0 Gardados para despois

A chuvia prognosticada, obstáculo para o tradicional pico de incendios de finais de agosto

David ReineroDavid Reinero | @DReinero


Entre o pasado luns día 8 e este venres día 12 arderon en Galicia máis de 6.000 hectáreas só nos incendios dos que agora informa a Xunta, que son os que poñen en risco a poboación ou superan as 20 hectáreas. En 2006 a gran vaga de incendios daquel ano queimara un total de 77.000 hectáreas entre os días 4 e 16 de agosto, ata que nesa última xornada comezou a chover. Porén, o habitual, segundo reflicte o Plan de Defensa contra os Incendios Forestais de Galicia (Pladiga) da Xunta, é que sexan  as dúas últimas semanas de agosto as que maior actividade incendiaria concentren. Así foi na última década. Para a próxima semana, ao igual que en 2006, tanto Meteogalicia como a Agencia Estatal de Meteorología (Aemet), prognostican chuvia e baixada de temperaturas para o mércores día 17, o que podería axudar aos 7.000 homes e mulleres que loitan contra o lume a evitar o tradicional incremento de incendios de finais de agosto.

As dúas últimas semanas do mes son as que máis lumes concentran na última década, con 350 semanais, pero para o mércores prevese auga e frío

A semana que agora remata é a número 32 do ano, na que, segundo informou o presidente Feijóo, desde o martes ata a mañá deste venres producíronse 193 lumes. Segundo o Pladiga, as dúas semanas con maior actividade incendiaria entre 2006 e 2015 foron as números 33 e 34, isto é, a segunda quincena de agosto, cunha media de 350 incendios cada unha. Ese comportamento adiantouse e reduciuse na última década con respecto á anterior, a comprendida entre 1996 e 2005, cando eran as semanas 36 e 37, isto é, xa en setembro, cando se rexistraban unha media de 700 incendios semanais.

A análise por provincias permite comprobar como son A Coruña e Pontevedra as que veñen rexistrando un comportamento máis agudo nas dúas últimas semanas de agosto, mentres que en Ourense, onde o ano pasado se concentraron os principais problemas, a aparición de lumes repártese de xeito máis uniforme e esténdese ao longo do outono.

Situación dos principais incendios non controlados na tarde do venres 12

-Porto do Son: Incendios iniciados o mércores nas parroquias de Baroña e Xuño acabaron uníndose e afectando a Queiruga e Caamaño e suman unhas 1.000 hectáreas, con risco para a poboación e coa actuación da UME.
-Arbo: Un incendio iniciado na parroquia de Mourentán na noitiña do mércores afecta xa a máis de 1.500 hectáreas, tamén con risco para a poboación.
-Crecente: Na tarde do mércores iniciouse un incendio na parroquia de Albeos que afecta a máis de 300 hectáreas e que tamén ameazou vivendas, risco que foi desactivado a primeira hora da tarde deste venres.

Ademais destes incedios con risco para a poboación (no que vai de semana suman 11 os así declarados, case tantos como en todo o ano pasado), outros lumes significativos aínda non controlados na tarde deste venres eran os de Santiago (parroquia de Fecha, con 800 hectáreas), Avión (Nieva e Avión, 400 hectáreas) ou Laza (Toro, 50 hectáreas).

(A Xunta actualiza os datos sobre os incendios de máis de 20 hectáreas ou que supoñan risco para a poboación a través da súa web e da conta de Twitter @incendios085)

Coa túa achega fas posible que sigamos publicando novas coma esta.

Feijóo informa de 40 detidos e os sindicatos pídenlle máis prevención e que deixe de privatizar a extinción

O presidente da Xunta, Alberto Núñez Feijóo, volveu visitar este venres o centro de coordinación da loita contra os incendios forestais, como xa fixo hai uns días, e informou de que xa hai “algún detido” en relación cos lumes dos últimos días. Segundo dixo, desde que comezou a actual temporada de incendios forestais producíronse “máis de 40 detencións” en Galicia, cifra que segundo asegurou supera a dos detidos en toda España. Porén, segundo vén reflectindo a Fiscalía nas súas memorias anuais, a gran maioría dos detidos non chegan a ir a xuízo por falta de probas.

Logo de que os partidos da oposición criticaran nos últimos días a política forestal do Goberno galego, este venres os catro sindicatos con representación no servizo de loita contra os incendios da Xunta emitiron un comunicado conxunto no que piden que pare a privatización dos servizos de extinción e se dediquen máis esforzos á prevención. O comunicado, subscrito por CIG, CCOO, CSIF e UGT comeza agradecendo o esforzo dos traballadores tanto públicos como de empresas privadas que estes días loitan contra os incendios,  “a maioría deles provocados pola acción incendiaria de desalmados criminais”.

“Trala vaga de incendios de 2006, despois dos devastadores incendios das Fragas do Eume e Xurés no ano 2012, os de Oia e Carnota no 2013, o de Cualedro no 2015, dende as catro organizacións sindicais, advertimos aos responsables da Xunta de que iso podería pasar se non se adoptaban as medidas necesarias”, din os sindicatos, que se ofrecen a negociar “para que Galicia volva dispor do dispositivo que sexa acorde coas necesidades do noso país”. “Fronte ao modelo de dispositivo fragmentado e privatizado que despregou a Consellería de Medio Rural –e que condena aos traballadores a unhas condicións laborais e salariais inxustas e precarias– as organizacións sindicais propoñemos un modelo público e único”, din.

Nese novo modelo, os sindicatos reclaman procesos únicos de selección de persoal, redución do número de interinos, fin da “precariedade dos traballadores que actualmente son contratados durante tres e nove meses para que se poidan desenvolver a necesarias tarefas de prevención durante os meses de inverno”, que os traballadores sexan considerados “bombeiros forestais”, máis formación e posibilidades de promoción. “Un modelo, en suma, que remate coa privatización e fragmentación do dispositivo, o que redunda nunha menor eficacia e maior desprofesionalización”, conclúen os sindicatos.