Unha asociación de Lugo tentará mercar o xacemento paleolítico que Facenda poxa en Vilalba

Vista do acubillo de Pena Grande Dominio Público A.C. Cultura do País

Primeiro paso adiante para, no caso de que a poxa do xacemento paleolítico vilalbés de Pena Grande non sexa paralizada, o predio non sexa destinado a outros fins que non sexan a súa conservación e estudo. A Asociación Cultural Cultura do País, de Lugo, disponse a iniciar unha campaña de micromecenado co obxectivo de concorrer a poxa convocada polo Ministerio de Facenda e mercar a leira na que se atopa o acubillo do que saíron máis de mil pezas que o fan ser considerado o xacemento paleolítico máis importante de Galicia, con máis de 10.000 anos de historia.

O colectivo lucense, que xa lanzara outras alertas sobre agresións ao patrimonio na contorna da cidade, presentará este xoves en rolda de prensa a campaña 'Esperta do teu sono' coa que agardan xuntar apoios dabondo "para presentarse á poxa", mercar o predio e "garantir a súa preservación e posta en valor". Despois de que Facenda tentase ata en dúas ocasións vender a leira, o prezo de saída da poxa prevista para o vindeiro 15 de decembro é de 7.785,66 euros e as persoas interesadas en quedar con el teñen que depositar unha garantía de 389,28 euros, o 5% do importe, antes do día 11 á unha da tarde.

Cultura do País lanza unha campaña para xuntar os fondos necesarios e concorrer á poxa

Dende Cultura do País avánzase que a súa prioridade é evitar que unha eventual venda do predio destrúa o xacemento. Se logran mercalo, explican, procuraría a asesoría de museos e persoal especialista da contorna para estudaren as mellores opcións de conservacións e vías para investigalo, protexelo e, eventualmente, realizar novas escavacións que permitan coñecelo máis a fondo.

O PSdeG vilalbés pide a cesión ao Concello

"Temos un xacemento arqueolóxico dun valor patrimonial incalculable mercantilizado e desprezado polos organismos que deben protexelo"

O anuncio de Cultura do País chega mentres aumentan as voces que, no ámbito político, esixen paralizar o procedemento. Despois de que En Marea e BNG reclamasen nos últimos días excluír da poxa o predio de Pena Grande e trasladar as competencias efectivas sobre o xacemento á Xunta, o PSdeG de Vilalba vén de anunciar tamén que trasladará ao vindeiro pleno do Concello, previsto para este xoves, unha moción para pedir que o alcalde, Agustín Baamonde (PP), "se dirixa urxentemente ao Ministerio" para "paralizar a poxa" como primeiro paso para "solicitar a cesión dos terreos ao Concello".

Na mesma moción, explica a voceira dos socialistas, Elba Veleiro, reclamarán tamén que a corporación se dirixa á Xunta para "solicitar a declaración de Ben de Interese Cultural de toda a parcela", unha condición que o rexedor asegurou que xa ten, pero coa que non conta, segundo confirma o Goberno galego a preguntas de Praza.gal. "Temos un xacemento arqueolóxico dun valor patrimonial incalculable que está sendo mercantilizado e desprezado polos organismos públicos que deben protexelo", agrega Veleiro, que avanza tamén iniciativas do PSdeG na Deputación, no Parlamento e no Congreso "para paralizar este despropósito". 

Material promocional da A.C. Cultura do País de Lugo Dominio Público A.C. Cultura do País

Despece

  • "Se organizando este rebumbio paralizan a poxa sería unha boa noticia, xa gañamos"

    O teléfono de Ruth Rodríguez, presidenta da Asociación Cultura do País, non parou de soar dende que comezou a se espallar a nova de que o colectivo tentará poxar polo predio no que se atopa o xacemento de Pena Grande no caso de que, finalmente, acabe saíndo á venda o vindeiro 15 de decembro, segundo o previsto por Facenda. Se o proceso non se detén a asociación lanzará dende este xoves a súa campaña de micromecenado para poder optar a mercalo e, xunto coas persoas e organizacións que colaboren, velar pola súa conservación.

    "Non deixa de ser triste que unha asociación cultural teña que 'dar a nota' e dicir: se vós non sodes capaces de protexelo, farémolo nós"

    Como xorde a idea de que a asociación á poxa?
    Nós enterámonos hai meses de que esta parcela ía saír a unha poxa. Inicialmente xa barallaramos esa posibilidade, pero descartarámola porque preferiamos falar con outros colectivos e ver a posibilidade de evitar que saíse á poxa. A nosa intención non é para nada facernos con ese xacemento, pero como non foi posible paralizalo, esta foi a vía de escape. Por iso decidimos tentalo.

    Procurarán financiamento entre a cidadanía?
    Vai haber tres maneira de facer achegas. Unha será unha campaña de micromecenado; ademais imos poñer á disposición o número de conta da asociación e contactaremos con colectivos e persoas que poidan recoller diñeiro. En todo caso nós queremos deixar claro que, se finalmente non podemos chegar a poxar, devolveremos o diñeiro a todas as persoas que se identifiquen ao faceren a doazón.

    "Nós somos só un medio; se o conseguimos adquirir habería que xestionalo de maneira colectiva"

    Como valoran que unha asociación teña que facerse cargo da situación? As Administracións saben que esta non era unha leira máis...
    As administracións saben que o xacemento existe e saben que o van destinar a unha poxa. Non é un caso de descoñecemento, e aínda coñecéndoo non frearon que esa parcela, que contén un xacemento dun valor incalculable, chegue ao destino de ser poxado e poida acabar en mans de persoas que o vaian explotar dunha forma que dane o propio xacemento. Non deixa de ser moi triste que teña que ser unha asociación cultural arroupada por colectivos e persoas anónimas a que teña que 'dar a nota' e dicir: "se vós non sodes capaces de protexelo, farémolo nós".

    Valoraron xa que facer co xacemento no caso de chegaren a poder mercalo?
    Nós somos só un medio. Se finamente vai á poxa e temos que poxar, tentaremos que non acabe en mans dun propietario que non mire por el. Se o conseguimos adquirir non será por méritos nosos, senón da sociedade e da xente que nos axude a conseguir os cartos, e por iso temos claro que habería que xestionalo de maneira colectiva, coa participación da xente que participe con doazóns. Teremos que asesorarnos con persoal formado, comezando polo Museo de Vilalba. A decisión sobre o que aconteza tería que ser tomada entre todas as persoas e colectivos.

    "Sería unha boa noticia se con isto logramos que as Administracións fagan o que tiñan que facer hai moito tempo"

    Como valorarían que todo o rebumbio político e social xerado en torno a poxa acabase paralizándoa?
    Sería unha boa noticia se finalmente este rebumbio que creamos con acaba con que as administración competentes paralizan a poxa e entregan a parcela ás ás institucións que se poidan facer cargo da súa protección, escavación e o que corresponda. Sería gañar moito. Se organizando todo isto conseguimos que fagan o que tiñan que facer hai moito tempo, xa gañamos.

    Ruth Rodríguez, presidenta de Cultura do País, nun acto da asociación Dominio Público Cultura do País

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza