Miguel Anxo Fernán Vello, deputado de En Marea no Congreso, iniciou este mércores pola tarde unha folga de fame para protestar contra o acordo UE-Turquía e para alertar sobre a situación dos refuxiados e refuxiadas. Fernán Vello uniuse a outros tres deputados de Equo e Podemos -Pedro Arrojo, Jorge Luis Bail e Eduardo Santos- que iniciaron a acción o pasado sábado. Este mércores ao mediodía os catro ofrecerán unha rolda de prensa para explicar as razóns e obxectivos da iniciativa, que busca contribuír a "crear en todo o Estado unha corrente de apoio cara á situación dos refuxiados e refuxiadas, que a cidadanía tome posición fronte á ignominia, fronte a este desprezo á vida humana que está demostrando a UE".
"A situación é moi grave. En Grecia hai máis de 46 mil refuxiados e inmigrantes que están atrapados en 31 campos de concentración, nunha situación indigna, con problemas de alimentación, con nenos e nenas nunha situación física lamentábel", destaca Fernán Vello. "É o Cuarto Reich. Recorda moito a escenas dos campos de concentración nazis", engade.
"Sentimos unha profunda responsabilidade ética e política que nos leva a denunciar a situación", sinala. "O Goberno e os concellos (agás algunhas excepcións) non están dando unha resposta política ante esta traxedia. É sorprendente a falta de reacción política e social ante o que está sucedendo: milleiro de deres humanos que están vivindo en condicións extremas, en Europa e en pleno século XXI ", denuncia. "Quen ten que tomar posición é a cidadanía, a xente do común. Si que hai xente que se dirixiu ás institucións, aos concellos, para ofrecer a súa axuda e para ofrecer as súas casas para acoller a estas persoas. Pero debe haber un clamor social que obrigue a UE a tomar medidas ante esta situación", conclúe.
"Debe haber un clamor social que obrigue a UE a tomar medidas ante esta situación"
Os catro deputados permanecerán no hemiciclo ao longo de todo o día para facer visible a súa protesta. Miguel Anxo Fernán Vello terá que abandonar a folga de fame mañá pola tarde para participar en Compostela no Acto de Rendición de Contas que organiza En Marea.
Nas últimas semanas leváronse a cabo algunhas mobilizacións contra o acordo UE-Turquía e para alertar da situación que están a vivir as persoas refuxiadas. De igual xeito, Izquierda Unida presentou unha querela contra Mariano Rajoy por asinar o acordo. E EU está a realizar en Galicia unha serie de actos en varias cidades e vilas para promover o debate sobre a situación de migrantes e refuxiados/as. Este venres pola tarde celebraranse en varias cidades de todo o Estado (Madrid, Zaragoza, Bilbao, Valencia...) vixilias de 24 horas para denunciar a situación dos refuxiados e refuxiadas. De igual xeito, en Compostela está convocada unha manifestación, este sábado ás 13 horas, convocada pola Rede Galega en Apoio ás Persoas Refuxiadas.