Despece

• O Reino Unido é destino do 6% das exportacións galegas e un fundamental caladoiro de pesca

  _{David Lombao | @davidlombao}

  As primeiras repercursións do referendo do Brexit están a ser económicas, con fortes caídas das bolsas e anuncios de "liquidez adicional" dende o Banco Central Europeo. Alén das evidentemente políticas, económicas son, tamén, boa parte das incertezas que atinxen a Galicia pola saída do Reino Unido da UE. Non en van, o mercado británico é o cuarto destino das exportacións galegas no mundo, con ata un 6% do diñeiro movido nestas operacións comerciais no último, algo máis de 1.000 millóns de euros, e as súas augas son tamén un fundamental caladoiro para a pesca galega.

  No que atinxe ás exportacións galegas a territorio británico máis da metade corresponden aos sectores do téxtil e mais do automóbil ou, o que é o mesmo, fundamentalmente a Inditex e mais a Citroën xunto coas súas empresas auxiliares. O volume das mercadorías exportadas entre ambos sectores o pasado ano roldou os 600 millóns de euros, segundo os datos provisionais do Instituto Galego de Estatística. A maior distancia están outros sectores económicos como a maquinaria, a alimentación ou a metalurxia.

  Mentres estes sectores exportadores agardan a coñecer os termos en que UE e Reino Unido establecerán a súa nova relación comercial, onde cunde o temor é na frota pesqueira. Nomeadamente, nas casas armadoras galegas que teñen barcos a faenar no Gran Sol, o caladoiro do Atlántico norte situado ao oeste das Illas Británicas no que faenan 84 barcos galegos, dez deles eu augas británicas e o resto, compartidas, mais en réxime irlándéz. Dende os inicios da integración na extinta Comunidade Económica Europea armadores abandeiraron os seus buques no Reino Unido para esquivaren as restricións de cotas impostas polas autoridades comunitarias e poder acceder a capturas asignadas aos británicos.

  As casas armadoras galegas abandeiraron barcos no Reino Unido para accederen a maiores cotas de pesca

  Os datos máis recentes indican que máis dunha trintena de barcos de orixe galega traballan no Gran Sol baixo pavillón británico, e a súa presenza foi un dos argumentos da campaña do Brexit. Así, en días pasados en declaracións a RNE o presidente da Cooperativa de Armadores de Vigo (Arvi), ilustraba o seu temor con informacións como a publicada en plena campaña polo xornal Daily Express, na que se citaba con nomes e apelidos a diversos armadores galegos para concluír que "o goberno cede os seus recursos naturais aos piratas da frota galega", ligando actividades legais con pesca ilícita descuberta nos últimos anos.

  "Parte da nosa frota tivo que mudar a bandeira e mercar dereitos de pesca para poder faenar en augas de soberanía británica", un xeito de proceder "absolutamente recoñecido polo Tribunal de Xustiza da Unión Europea", lembra Touza. No entanto, coa saída ábrese a posibilidade de que o Goberno británico mude as normas e dificulte o acceso a empresas de capital foráneo a augas que, obviamente, deixan de ser comunitarias. Do mesmo xeito, o Reino Unido terá na súa man esixir requisitos como unha presenza mínima de tripulación británica nos barcos, o que traería consigo un impacto directo no emprego do sector en áreas como Vigo ou O Morrazo.

  Á espera de coñecer o novo escenario, a incerteza atinxe tamén ao eventual regreso dos aranceis para vender na UE o peixe capturado en augas británicas. Trátase de máis de 8.000 toneladas de peixe que, maioritariamente, son consumidas en territorio español.

  

• Feijóo e Leiceaga culpan o populismo e BNG e AGE, o liberalismo

  _D.R./D.L.

  As reaccións entre as forzas políticas galegas ao Brexit estiveron, na súa maioría, intimamente ligadas á campaña electoral. Así, os diversos partidos interpretan a marcha do Reino Unido da Unión Europea como un produto das políticas das que eles din considerarse antagonistas.

  Para o presidente da Xunta, Alberto Núñez Feijóo, o Brexit é culpa da “extrema dereita e a extrema esquerda, en definitiva, o populismo” e supón “un mal día para Europa”. Feijóo di que agora é necesaria máis unión nunha UE que resolva “algúns problemas sociais” e siga a ser “un espazo de liberdades e benestar”.

  Feijóo culpa "a extrema dereita e á extrema esquerda, en definitiva, o populismo"

  Pola súa banda, para o candidato do PSdeG á Xunta, Xoaquín Fernández Leiceaga, o resultado é froito da “falla de vontade reformista e a parálise conservadora da UE”. O socialista tamén pediu evitar as “tentacións populistas” que supoñen “unha aventura custosa para os cidadáns” e defendeu que o PSOE “é unha opción de cambio estable e a mellor solución nestes momentos para os españois”.

  Desde o BNG, a súa voceira nacional, Ana Pontón amosou o seu “respecto” polo que foi “unha decisión democrática do pobo” británico e considerou que o resultado supón “unha severa crítica democrática ás políticas neoliberais” que “tiveron amplo eco nas institucións europeas” e unha crítica á propia Unión Europea. Nesa liña, a voceira nacionalista lembrou como o a súa formación xa foi crítica coa Comunidade Económica Europea, que “golpeou” a economía galega, ou co Tratado de Maastricht e a súa denominada Constitución Europea, fracasada logo de que os franceses a rexeitaran tamén en referendo.

  BNG e AGE enmarcan o resultado nas posicións críticas coas "políticas neoliberais"

  Desde AGE, a eurodeputada Lidia Senra salientou que o resultado amosa a “pouca credibilidade dunha UE que se construíu en contra dos pobos, a favor das multinacionais”. Senra asegurou que “neste malestar está pescando a dereita populista e xenófoba”, pero ao seu xuízo o resultado tamén reflicte “o malestar das clases populares e dunha parte importante da esquerda que loita contra a crise”. O líder de Anova, Xosé Manuel Beiras, asegurou que “a UE é coma o IV Reich; a hexemonía do III Reich comezou a rachar cando Inglaterra lle declarou a guerra, co IV comezamos a vivir unha situación análoga”.