Feijóo admite que as oposicións terán os prazos de sempre e non eran necesarios os Orzamentos do Estado

Feijóo, na sesión de control deste mércores CC-BY-SA PPdeG

O PSdeG acúsao de contribuír á “farsa” do Goberno e pide que se oferten máis prazas que a taxa de reposición e que se rematen procesos aínda abertos de anos anteriores

“En abril a Xunta convocará as oposicións de Educación”, anunciou este mércores o presidente da Xunta, Alberto Núñez Feijóo, no Parlamento. A data será a mesma en que se veñen convocando cada ano esas mesmas oposicións, cuxos exames se celebran en xuño e as tomas de posesión en setembro, e evidencia que non era necesario ter aprobados os Presupostos do Estado para facelo, en contra do que viña mantendo ata o de agora o PP. Feijóo ampárase en que é posible grazas a un Decreto emitido polo Goberno que permitirá repetir as cifras da convocatoria do ano pasado, 1.043 prazas, pero o PSdeG criticoulle que coa súa negativa a convocalas ata agora contribuíu á “farsa” impulsada polo Ministerio de Facenda.

“Se era necesario o decreto, por que non se fixo antes?”, preguntoulle Leiceaga

“Se era necesario o decreto, por que non se fixo antes?”, preguntoulle o portavoz socialista, Xoaquín Fernández Leiceaga, para quen o ministro de Facenda, Cristóbal Montoro, “primeiro actuou de pirómano”, ao dicir que non podía haber oposicións sen Presupostos, “e logo de bombeiro”, ao habilitar agora a posibilidade de que as haxa cun decreto. “Pero non había lume, só fume”, criticou Leiceaga. O socialista tamén lle pediu a Feijóo que non se limite a convocar o número de prazas necesario para renovar as xubilacións e baixas do último ano, a coñecida como taxa de reposición do 100%, senón que convoque máis prazas para recuperar os empregos públicos perdidos nos últimos anos. Igualmente, o socialista censurou que a Xunta ten sen rematar ofertas públicas de emprego na administración xeral de anos anteriores, como denunciou hai unhas semanas o CSIF, ata o punto de que das máis de mil prazas ofertadas en 2012, só 43 remataron todo o proceso, o que para Leiceaga evidencia a precariedade da función pública en Galicia.

Feijóo asegura que a precariedade no emprego público en Galicia é das menores de España

Feijóo argumentou que o seu interese é que as oposicións se convoquen co “cen por cen de seguridade xurídica” e lembrou que as comunidades autónomas que gobernan os socialistas xa anunciaron que non as van convocar. Tamén asegurou que a precariedade no emprego público en Galicia é das menores de España.

Leiceaga, voceiro do PSdeG, dirixíndose a Feijóo © Parlamento de Galicia

Despece

  • Villares acusa a Feijóo de endebedar Galicia por unha “operación de imaxe” persoal

    Durante a sesión de control ao Goberno deste mércores, o portavoz parlamentario de En Marea, Luís Villares, preguntou a Feijóo por que durante a crise a Xunta preferiu financiarse con créditos de entidades bancarias que tiñan xuros do 6% de media mentres os xuros do Fondo de Liquidez Autonómica (FLA) habilitado polo Goberno roldaban o 3%. “Canto nos custou a súa operación de imaxe?”, reprochou Villares, recuperando un argumento que xa empregara ao comezo da pasada lexislatura o PSdeG.

    “Ao FLA non acudimos porque non estamos intervidos, porque non queremos que o Ministerio de Facenda nos diga a quen e como se paga”, argumentou Feijóo

    O presidente argumentou que o FLA estaba destinado a comunidades “rescatadas” que non podían financiarse no mercado bancario e que ese mecanismo esixía que o Ministerio de Facenda autorizase o destino ao que as comunidades podían dedicar eses fondos. “Ao FLA non acudimos porque non estamos intervidos, porque non queremos que o Ministerio de Facenda nos diga a quen e como se paga”, argumentou Feijóo.

    Villares rebateu esa afirmación e asegurou que o FLA non estaba restrinxido exclusivamente ás comunidades intervidas. “Pediu 7.000 millóns de euros aos bancos e podía collelos do FLA cunha diferenza media de 3 puntos”, insistiu Villares, para preguntarse “cantos escolas e empregos públicos máis poderiamos ter con eses cartos”. Porén, Feijóo insistiu en que unha das obrigas do FLA é que Facenda autorice o destino dos cartos e que por iso a Xunta e  Canarias, as dúas únicas comunidades de réxime común non intervidas, pediron que se crease para elas o actual Fondo de Facilidade Financeira (FFF) que non ten dita esixencia.

    Luís Villares, no transcurso da sesión de control CC-BY-SA En Marea
  • David Reinero

    David Reinero

    Xornalista de datos máis que de anécdotas, forma parte da redacción de Praza Pública desde 2016 tras facer de todo en El País, Xornal de Galicia e Atlántico Diario

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza