0 Gardados para despois

A Xunta insiste en que non ten competencias para actuar contra a Fundación Franco

Redacción | @prazapublica

A Xunta de Galicia non ten compentencias para actuar contra a Fundación Francisco Franco no caso de que esta entidade actúe contra a Lei de Memoria Histórica. Preguntado o vicepresidente do Goberno galego sobre as novas provocadoras declaracións da institución fascista, Alfonso Rueda aclarou que ao Executivo autonómico compételle "garantir que a xestión do Pazo de Meirás se faga de acordo coa normativa do BIC (Ben de Interese Cultural)".

Rueda asegura que á Xunta compételle "garantir que a xestión do Pazo de Meirás se faga de acordo coa normativa do BIC"

Así, o número dous do Goberno galego asegura que "non é a Xunta quen ten que determinar se se está infrinxindo a Lei de Memoria Histórica, iso correspóndelle a outros estamentos e, por tanto, entendo que se iso se produce, son quen teñen que facelo", engadiu. Ademais, remarcou que, a día de hoxe, desde o Executivo non se ten constancia de que algún partido político, institución ou organización sindical "teña trasladado algún tipo de denuncia", remarcando que "poderían facelo a quen ten a responsabilidade de ditaminar se, efectivamente, se está a infrinxir a Lei".

Así, Rueda insistiu en que o Executivo autonómico "está a exercer as súas competencias" e amosou o seu "rexeitamento" ás últimas manifestacións da Fundación Francisco Franco, "se esas foron" as que recolleron os medios de comunicación. Refírese ao comunicado no que responde ás peticións para a súa ilegalización afirmando que "Franco non fusilou a ninguén nin ditou condenas de morte" e que a organización ten que seguir o seu traballo para pór de relevo o "xenocidio de católicos" e defender as "vítimas" "da "Fronte Popular".

A Xunta "rexeita" as últimas manifestacións da Fundación pero aclara que non é quen vela polo cumprimento da Lei de Memoria Histórica

Rueda lembrou ademais que a Administración autonómica xa abriu un expediente sancionador ao entender que non se estaba cumprindo o réxime de visitas ao Pazo e engadiu que "se se determina que ten que acabar en sanción, acabará".

A Xunta xa manifestara a súa impotencia ante a problemática derivada pola xestión por parte dos Franco das visitas ao Pazo de Meirás e a posible apoloxía do franquismo e da ditadura da que advertía a institución. "Cumprimos coa lei, como non podería ser doutra maneira nun Estado de dereito. E dentro deste marco democrático, todas as persoas ou entidades xurídicas deben respectar e cumprir as normas democráticas coas que se dota o Estado", explica.

Ademais, lembraba que a Fundación Francisco Franco "é unha entidade considerada legal" e que, "polo tanto, o seu dereito, pero tamén o seu deber, é actuar baixo as regras democráticas". Respecto á posibilidade de impulsar iniciativas para recuperar o Pazo para o público ou porse en contacto coa familia do ditador para advertirlle da imposibilidade de facer apoloxía da ditadura, a Xunta nada di. "En todo caso, se a Xunta detecta algunha actuación fóra do marco legal establecido, poñeraa en coñecemento dos órganos xudiciais pertinentes", aseguraba hai unhas semanas. 

Coa túa achega fas posible que sigamos publicando novas coma esta.

En Marea e BNG piden á Xunta que acabe cos "privilexios" dos Franco e non sexa "cómplice do esperpento"

Nos actos de homenaxe a Alexandre Bóveda polo Día da Galiza Mártir, tanto En Marea como o BNG cargaron contra a actitude da Xunta na polémica do Pazo de Meirás. O voceiro do espazo de confluencia, Luís Villares, pediu a fin da "impunidade" e dos "privilexios" da época do franquismo dos que aínda gozan familias como as de Franco, que obtivo o Pazo como -dixo- "rapiña de guerra".

Villares pide "a fin dos privilexios dos que se beneficiaron a costa de sangue e sufrimento"

"Cremos que a recuperación da memoria histórica significa tamén a devolución e a fin dos privilexios de todos aqueles que se beneficiaron a costa do sangue e do sufrimento dos demais", asegurou-

Pola súa banda, Ana Pontón pediu "á Xunta e ao seu presidente" que "non miren para outro lado" ante a situación do Pazo de Meirás que cualificou de "ataque aos principos democráticos". "Non é soportable que a Fundación Franco queira convertelo nun parque temático fascista coa conivencia das institucións democráticas", dixo a voceira nacional do BNG, que acusou o Goberno galego de ter unha posición "morna" ante a polémica e que comparou coa de Donald Trump ataques da dereita máis reaccionaria nos EUA". 

Pontón pide a Feijóo que "non mire cara a outro lado" e non sexa "cómplice do esperpento" en Meirás

Así, Pontón insta a que "a Fundación Franco sexa declarada non grata en Galiza e sexa ilegalizada", ademais de impedirlle que asuma a xestión das visitas ao Pazo de Meirás. "Pretenden reescribir a historia", acusounos a portavoz do BNG, que lembra a Feijóo que "ten instrumentos de presión" para evitar o "esperpento" do que, dixo, "é cómplice".