A Xunta elixe o 19 de marzo (San Xosé, martes) e non o 24 de xuño (San Xoán, luns) como festivo en toda Galicia para 2019. O ano próximo o 8 de decembro cae en domingo e o Goberno galego proporá ao Consello Galego de Relacións Laborais substituír ese festivo polo 19 de marzo. A decisión contrasta coa tomada en 2016, cando o Goberno galego si decidiu que o San Xoán fose festivo en todo o país.
O Defensor do Paciente pide á Fiscalía que investigue o "posible delito" polo "sobrepeso" das ambulancias do 061 que desvelou Praza.gal. A policía constatou numerosas eivas de seguridade e excesos de peso de ata 900 quilos en varias UVI móbiles de Galicia.
Pepe Carreiro, creador dos Bolechas, súmase á reivindicación contra a masificación nas aulas en Allariz. Durante toda esta semana pais e nais están a manifestarse ante a delegación de Educación en Ourense tras a negativa da Xunta a crear unha nova aula na vila malia superar as actuais o máximo de alumnos fixado por lei.
O Goberno central asume que a futura depuradora de Santiago estará no emprazamento da actual, como reclamaba o Concello. O Ministerio para a Transición Ecolóxica confirmouno nunha xuntanza co alcalde da capital galega, Martiño Noriega, o que implica desbotar a construción dunha nova EDAR no Souto, opción que viñeran defendendo o PP local e o Goberno de Rajoy.
Empresas pesqueiras galegas que operan na Arxentina terán que pagar un recargo duns 30 millóns anuais por decisión do Goberno de Macri. A medida forma parte do plan do Executivo arxentino para afrontar a grave crise económica do país. Cóntao a xornalista Lara Graña en Faro de Vigo.
Un embaixador español acompañou en 2007 a Corinna zu Sayn-Wittgenstein nunha xuntanza en Arabia Saudita onde actuou como representante do rei Juan Carlos I, segundo publica eldiario.es
As intensas treboadas deixan máis de 2.000 raios en Galicia en apenas oito horas, a maior parte nas comarcas máis interiores da provincia de Lugo. Así o detectou Meteogalicia.
Torra advirte de que "non aceptará" unha condena aos líderes independentistas que van ser xulgados polo proceso soberanista catalán. O presidente da Generalitat afirmouno nun discurso no Teatro Nacional de Catalunya no que sinalou as prioridades políticas do seu Goberno para os vindeiros meses.
Xavier Domènech abandona a política: deixa os seus cargos en En Comú e Podem e renuncia ao seu escano no Parlament
Pais e nais de Allariz convocan protestas para todos os días desta semana ante a delegación de Educación en Ourense tras negarse a Xunta este luns a crear unha nova aula na vila malia superar as actuais o máximo de alumnos fixado por lei.
