0 Gardados para despois

Adif privatiza a venda de billetes nas estacións do Barco e A Rúa, que ameazara con pechar

David ReineroDavid Reinero | @DReinero


Hai un ano persoal ferroviario alertou de que Adif e Renfe, as empresas públicas xestoras das vías e dos trens respectivamente, prevían pechar a venda presencial de billetes en sete estacións galegas no marco dun transvase de empregados da primeira á segunda. Cidadanía e sindicatos mobilizáronse, Adif rectificou e o seu propio presidente, Juan Bravo, enviou cartas aos concellos afectados pedindo “desculpas”. Agora, un ano máis tarde, Adif vén de sacar a licitación ese servizo de venda presencial de billetes en dúas daquelas estacións, as do Barco de Valdeorras e A Rúa-Petín, unha “privatización” para o sindicato CGT, que advirte de que se esas localidades quedan sen persoal propio do xestor ferroviario, non haberá ningún responsable da circulación de trens entre Monforte e Ponferrada.

A CGT advirte de que se esas localidades quedan sen persoal propio do xestor ferroviario non haberá ningún responsable da circulación de trens nos 106 quilómetros de vía que separan Monforte e Ponferrada

Segundo os pregos e condicións desta licitación que Adif vén de convocar, o servizo de venda presencial de billetes nas estacións do Barco e A Rúa-Petín pasará a ser realizado por persoal dunha empresa externa, o que segundo CGT trae consigo "a supresión dos cinco postos de traballo que fan estes labores no Barco e A Rúa, ademais das funcións de xestións do tráfico ferroviario". “Se se privatizasen estas estacións, non habería ningún gabinete de circulación aberto dende Monforte a Ponferrada, 106 quilómetros de vía férrea con ningunha estación ferroviaria ou posto de control da circulación en servizo”, alerta o sindicato.

Os pregos de condicións sinalan que a empresa que resulte adxudicataria da venda dos billetes deberá ter o servizo aberto ao público un mínimo dunhas sete horas ao día. O contrato sería por un ano prorrogable outro máis polo que percibiría de Adif un máximo duns 40.000 euros máis IVE ao ano por cada estación. Pola súa banda, a recadación dos billetes vendidos en cada estación deberá ser entregada pola empresa adxudicataria a Renfe.

No prego de condicións para a estación de A Rúa-Petín non se esixía falar galego pero si inglés ou francés. Tras preguntar este diario por esa cuestión, Adif corrixiunos.

Os pregos de condicións tamén presentan outra singularidade. No caso do documento para a estación da Rúa-Petín non se esixía inicialmente que o persoal que vaia prestar o servizo coñeza galego. No prego púñase como “condición imprescindible” o castelán e un “nivel básico de comprensión e expresión oral nos idiomas inglés e/ou francés”, pero non citaba o galego, como si sucedía cos pregos para a estación do Barco. Tras preguntar este diario a Adif por esa cuestión, a empresa pública vén de corrixir os pregos e agora o galego aparece tamén como "imprescindible" ao mesmo nivel que o castelán.

Corrección de erros de Adif sobre o galego nos pregos para a estación de A Rúa-Petín

Coa túa achega fas posible que sigamos publicando novas coma esta.

O BNG reclama manter a venda de billetes nas estacións como servizo "exclusivamente público"

D.L.

A deputada do BNG por Ourense, Noa Presas, saíu este mércores ao paso do inicio dos trámites de Adif para privatizar o servizo de venda de billetes nas estafcións da Rúa-Petín e mais no Barco de Valdeorras. "Primeiro vimos como anunciaban que se eliminaba o servizo de atención ao público e venda de billetes e agora vemos unha nova ofensiva privatizando", lamenta.

Noa Presas: "O ano pasado Ourense deu unha lección de dignidade coas mobilizacións para que se mantivese o servizo, agora debemos facer o propio contra a privatización"

A parlamentaria do Bloque anuncia iniciativas no Parlamento para buscar o rexeitamento da Cámara a "este novo agravio en materia de servizos ferroviarios" cara á poboación ourensá. "A privatización -augura- suporá un chanzo máis na política de recortes e redución de servizos", xa que a externalización traerá consigo ausencia de "garantías de mantemento dos postos de traballo" e de "atención de calidade".

"O ano pasado Ourense deu unha lección de dignidade coas mobilizacións" contra o peche de servizos nas estacións, lembra Presas, "e agora debemos facer o propio para impedir esta privatización". A operación, afirma, "non ten xustificación ningunha, cómpre conservar o servizo como público".