Despece

• "As parlamentarias e parlamentarios de En Marea deberanse á cidadanía galega"

  Antón Gómez-Reino, Tone, número uno de En Marea pola Coruña, di  estar "ilusionado" polas expectativas da candidatura, pero tamén "liberado" despois de meses para acadar unha "alianza fraterna" en Galicia que agora sae "a gañar".

  Como se pasa de negociar durante tanto tempo a confluencia a unha campaña tan decisiva?

  Cunha mestura de ilusión e responsabilidade. Ilusión, pois comeza a notarse na xente, tamén de cara ao 20D, a sensación de que pode suceder algo histórico e de que, no noso país, con responsabilidade e cooperación, temos conseguido construír un espazo diverso e plural. E responsabilidade por saber que, ademais de estar traballando para levar a palabra e os desexos da cidadanía galega ao Parlamento, estamos en disposición de, desde o noso país, participar de forma decisiva e sumar con todas as forzas do cambio nun cambio de goberno nun momento histórico e constituínte e, polo tanto, transcendental.

  "Estou ilusionado e liberado tras meses de traballo e esforzo o que moita xente e moitas mareas nos demandaban"

  E ademais...

  Ademais diso, liberado. Liberado tras meses de traballo e esforzo por construír o que moita xente en xeral, e moitas mareas en particular, demandaban: un espazo común de cara ás eleccións xerais. Non imos negar que poñer de acordo a varias organizacións políticas, ás mareas de goberno e a outras mareas, ten unha complexidade non menor. De aí que me sinta francamente liberado ao ver que, pese a un escenario complexo, fomos capaces de establecer un camiño en común e de ver como ao tempo foise compoñendo o que Ada Colau etiquetou o pasado sábado na Coruña como “unha alianza fraterna” con capacidade de darlle a volta ao poder político no Estado. Liberado e ilusionado. Agora toca liberar enerxía de cambio, ilusión colectiva e, como pasou no 24M, gañar.

  A división da esquerda -co caso do BNG en Galicia ou de IU a nivel estatal- dificulta ese cambio que se pretende no Estado?

  A nivel galego nós sempre fomos claros: o transcendental era construír un espazo no que estivesen presentes todos os actores, políticos e cidadáns, que foron capaces de poñerse de acordo antes do 24M e construír as mareas que alteraron definitivamente o taboleiro municipal deste país. A partir de aí, quen tivese decidido quedar fóra no 24M por intereses lexítimos de partido, tiña a porta aberta a sumarse e participar. Con todo, cómpre lembrar que a suma plural na que imos desde o noso país ás eleccións xerais é unha alianza inédita. Temos a perspectiva de que a cidadanía demandaba que emuláramos o feito cara ao 24M coas mareas de cambio. E así o fixemos.

  "A suma plural na que imos desde Galicia ás eleccións xerais é unha alianza inédita e cremos que é o que a cidadanía pedía"

  Foi suficiente o esforzo feito a nivel estatal?

  O esforzo que se ten feito a nivel do Estado é tamén inédito. Nos lugares onde existe unha dinámica política propia (Galicia, Catalunya, Pais Valencià...) conseguimos sumar para multiplicar. Estou seguro que neste contexto de polarización esta alianza polo cambio na que tantos estamos traballando vai ter uns resultados acordes coo esforzo e a xenerosidade de tantos e tantas. E, finalmente, non me cabe dúbida de que, no campo parlamentario, haberá cooperación con todos aqueles espazos progresistas que, polo que for, decidiron manterse á marxe da “alianza fraterna” que, como dixen antes en palabras de Ada Colau, entre moitos e moitas temos sido capaces de artellar.

  É En Marea a candidatura ideal para defender os intereses galegos?

  Gústanos dicir e traballar para que En Marea sexa unha candidatura que se pareza ao país. Un país plural, con variedade de perspectivas e rico en sensibilidades políticas de cambio pero, sobre todo, con un desexo común: devolvernos entre todas a dignidade colectiva de país e construír un futuro de democracia e dereitos para toda a cidadanía galega. Para toda, sen exclusións.

  "As parlamentarias e parlamentarios de En Marea deberanse á cidadanía galega"

  Actuarán os seus deputados con total independencia nos temas que abrangan a Galicia?

  Si. Sen dúbida, as parlamentarias e parlamentarios de En Marea deberanse á cidadanía galega. E tanto pola propia filosofía e arquitectura da candidatura que así o recolle, como polos mecanismos de participación e de rendición de contas, actuarán sempre de acordo con os intereses que buscan mellorar as condicións materiais de existencia de toda a cidadanía galega.

  Debe ser esta fórmula de candidatura o antecedente da unidade popular para disputarlle o poder ao PP en Galicia nas autonómicas?

  Sen dúbida, este é un paso máis no proceso que, desde hai tempo e con especial acerto no 24M, estase a dar para devolver a xente ás institucións e botar a quen leva anos destruíndo o público e apropiándose do que debe ser común, especialmente ao PP pero, tamén no seu caso ao PSOE, do poder político institucional.

  "De cara ás autonómicas, debemos volver sumar moitas vontades e devolverlles ás institucións do país a democracia e a dignidade"

  Precísanse máis pasos?

  É clave, de cara ás eleccións ao Parlamento galego, seguir dando pasos para volver sumar moitas vontades e devolverlles ás institucións do país a democracia e a dignidade que nunca lle deberon faltar. E facelo abrindo cada vez máis o camiño á implicación directa da cidadanía nun proceso de cambio e ruptura democrática no que a participación da xente, como vimos nas mareas, é a única garantía. Garantía inicialmente de vitoria electoral. Pero, sobre todo, garantía de estabilidade política ante os ataques de quen, desde a dereitas social, mediática e política, queren que este país siga a vivir nunha parálise institucional gobernada de incompetencia e clientelismo. Nós témolo claro. De cara a 2016 ten que darse e vai darse un cambio de 180º no noso país. Imos botar, entre todas, o PP das institucións e da Xunta que tanto deron en deturpar.

  As enquisas volven dar como partido máis votado o PP e a Ciudadanos mesmo como segunda forza. Sería iso unha profunda decepción? Que sería un éxito para En Marea?

  Ao respeito das enquisas: tamén daban unha entrada fulgurante de Ciudadanos no Concello da Coruña. Xa vimos o resultado final. Sabemos que, ás veces, as enquisas están a empregarse máis para orientar o voto que para facer unha lectura real do campo social. Non temos dúbida que o contexto dunhas eleccións xerais é diferente do dunhas municipais. Pero imos poñer todo da nosa parte para que a cidadanía galega identifique onde hai ruptura co vello e cambio. E non recambio e recetas da FAES. Un éxito para a Marea é que a cidadanía galega se exprese con ilusión e contundencia polo cambio político. E que esa contundencia sexa clave para que, a nivel do Estado, abramos un proceso onde decidilo todo. Como adoitamos dicir: decidilo todo, entre todas. Para que todo mude a mellor. Para que nada do malo destes anos siga igual.

  

• "O noso labor no Congreso estará guiado polas propostas e decisións que se tomen en Galiza"

  Alexandra Fernández, de Anova, confía na forza da confluencia de En Marea "porque é un espazo diverso e con vontade integradora, polo tanto moi representativo da maioría social". Reivindica a creba democrática, desde o 15M até as mareas cidadás, e asegura que unha das primeiras propostas que lle gustaría presentar no Congreso é "a necesidade de revisar o pacto lácteo". 

  Falou da “ilusión” da xente nova como motor de En Marea, cre que hai ilusión entre os mozos e mozas ou aínda hai moito desilusionado coa política?

  O sentimento de desamparo de moita xente con respecto á política é evidente, e é froito desa distancia insalvable entre as decisións dunha clase política corrupta, que decide de costas á xente, e as necesidades reais da maioría. Desde hai catro anos deuse unha politización progresiva da sociedade, e unha asunción por parte de moita xente, e moi especialmente da xente nova, de que o que está a acontecer incúmbenos, e que o que fagamos ou deixemos de facer agora marcará o rumbo das seguintes décadas. Por iso, se algunha conclusión práctica tiramos do 15M foi a necesidade urxente de tecer redes de colaboración, de organizarnos para tomar as institucións nas nosas mans e remudalas. Esa é a ilusión que nos move, materializouse nas municipais nunha chea de vilas e cidades do país e deunos azos. Podemos dicir con orgullo que somos a xeración das mareas.

  "Podemos dicir con orgullo que somos a xeración das mareas"

  Como e quen a convenceu para dar o salto a liderar a candidatura por Pontevedra?

  Os meus compañeiros e compañeiras de Anova foron quen me animaron a presentarme ás primarias internas. Mais tamén me anima o ter traballado con moita outra xente na Marea de Vigo, as necesidade de darmos un paso adiante por continuar a ensanchar o proceso que comezamos hai máis de un ano.

  É En Marea a candidatura ideal para defender os intereses galegos? Actuarán os seus deputados con total independencia nos temas que abrangan a Galicia?

  Ideal non hai nada, mais si que creo que é a máis axeitada. Porque apostamos por unha creba necesaria co estado de cousas actual; porque é un espazo diverso e con vontade integradora, polo tanto moi representativo da maioría social; como dixo o outro día en Pontevedra a compañeira Ángela Rodríguez, En Marea é, pola súa pluralidade, a candidatura que máis se parece a Galiza. E porque, efectivamente, o noso labor no Parlamento español estará guiado polas propostas e decisións que se tomen en Galiza.

  "O noso labor no Parlamento español estará guiado polas propostas e decisións que se tomen en Galiza"

  As enquisas non son malas para En Marea pero prevén tamén unha maioría de dereitas no Congreso coa suma de PP e Ciudadanos... Que expectativas ten?

  Se nos guiamos polas previsións das enquisas nas municipais, hoxe teriamos a Ciudadanos gobernando co PP na Coruña, en Compostela e, en xeral, na meirande parte das principais vilas e cidades do país. Prefiro guiarme polo que diga a xente o 20D.

  Que principais reivindicacións levará vostede a Madrid?

  O noso programa é de ruptura democrática. Ruptura porque xa non nos vale este rexime oligárquico. Queremos pór a economía ao servizo da cidadanía. E democrática porque ten que vir da man dunha cidadanía que nos acompañe no proceso para recuperar os dereitos civís, sociais e laborais que nos están roubando. Porque xa non nos chega cunha democracia representativa, queremos unha democracia participativa, queremos pór as institucións ao servizo da cidadanía para decidilo todo. Ademais, somos conscientes da grave situación que atravesa o noso país en todos os indicadores, por iso queremos contribuír a que Galiza saia da grave situación económica, demográfica, social, ambiental, lingüística e cultural á que nos conduciron todos estes longos anos de políticas destrutivas do PP. Unha das primeiras cuestións que me gustaría pór sobre a mesa no Congreso dos deputados é a necesidade de revisar o pacto lácteo e de garantir un prezo xusto para o leite galego.

  

• "As mareas amosaron o camiño de como temos que facer política"

  O activista social David Bruzos gaba o proxecto das mareas cidadás e o proceso de confluencia de En Marea, convencido como eostá de que "o futuro pasa polo liderado da xente acompañada das organizacións". Número un da candidatura por Ourense, promete levar as problemáticas do rural e da súa provincia ao Congreso. 

  Do activismo social a liderar unha candidatura ao Congreso... Como se dá o paso? Quen o convenceu?

  Non considero que "lidere" unha candidatura ao Congreso, senón máis ben que son a persoa coa cara máis visible da candidatura en Ourense. En Marea somos moitas e hai un equipo humano fantástico: un montón de xente con moita enerxía, cunhas ganas tremendas de traballar e con moita ilusión. Evidentemente que hai diferenzas cos movementos sociais e culturais, fundamentalmente porque se traballaba a unha velocidade de vertixe. En todo caso, debido ao momento histórico no que nos atopamos, semella un paso natural. Hoxe en día é preciso que a xente do común participe, precisamos un cambio radical para poder avanzar cara a políticas máis sociais. O futuro pasa polo liderado da xente acompañada das organizacións e as primeiras que temos que dar este paso somos as que xa estabamos participando en diferentes plataformas sociais.

  "O futuro pasa polo liderado da xente acompañada das organizacións"

  Pero o cambio político influíu?

  É certo que socialmente estamos nunha situación límite respecto a como vivíamos catro anos atrás. Pero, por outra banda, é evidente que o momento político ten avanzado enormemente, e que non era tan sequera imaxinable hai catro anos que puidese haber unha candidatura de varias organizacións políticas, candidaturas cidadás e movementos sociais de forma conxunta. E isto só serve para animar a que cada vez máis persoas se sumen a este proceso que estamos a crear no país.

  Representa a unha provincia do interior onde o rural, coma no resto de Galicia, esmorece. Será a voz deste rural no Congreso? Que reivindicacións levará á Cámara?

  O rural é o berce e base da Galiza, do noso modo de vida. O que nos dá riqueza no económico, no ecolóxico e no patrimonial. Pero as políticas de uns e outros gobernos fixéronnos vivir cada vez máis de costas a este rural. Hai que revertir esta relación, porque só poñendo en valor o noso rural podemos crear un futuro de progreso e bo vivir para Galiza. Máis de 1.500 persoas emigraron da nosa provincia en 2014 ao estranxeiro, 600 delas teñen entre 20 e 35 anos, a maioría con titulación académica. Temos que deter esta situación. Este é un país rico, temos grandes recursos desaproveitados nos nosos campos, ríos e montes. Mediante a cooperación e a innovación poden ser a base para un importante desenvolvemento sostible da actividade económica: industria, servizos, comercio, turismo... Para isto é necesaria unha aposta política seria a nivel estatal que destine investimentos ás infraestructuras e ao desenvolvemento do tecido productivo, mediante programas adaptados á realidade e necesidades deste entorno. Esta será unha liña de traballo fundamental como representantes galegas no congreso.

  "En Marea é o mellor intrumento que pode dar voz á xente e axudar a resolver os problemas do país"

  Galicia conta con problemáticas moi propias (lácteo, naval, despoboamento...) e ás veces desatendidas desde a política estatal, cre que En Marea é o mellor instrumento para dar voz a  esas reclamacións?

  En Marea é o mellor intrumento que pode dar voz á xente e axudar a resolver os problemas do país, porque constitúese como plataforma en que intervimos actores moi diversos, como o meu caso, do activismo social, pero tamén de organizacións políticas e sociais galegas. A pluralidade e a participación é un dos nosos fortes.

  Cal é o obxectivo de En Marea no Congreso?

  O noso obxectivo no Congreso das Deputadas é traballar para que, no caso da provincia de Ourense, poidamos explotar todas as potencialidades dos nosos sectores produtivos. Vivimos no rural, pero o rural tamén ten riqueza, e hai que poñela en valor. Por exemplo, temos o sector primario, somos agricultoras e gandeiras, pero é preciso crear redes curtas de distribución para abrir mercados aos produtos locais e que o beneficio sexa para as agricultoras e non para as grandes distribuidoras. Crear unha industria local relacionada cos produtos do agro, para que o valor engadido quede na nosa provincia. En Ourense temos un importante recurso que é o forestal, creando industrias locais pódese ademais de crear emprego, ter o noso monte ordenado e protexido dos incendios, que cada verán arrasan centos e centos de hectáreas. O abandono da actividade no rural prexudica os nosos montes, fonte tamén de riqueza.

  "O despoboamento e avellantamento non se pode resolver mercando votos a cambio de cheques bebé"

  O despoboamento é outro grave problema en Ourense...

  Si, é outro dos problemas da provincia de Ourense: o despoboamento e o avellentamento. Ourense é a provincia máis avellentada do Estado e tamén unha das zonas coa poboación máis vella de Europa, o 30% son maiores de 65 anos. É un problema que non se vai a resolver mercando votos a cambio de cheques bebé. Pero, relacionado coas nosas maiores, temos que desenvolver unha economía de coidados (no ámbito afectivo, no ámbito sanitario, no ámbito social, etc), que sirva para cubir as necesidades desta poboación e crear emprego local. Só se potenciamos a nosa riqueza endóxena e facéndoa sostible no económico, social e ambiental poderemos ter un futuro no que as máis novas non teñan que seguir emigrando. Queremos que as nosas maiores vivan mellor e as nosas mozas poidan vivir na súa terra.

  Cre que En Marea representa o espírito das mareas municipalistas? É esa unha boa carta de presentación?

  As chamadas mareas amosaron o camiño de como temos que facer política, o seu labor neste último ano foi impresionante. Demostraron que a xente do común pode liderar candidaturas sen restarlle importancia aos partidos políticos. E conseguiron ter voz propia e implicar moita outra xente que non estaba organizada a que participase en política. Os resultados que obtiveron nas eleccións municipais sobrepasaron todas as enquisas e estamos moi satisfeitas polo traballo realizado. Os exemplos de Xulio na Coruña e Martiño en Compostela, entre outras, demostraron que é posible facer política de base, dende a xente e pola xente. Pero non só estas dúas candidaturas tiveron un bo resultado, sen gañar, hai presenza dunha candidatura municipalista en case todas as grandes vilas do país. En Ourense creouse unha rede provincial que conta con 16 candidaturas municipais. Agora toca escalar este éxito ao nivel nacional, e coido que En Marea o está a conseguir dunha maneira sorprendente, en tempo récord. E o mellor exemplo somos estas candidaturas, reflexo da pluraridade que pretendemos.

  "Asmareas amosaron o camiño de como temos que facer política, o seu labor neste último ano foi impresionante"

  Faltan máis actores para unha posible confluencia de cara ás autonómicas?

  Nunca serán suficentes actores, para facer un cambio social verdadeiro debemos involucrar todos os axentes que poidamos. E iso é no que debemos traballar de cara ao futuro. Levamos pouco máis dun ano fomentando outro xeito de facer política, máis participativa e honesta, e temos moita marxe de mellora. Pero todas sabemos que é necesario xuntarnos, que levamos por separado demasiado tempo e que así non funciona, xa o demostramos. Queremos darlle a oportunidade a toda a xente que sempre sentiu a política como algo alleo a que participe en igualdade, que poidan traballar polo común, a súa colaboración é imprescindible. Estamos comezando e só imos ir a máis.

  

• "A unidade das esquerdas non foi posible, pero debera producirse de cara ás autonómicas"

  O escritor Miguel Anxo Fernán-Vello deu o paso e acabou por encabezar a candidatura de En Marea ao Congreso pola provincia de Lugo. Convencido dos bos resultados o 20D, cre que a confluencia acadada de cara ás xerais deberá ser maior aínda de cara ás autonómicas de 2016. 

  Por que deu o paso a liderar a candidatura de En Marea por Lugo? E por que agora?

  Dei ese paso porque fun reclamado cordialmente por un número moi amplo de compañeiras e compañeiros e porque penso que podo achegar, dende a miña perspectiva persoal —nunca tiven cargos políticos con anterioridade—, un novo xeito de facer política: ser portavoz da xente do común, da xente traballadora, dunha ampla maioría de lugueses e luguesas. Penso que Lugo, con En Marea, pode ter en Madrid unha voz que permita acadar un grupo parlamentar propio no Congreso, unha voz de Lugo comprometida fondamente no social, no político, no cultural; unha voz que defenda os intereses de benestar e de progreso da xente de Lugo.

  "En Marea naceu, en Lugo e en toda Galiza, para levar a cabo políticas sociais reais"

  Aposta por unha “política nova, renovada e distinta”. En que se notará?

  En primeiro lugar, notarase porque a xente, a cidadanía, será a protagonista, estará sempre en primeiro plano. Eu serei só un mero transmisor e representante da cidadanía. Hai que loitar contra a pobreza e a precariedade. Hai que poñer nun primeiro plano os dereitos civís, sociais e laborais das persoas. En Marea naceu, en Lugo e en toda Galiza, para levar a cabo políticas sociais reais, defendendo en todo momento un traballo digno e unha vida plena das persoas. E Lugo ten que estar aí, representado por En Marea.

  "A unidade das esquerdas galegas non foi posible agora, pero no futuro debera producirse porque en poucos meses haberá autonómicas"

  Teme que a división da esquerda, tanto a nivel estatal como galego, sexa moi prexudicial para os obxectivos que persegue a candidatura?

  Eu fun membro da Coordinadora do Encontro Cidadán por unha Marea Galega e sempre traballei a prol da unidade das esquerdas no noso país. Nesta ocasión iso non se puido materializar. Mais penso que no futuro iso debera producirse, porque ademais en poucos meses haberá eleccións autonómicas. Todo é resultado dun proceso e todas as organizacións de esquerdas, nacionalistas ou non, deberan estar á altura das circunstancias. Mais, por outra banda, tamén penso que En Marea (Anova, Podemos e Esquerda Unida), co apoio fundamental das mareas municipalistas de Santiago, da Coruña e de Ferrol, vai ser o gran centro de atracción do voto progresista, de esquerdas e nacionalista. Sinto unha certa mágoa pola “neutralidade” mostrada por LugoNovo, que é unha organización “irmá” que ten todo o meu respecto. Mais penso que é un momento histórico para Lugo, para a cidadanía luguesa; para podermos, entre todos, acabar co bipartidismo e situarmos Lugo na primeira liña de avance contra as vellas políticas que ignoran ou desprezan a xente traballadora, a xente do común.

  A quen apoiaría como presidente do Goberno no caso de conseguir o asento no Congreso dos Deputados?

  Como dicimos na Terra Chá, non hai que pór o carro diante dos bois. As esquerdas no conxunto do Estado español poden obter un magnífico resultado, pode haber grandes sorpresas. Cos datos na man e co programa político en primeiro plano sempre se resolverá apoiar o que sexa máis positivo para o conxunto dos cidadáns. Eu nunca apoiarei un presidente de dereitas ou un programa político de dereitas.

  "En Marea vai obter uns magníficos resultados; iso está no ambiente, no pensamento e na ilusión de moita xente"

  Pasado o balbordo da confluencia en Galicia, cre que o resultado será o agardado?

  En Marea vai obter uns magníficos resultados. Iso está no ambiente, no pensamento e na ilusión de moita xente. Eu xa teño recibido o apoio de persoas anónimas que noutras ocasións votaron outros partidos. Lugo pode ser a gran sorpresa. Confío na xente progresista, nacionalista ou non, de Lugo. Confío na xente do traballo, nos gandeiros, nos autónomos, na xente moza e na xente maior... Eu concibo a política, e o nacionalismo galego particularmente, como unha forma de humanismo. E son unha persoa que dende sempre pensou en clave galega e de esquerdas.