Despece

• Manifestación en Compostela, este sábado

  Santiago acollerá este sábado, a partir das 13 horas, unha manifestación convocada pola Rede Galega en apoio ás persoas Refuxiadas, que agrupa a medio cento de entidades políticas, sociais e sindicais. A marcha, baixo o lema Non ás Guerras. Rachemos coas fronteiras, partirá da Praza Roxa e conta cun manifesto que a plataforma difunde dende hai días.

  O acordo UE-Turquía "consolida o fracaso que está a supoñer a xestión desta crise na UE", destácase no manifesto

  O texto expresa "a nosa máis enérxica repulsa polo acordo alcanzado entre a Unión Europea e Turquía como resposta á chegada da poboación desprazada ás costas de Europa", un trato que "consolida o fracaso que está a supoñer a xestión desta crise na UE". Un fracaso que -din- "é, en realidade, o dun modelo europeo de xestión migratoria baseado en peche de fronteiras, represión, control policial e explotación laboral". "A resposta á actual crise migratoria obedece á mesma lóxica das concertinas no valado de Melilla ou da violación continua de dereitos nos inhumanos Centros de Internamento para Estranxeiros", engade o manifesto.

  O texto solicita "o cumprimento dos convenios internacionais e as directivas e regulamentos europeos en materia de asilo e refuxio" e que "se abran rutas legais e seguras"

  A marcha esixirá a derrogación do acordo entre a UE e Turquía e demandará "unha alternativa humana, legal e responsable, baseada no reasentamento incondicional de persoas refuxiadas cun número de prazas suficientes e nunha vontade política dos países da UE para que o sistema de recolocación respecte os dereitos humanos". Así mesmo, solicita "o cumprimento dos convenios internacionais e as directivas e regulamentos europeos en materia de asilo e refuxio" e que "se abran rutas legais e seguras" para a entrada en Europa dos refuxiados e refuxiadas.

  Neste senso, critican a proposta da UE de que por cada persoa refuxiada siria que sexa devolta a Turquía desde Grecia se reasente a outra tamén siria na UE, unha solución que cualifican de "inmoral" e carente "de fundamento xurídico sustentable". "O que verdadeiramente implica esta medida é que cada praza de reasentamento na UE dependa de que outra persoa arrisque a súa vida embarcándose na mortal ruta por mar a Grecia", explican.

  Alértase de que "unha de cada tres persoas que están a chegar a Europa son menores, a maioría das cales se atopan sen escolarizar"

  Pídese tamén "o respecto dos dereitos humanos nas fronteiras e garantía na protección das persoas, en especial ás menores e as máis vulnerables", alertando de que "unha de cada tres persoas que están a chegar a Europa son menores, a maioría das cales se atopan sen escolarizar". "O acordo supón a vulneración de dereitos fundamentais da infancia", subliñan, por exemplo "do dereito a non ser separadas dos seus familiares, do dereito á reunificación familiar, do principio básico de que ningún neno ou nena será devolto agás no caso de que se comprobe que alguén se fará cargo del ou dela no país de orixe e que non queda exposta a situacións de risco.

  Ínstase á Xunta e aos gobernos locais a que "traballen na defensa dos dereitos das persoas migrantes e refuxiadas"

  Así mesmo, ínstase á Xunta e aos gobernos locais a que "traballen na defensa dos dereitos das persoas migrantes e refuxiadas". Por exemplo, ampliando e axilizando o sistema de asilo para as persoas que xa están no Estado español e Galicia que actualmente están pendentes de ser atendidas. Promovendo ademais a súa "integración" facilitando alugueres de pisos, garantido o acceso ao sistema educativo e sanitario ou a través da mediación lingüística. Pídese igualmente a posta en marcha dun programa de formación dirixido ao persoal das administracións públicas que atenden en distintos servizos a persoas migrantes e refuxiadas e que as organizacións sociais e os concellos "traballen conxuntamente, man a man, na posta en marcha de campañas de sensibilización dirixidas á poboación para combater os discursos racistas e xenófobos".

  Finalmente, esíxese que se "revise en profundidade a política migratoria e exterior europea" e que se "actúe sobre os problemas de orixe"

  Finalmente, esíxese que se "revise en profundidade a política migratoria e exterior europea" e que se "actúe sobre os problemas de orixe", adoptando medidas para loitar conta a desigualdade, reducir a pobreza e previr os conflitos armados nas zonas de orixe, cumprindo co Tratado de Comercio de Armas e garantindo "que as políticas comerciais, económicas e diplomáticas respectan os dereitos humanos e os recursos locais e que as empresas transnacionais non esquilman os recursos dos países de orixe".