millóns de euros de indemnización e numerosos privilexios, cifra que reclamou para afastarse dun proceso de fusión cuxas fotos de brinde, cos dous banqueiros intocables xunto a Feijóo, quedarán para sempre na galería de imaxes incómodas do presidente. 

Gayoso non se asignou, como outros tres directivos presos, indemnización ningunha, pero a Audiencia Nacional considérao responsable do acontecido. De feito, se algo se facía nas caixas galegas (e en moitos outros ámbitos) era porque Méndez e o seu homólogo en Caixanova o permitían. Entre os dous acumulan moreas de recoñecementos, entre eles a Medalla Castelao. E dificilmente os políticos se entrometían nas súas decisións, máis ben ao contrario.  

Gayoso acaba na cadea con 86 anos e logo de 70 vinculado ao sistema financeiro galego

O que fora director xeral de Caixanova acaba na cadea logo de 70 anos (se-ten-ta) vinculado a entidades financeiras, primeiro á Caixa de Aforros de Vigo -da que acabou sendo director executivo con 34 anos- e logo como máximo responsable da gran caixa do sur de Galicia, resultado de múltiples fusións. Un percorrido semellante seguiu Méndez, 14 anos máis novo. Logo de comezar na Caja de Ahorros de Ferrol, accedeu á dirección xeral de Caixa Galicia en 1981 até que dimitiu cunha entidade en quebra camiño da fusión.

O mesmo día que Novacaixagalicia comunicaba aos sindicatos que era "insostible" a súa obra social e que eran inevitables os despedimentos, desvelábase que -descontados impostos- Méndez recibira 8,5 millóns do fondo de pensións de Caixa Galicia e outros 2,7 en concepto de indemnización por rescisión anticipada de contrato. Case 11 millóns netos de retiro dourado. 

Méndez escapou a tempo mentres Gayoso era considerado pola Audiencia Nacional cooperador necesario dese "plan urdido" polos daquela directivos para "procurarse unha situación aínda máis favorable economicamente" ante a súa saída da entidade froito da fusión. E foi condenado por colaborador nese delito de administración desleal en concurso cun de apropiación indebida, ao igual que o avogado Ricardo Pradas, que foi partícipe pero tampouco levou indemnización.  

As indemnizacións pactadas polos ex-directivos supoñían máis do 10% dos activos da entidade fusionada

Ambos participaron nos trámites para abonar a catro executivos unha liquidación de 18,9 millóns de euros. Todo cargado ás contas dun banco que estaba valorado daquela en 181 millóns. Xa que logo, máis do 10% dos activos dedicáronse a pagar os despedimentos de catro dirixentes da súa cúpula. Pero un deles non está na cadea nin aparece na lista de condenados. Javier García de Paredes -representante de Caixa Galicia na entidade fusionada logo de que Méndez fose apartado polo Banco de España- foi absolto pola Audiencia Nacional. A Fiscalía retirou a súa acusación na fase de informes do xuízo. Agora o FROB mantén a batalla xudicial na que lle reclama os 5,6 millóns que cobrou ao abandonar a entidade. 

Librouse De Paredes pero non José Luis Pego, asesor de prensa que herdou todo o poder en Caixanova. Antigo director xeral da caixa fusionada, abandonouna cunha compensación de máis de 7 millóns de euros, que era o resultado de multiplicar o seu salario fixo (627.000 euros) polos 12 anos que lle quedaban para xubilarse cando entrou en Novacaixagalicia

Os ex-directivos agora presos non devolveron aínda os 10,5 millóns fixados polo Supremo malia a venda de inmobles embargados

Pola súa banda, Gregorio Gorriarán, que fora responsable da división inmobiliaria da entidade, levou unha indemnización de case 5 millóns, mentres que Óscar Rodríguez Estrada, responsable da "integración" das caixas,fora indemnizado con 700.000 euros. Todo, en plena crise, co paro disparado, múltiples escándalos financeiros ocupando as portadas e milleiros de clientes reclamando os cartos substraídos coas participacións preferentes, outro plan urdido polos directivos das antigas caixas galegas. 

Ningún dos agora presos acabou por devolver aínda os case 10,5 millóns de euros nos que quedou fixado o importe definitivo, logo da rebaixa que fixo o Tribunal Supremo aludindo ao "chamativo erro" dos cálculos que se fixeran inicialmente. 

Como aclara a propia Audiencia Nacional, nin a cantidade consignada polos condenados nin a venda de inmobles embargados foi dabondo aínda para completar os 10.445.586,31 euros que deben devolver. Que manfestasen a súa intención de reintegralos non é suficiente. Desta vez, o seu plan non chega a tanto.

Coa túa achega fas posible que sigamos publicando novas coma esta.

Lapelas Versión despregada

A Audiencia Nacional apela á "gravidade do delito" e ao "impacto macroeconómico"

Non son máis que tres foliios pero o auto de prisión que ditou a sección terceira da Sala do Penal da Audiencia Nacional é duro dabondo: "A gravidade do delito cometido, atendendo ao impacto macroeconómico producido, determina que, para evitar a impunidade, sexa necesario o ingreso en prisión dos cinco condenados, máxime cando se trata de penas consideradas polo Tribunal Supremo como benévolas". Desta maneira clara se expresa o tribunal contra os catro ex-directivos de Novacaixagalicia e o avogado Ricardo Pradas. 

"A gravidade do delito cometido, atendendo ao impacto macroeconómico producido, determina que, para evitar a impunidade, sexa necesario o ingreso en prisión"

A sala da Audiencia Nacional aclara que "debe denegarse a suspensión condicional [da condena] que postulan as defensas", polo que acorda que non hai lugar á suspensión da pena de dous anos de cadea imposta na causa aos condenados. É unha decisión pioneira neste tipo de delitos e pouco habitual noutros cando a condena non supera os 24 meses de cárcere. 

O tribunal insiste no feito de que non fosen devoltas as indemnizacións como clave para decidir a súa entrada en prisión. "É evidente que a suma das cantidades consignadas e do produto da venda dun dos inmobles embargados a Don Gregorio Gorriarán (4.091.280,25 euros) non satisfai a responsabilidade civil que provisionalmente (pende recurso de casación) se estableceu na sentenza de 19 de outubro pasado e que ascende a 10.445.586,31 euros, diferenza que tampouco queda garantida polos embargos inmobiliarios taxados que, segundo as tasaciones realizadas, representan 1.285.994,77 euros", di o auto, que aclara que a manifestación da intención dos condenados de pagar non equivale ao compromiso, "sendo necesario que se acredite facilitando garantías suficientes de cumprimento".

O auto conclúe aclarando que contra el cabe recurso de súplica no prazo de tres días desde a súa notificación ás partes, aínda que non é moi probable que prospere.  

A comisión de investigación das caixas retómase o vindeiro luns

A comisión de investigación das caixas constituirase o vindeiro luns 23 de xaneiro. Retomarase así e toda a oposición coincide xa en que será necesario que o seu funcionamento "non sexa fraudulento" e permita así "deitar luz" para coñecer "o que realmente pasou" no proceso que acabou cunha fracasada fusión, un rescate e un banco resultante comprado polo grupo Banesco. O PP, pola súa banda, lembra que a pasada lexislatura xa pediu a incorporación de todos os documentos "que puidesen enriquecer" a devandita comisión. 

A comisión das caixas retómase este luns e a oposición pide que o seu funcionamento "non sexa fraudulento"

Todos os portavoces dos grupos da Cámara galega confirmaron a constitución da comisión e volveron amosar o seu parecer pola entrada en prisión de catro ex-directivos e un asesor da extinta Novacaixagalicia polas indemnizacións millonarias. Así, a portavoz parlamentaria, Ana Pontón, volveu criticar a actuación daquela de Alberto Núñez Feijóo para advertir que "lle debe unha explicación aos galegos pola súa responsabilidade nesta situación" e acusou o presidente da Xunta de "cómplice" na blindaxe das indemnizacións. 

O BNG insiste en que Feijóo "débelle unha explicación aos galegos"

O voceiro de En Marea, Luís Villares, pediu que se tomase "en serio" o traballo da comisión de investigación e reclamou ao Partido Popular que "non poña vetos" ás persoas que deben comparecer nin aos documentos que se teñan que analizar. Ademais, a formación considera que "a estafa foi máis grande" cá das indemnizacións. 

O seu homólogo no grupo do PSdeG, Xoaquín Fernández Leiceaga, cre necesario "dar unha explicación de todo o proceso que levou desde a existencia dunhas caixas até a fusión, intervención e venda". Ademais, pide aclarar responsabilidades "tanto de tipo persoal como corporativo e político". 

Desde o PP, Pedro Puy lembra que a posta en marcha da comisión busca "rematar os traballos iniciados" na pasada lexislatura e advertiu que o órgano "estivo aberto até o final" e que o propio grupo popular solicitou que se achegasen todos os documentos "que a puidesen enriquecer".