0 Gardados para despois

Feijóo retruca á vaga de protestas pedindo “respecto” para “a maioría da sociedade que decide non manifestarse”

David ReineroDavid Reinero | @DReinero


Nun debate centrado por el mesmo na igualdade malia que o BNG lle preguntaba por diversas protestas sociais dos últimos tempos en Galicia ademais da feminista, o presidente Feijóo recuperou este mércores no Parlamento de Galicia o argumento de que as maiorías silenciosas están co PP e pediu “respecto” para “a maioría da sociedade galega que decide non manifestarse na rúa”. Foi nunha sesión de control ao Goberno galego na que o presidente volveu evitar aclarar que delegado do Goberno o avisou das súas fotos con Marcial Dorado para, pola contra, pedir el explicacións a En Marea pola actuación da súa deputada Paula Quinteiro, implicada nunha actuación policial por vandalismo na pasada noite do sábado ao domingo.

O presidente evita novamente responder, agora no Parlamento, cal delegado do Goberno o avisou das súas fotos con Marcial Dorado e pide explicacións a En Marea pola deputada implicada nunha actuación policial por vandalismo

A portavoz do BNG, Ana Pontón, preguntou este mércores a Feijóo non só pola mobilización feminista senón tamén polas protestas dos pensionistas, do persoal da xustiza ou contra a reforma sanitaria. “A democracia é máis que ir votar cada catro anos e a rúa estalle a dicir que non lle deu un cheque en branco para gobernar en contra das maiorías sociais”, dixo Pontón, para quen Feijóo “non pode desprezar a todo o mundo todo o tempo”.

A resposta do presidente, ao tempo que se centraba en enumerar as súas políticas en materia de igualdade, foi a de asegurar que o Goberno galego escoita as reclamacións que se fan en todas as manifestacións ou conflitos sociais e, ao tempo, reclamar o antedito “respecto” para “a maioría da sociedade galega que decide non manifestarse”. Feijóo chegaría máis tarde a pedir á oposición que atenda “o clamor social da prisión permanente revisable” ou “o clamor de Cataluña en defensa da lei, da Constitución e do Estatuto” asegurando que o PP vai “atender todos os clamores sociais”.

Feijóo insinuou que a actuación da deputada de En Marea Paula Quinteiro, implicada nun caso de vandalismo, foi premeditada mentres que Villares evitou referirse á cuestión

Tamén o portavoz de En Marea, Luís Villares, inquiriu a Feijóo polas mobilizacións sociais. Pero na súa intervención aproveitou para formularlle tamén a pregunta que o pasado xoves o presidente rexeitou contestar a este diario sobre cal dos tres delegados do Goberno que houbo en Galicia en 2004 o avisou, como revelou el mesmo na súa entrevista no programa Salvados, da existencia das súas fotos co contrabandista Marcial Dorado. Este mércores, en sede parlamentaria, o presidente rexeitou novamente responder a cuestión sobre a súa amizade con Dorado e volveu tornar a sesión de control ao goberno nunha nova sesión de control á oposición.

Feijóo replicou a Villares pedíndolle explicacións pola implicación na noite do sábado ao domingo pasados da súa deputada Paula Quinteiro nunha actuación policial por vandalismo. Segundo atestado policial, Quinteiro tento dificultar, facendo valer o seu cargo de deputada, a identificación dun acompañante supostamente implicado na rotura de varios espellos retrovisores de coches aparcados nunha rúa de Santiago. Feijóo preguntou a Villares que “decisión” vai tomar, como portavoz do seu grupo parlamentario, a respecto de Quinteiro, para a continuación asegurar que non vai facer nada porque carece do respaldo das diversas correntes que conforman En Marea. O presidente mesmo insinuou que a actuación  da deputada fora premeditada e dixo que “o sábado saíron á rúa unha serie de persoas simplemente co interese de vandalismo puro”. Villares, pola súa banda, non dixo nada sobre Quinteiro ou os feitos do sábado.

Feijóo gabou e criticou a un tempo ao PSOE ao lamentar a herdanza recibida polo PP de gobernos socialistas e asegurar que “o PSOE ata que chegou o señor [Pedro] Sánchez era un partido moi serio coas pensións”

Pola súa banda, o portavoz do PSdeG, Xoaquín Fernández Leiceaga, tamén preguntou a Feijóo polas mobilizacións dos pensionistas e criticou o que considerou reducidos recursos autonómicos para as persoas maiores. En particular, o socialista lamentou as dificultades para atopar prazas en residencias. Feijóo respondeulle asegurando que desde a súa chegada á Xunta as prazas en residencias pasaron de 6.900 a 11.100, e prometeu 900 prazas máis nesta lexislatura, ao que o socialista replicou salientando que a inmensa maioría son prazas en centros privados concertados e que o Goberno galego rexeita incrementar as públicas.

O presidente, ao tempo que criticou novamente a herdanza recibida polo PP de gobernos socialistas, gabou e censurou a un tempo que “o PSOE ata que chegou o señor [Pedro] Sánchez era un partido moi serio coas pensións”. Unha materia na que Feijóo avalou as subas limitadas aínda sen concretar das pensións anunciadas polo Goberno central.

Coa túa achega fas posible que sigamos publicando novas coma esta.